Oʻzbekiston Respublikasi Konstitutsiyasi Yangi Oʻzbekistonni barpo etishning siyosiy-huquqiy asoslarini yaratish bilan birga, davlat va jamiyatni yanada rivojlantirishning ustuvor yoʻnalishlarini belgilab berdi. Hududlarni ijtimoiy-iqtisodiy rivojlantirish, aholi turmush farovonligini yanada oshirishga qaratilgan ushbu jarayonlarda mahalliy vakillik organlarining ham roli nihoyatda katta.

Oʻzbekiston Respublikasi Senati tashabbusi bilan Qoraqalpogʻiston Respublikasi Joʻqorgʻi Kengesi, xalq deputatlari viloyatlar va Toshkent shahar, tuman (shahar) Kengashlari deputatlari uchun oʻquv seminari tashkil etildi. Mazkur seminarda bu gal Qoraqalpogʻiston Respublikasi Joʻqorgʻi Kengesi, Andijon, Buxoro va Jizzax viloyatlari va mazkur hududlardagi tuman(shahar) Kengashlari deputatlari qatnashdi.

Oʻquv seminarda Oʻzbekiston Respublikasi Oliy Majlis Senati raisi T. Narbayeva, Davlat boshqaruvi akademiyasi rektori A. Bekmurodov, shuningdek, Senatning qator qoʻmitalari, Prezident Adminstratsiyasi masʼul xodimlari, turli vazirlik, idora va muassasa vakillari mavzuga aloqador chiqishlari bilan ishtirok etishdi.

Ayniqsa, Oʻzbekiston Respublikasi Prezidenti tomonidan Oliy Majlis palatalarining majlislarida belgilab berilgan ustuvor vazifalar, unda vakillik organlarining oʻrni, mahalliy Kengashlar deputatlari maqomi, deputatlik faoliyatining kafolatlari, mahalliy Kengashlarda doimiy komissiyalar, partiya guruhlari va deputatlar faoliyatini toʻgʻri va samarali tashkil etish kabi mavzulardagi maʼruzalar seminar qatnashchilarini befarq qoldirmadi.

-Aholini oʻylantirayotgan muammoli masalalar boʻyicha tashabbuslarni ilgari surish, shakllantirilayotgan dasturlarga asosli takliflarni, masalan, ijtimoiy obyektlar, ichimlik suvi, gaz, elektr energiyasi, yoʻl qurilishi kabi masalalarni mahalliy ijro etuvchi hokimiyatga kiritib borish bizning asosiy vazifalarimizdan biri sanaladi. Oʻquv seminarida ekspertlar tomonidan ushbu masalalarga yondashuv shakli aniq koʻrsatib oʻtilib, mazkur ishlarni amalga oshirishda mahalliy hokimliklar bilan bogʻliq boʻlgan har bir masala muhokama va munozaralar yoʻli bilan hal qilinishi lozimligi xususida maʼlumotlar oldik, - deydi xalq deputatlari Jizzax shahar Kengashi deputati Baxtiyor Toshpoʻlatov.

Ikki kunlik seminar jarayonida mahalliy Kengashlar deputatlari hududlarni rivojlantirish dasturlarini shakllantirishda ishtirok etish, tasdiqlash hamda ijrosi yuzasidan nazorat-tahlil faoliyatini olib borish, qarorlar qabul qilishda qonuniylikni taʼminlash, saylovchilar murojaatlari bilan, qolaversa, ommaviy axborot vositalari va ijtimoiy tarmoqlar bilan ishlash, deputatlarning odob-axloq qoidalari boʻyicha ham oʻz bilimlarini oshirishdi.

📲 Jizzax.uz sayti sahifalariga aʼzo boʼling:👇

Telegram|@jizzaxviloyatihokimi|Facebook|YouTube|Instagram|ok.ru|@jizzaxuz_bot|X|