Kecha qishloqdan uyga qaytish uchun avtobusga oʻtirdik. Birovlarni suhbatini eshitishni yomon koʻraman, bu suhbatni ham ataylabdan eshitmadim, qizlar menga juda yaqin va baland gapirganligi uchun eshitildi. Avtobusda ikkita qiz hali maktabni bitirmagan 10 yo 11 sinf qizlar. Ularni gaplashayotgan mavzusi esa erga tegish, yigitlar, dugonasini kimgadir kelin qilish uchun tavsiya qilish edi, ajablanarlisi bittasi unashtirilgan ekan. Juda hayron qoldim, asabim buzildi, na yigʻlashni na kulishni biladi odam. Momom ikkalamiz bir-birimizga hayron boʻlib qaradik.
Hurmatli, goʻzal, latofatli, begʻubor, barcha goʻzalliklar timsoli boʻlgan qizlajonlar, ILTIMOS OʻQING. Er-qaynona, qaynota, bola-chaqa albatta topiladi. Alloh hamma narsani jufti bilan yaratgan, siz ham albatta bir kun oʻz juftingizni topasiz, ersiz qolmaysiz, ammo, yoshlikda olingan bilimingiz sizni hech qachon uyaltirib qoʻymaydi. Oʻqing - ertaga farzandingiz sizdan nimanidir soʻraganda javob berolmay qolmaslik uchun oʻqing. Barchamizga maʼlum maktab darsliklari qanchalik murakkablashgani, oldin 4-sinfda oʻtilgan mavzular hozir 1- yo 2- sinfda oʻtilyapdi. Bu degani yillar oʻtib darsliklar bundanda qiyinlashadi va sizdan koʻp narsani oʻrganishni, keng dunyoqarashga ega boʻlishni talab qiladi. Dunyoqarash qachon paydo boʻladi - ilm olganda, yashayotgan joyidan boshqa joylarga chiqib odamlarni koʻrganda. Agar ota-onangiz oʻqishingiz uchun qarshi boʻlsa, ularga barchasini toʻgʻri gap bilan, misollar bilan, vaʼdalar bilan tushuntiring, ishonaman ota-ona har doim bolasini tushunadi. Imkoniyatim yetmaydi deysizmi, hozirgi kunda bu bahona emas, mamlakatimizda xotin-qizlarni oʻqitish, ularga yordam berish borasida anchagina qonunlar qabul qilingan va samarali ishlar olib borilmoqda. Oʻzingizga berilgan imkoniyatdan foydalaning. Sizning ilmingizga tikilgan sarmoya butun avlodingizga, butun jamiyatga tikilgan sarmoyadir. "Oʻqib nima qilasan", "Oʻqib olim boʻlasanmi", "Oʻqib shahar olib berasanmi" degan gaplarga tupuring, kerak boʻlsa "Ha, olim boʻlaman", "Ha, shahar olib beraman" deng, zero yaxshi niyat yarim davlat. Bu gapim bilan erga tegmang demoqchi emasman, lekin hamma narsani oʻz vaqti bor. Hozir bizni yoshimizdagi qizlar sizlarning oʻqiydigan, dunyo koʻradigan vaqtingiz bu vaqt qaytib kelmaydi. Toʻgʻri erim taʼminlaydi deyishingiz mumkin, lekin hayot hamisha bir xil emas, bazida sizni ilmingiz qutqarib qoladigan paytlar ham boʻladi. Qizlar yigit ham, er ham topiladi, qochib ketmaydi. Oʻzingiz ustingizda ishlang, shaxsiy rivojlanishingiz uchun harakat qiling, bolalaringiz kelajagi uchun harakat qiling. Ona farzandining birinchi ustozidir. Agar u bilimli bo‘lsa, bolalarining ham ilm olishiga katta hissa qo‘shadi. Bu esa kelajak avlodning yuksalishiga xizmat qiladi.
Hurmatli ota-onalar, sizlardan ham iltimos farzandingiz taʼlim olishi, bir sohani mukammal egallashi uchun sharoit yaratib bering. Hech qachon afsuslanmaysiz, albatta, bir kun u sizni gʻururlantiradigan savobli ishlar qiladi.
