Savoldagi ism-familiyalarning ahamiyati

Ba’zida savol matnida keladigan ism-familiyalar savolni topishga yordam beradi. Quyidagi savolni misol qilib keltiraman:

U haqidagi BBCning maqolasida taxminan 60 yoshlardagi Jasekenovning intervyusi ham joy olgan. Jasekenov intervyuda shunday deydi: “Taxminan 17 yosh edim. Unda baliqlar yo‘q bo‘lib ketgani bois, baliqni sotib olishga to‘g‘ri kela boshladi. Biz baliqni qanday sotib olishni bilmasdik”
Savol: U so‘zi bilan almashgan 2 so‘zni yozib bering.
Javob: Orol dengizi.
Izoh: Jasekenov aytishicha, 17 yoshidan boshlab Orol dengizi suvi sho‘rlasha boshlagan. Keyinchalik dengizda baliqlar yo‘qolib ketgach, baliq sotib olish uchun bozorga borgani o‘zidan g‘alati tuyg‘u o‘tganini esga oladi. O‘tgan asr 60-yillarida boshlangan cho‘llarni o‘zlashtirish va noto‘g‘ri irrigatsiya sababli Orol fojiasi yuzaga keldi.

Mazkur savolda Jasekenov familiyali inson tomonidan bundan 43 yil avval qayerdadir baliqlar yo‘q bo‘lib ketgani muammosi hikoya qilinmoqda. Agar baliqlarning qaysidir suv havzasida qirilib ketayotgani muammosidan Orol dengiziga oson yetib borolmasangiz, savoldagi familiya ham sizga yordam berishi mumkin. Buning uchun bu odam qaysi millatga mansubligini o‘ylab ko‘rish kerak bo‘ladi. Familiya taxminan qozoq, qoraqalpoq yoki qirg‘iz millatiga mansub. Endi shu variantlar orasidan baliq (suv havzasi) muammosiga uchragan mamlakat izlab ko‘rilsa, Qozog‘iston va Qoraralpog‘iston hududiga to‘g‘ri keladigan Orol dengizi xayolga kelishi kerak.

@zakovat_anagramma