Husan Tangriyev I Rasmiy kanal

2025 йилнинг 11-12 февраль кунлари Божхона қўмитасининг "Божхона тарихи" музейига республикамиз бўйлаб хорижий сайёҳларга хизмат кўрсатувчи бир гуруҳ гидлар ташриф буюрди.

Ўзбекистон Республикаси Туризм қўмитаси ҳузуридаги Туризмни ривожлантириш илмий-тадқиқот институти билан ҳамкорликда ташкил қилинган мазкур экскурсияда меҳмонлар Ўзбекистон божхона тизимининг бой тарихи билан яқиндан танишиш имкониятига эга бўлишди.

100 дан ортиқ ноёб экспонатларни ўзида жамлаган музей мамлакатимиз ҳудудида божхона муносабатларининг турли тарихий даврларидан ҳикоя қилади.

Шунингдек, божхона соҳасининг серқирра эканлигини ҳам ўзида ифодалайди. Масалан, божхоначилар нафақат иқтисодий хавфсизликни, балки, мамлакатнинг тарихий ва маданий бойликларини, ўсимликлар ва ҳайвонот оламини ҳимоя қилишга ўз ҳиссасини қўшиши музей экспозициясидаги турли стендларда акс эттирилган.

Гидларга сайёҳлар томонидан божхона қоидалари ва тартиботлари ҳақидаги саволлар энг кўп берилади. Шу боисдан улардан бу борадаги билимлар ҳам талаб этилади. Музей билан танишув асносида мазкур йўналишда ҳам маълумотлар берилди.

Яна бир жиҳат - гидлар билан мулоқотда Ўзбекистонда божхона тарихи билан боғлиқ қадимий обидалар юзасидан алоҳида тўхталиб ўтилди ва хорижий сайёҳлар учун божхона тарихи билан боғлиқ янги йўналишларни ташкил этиш юзасидан таклиф ва ташаббуслар билдирилди.

Масалан, Сурхондарё вилоятининг Шеробод туманидаги "Тавка" қалъаси, Хивадаги Ичанқалъа мажмуаси таркибидан жой олган Хўжаш Маҳрам мадрасаси, Бухородаги Талибож дарвозаси божхона тарихи билан боғлиқ уникал иншоотлар ҳисобланади.

Гидлар танишув жараёнида ўзларини қизиқтирган кўплаб саволларга жавоблар олишди.

Бугун Ўзбекистон Миллий медиа бирлашмаси ва Марказий Осиё Сунъий интеллект ассоциацияси ҳамкорлигида «Миллий медиа ва сунъий интеллект: муаммо, ечим ва истиқболлар» мавзусида халқаро конференция бўлиб ўтди.

Тадбирда Ўзбекистон Миллий медиа бирлашмасига аъзо телеканаллар вакиллари, мамлакатимизнинг барча ОАВ ва медиа соҳаси мутахассислари, халқаро экспертлар, Божхона қўмитаси, Рақамли технологиялар вазирлиги, Адлия вазирлиги, Киберхавфсизлик маркази, Марказий Осиё Сунъий интеллект ассоциацияси, Ахборот ва оммавий коммуникациялар агентлиги ҳамда “AIM Lab” ташкилоти вакиллари иштирок этди.

Конференция давомида медиа соҳасидаги замонавий технологиялар, сунъий интеллектнинг ривожланиш тенденциялари ва уларнинг жамиятга таъсири ҳамда истиқболлари муҳокама қилинди.

Конференция сунъий интеллект технологияларининг медиа соҳасида қўлланилиши, унинг афзалликлари ва келажакдаги имкониятларини чуқур таҳлил қилиш ҳамда медиа индустриясининг рақамли трансформациясига ҳисса қўшиш учун муҳим платформа бўлди.

Таъкидлаш жозики, Божхона қўмитаси Матбуот хизмати соҳага доир медиа контент тайёрлашда сунъий интеллект имкониятларига кўпроқ мурожаат қилишни режалаштирган. Шу боисдан ҳам бугунги семинар унда иштирок этган божхона ходимлари учун ҳам ҳар жиҳатдан манфаатли бўлди.

ТАЙИНЛОВ

Бугун Божхона қўмитасида навбатдан ташқари кенгайтирилган хизмат йиғилиши бўлиб ўтди. Қўмита марказий аппарати ҳамда видеоконференция тарзида ҳудудий божхона бошқармалари ва постлари шахсий таркиби иштирок этган йиғилишда ташкилий ўзгаришлар ҳақида ахборот берилди.

Йиғилганларга Ўзбекистон Республикаси Президентнинг 2025 йил 11 февралдаги тегишли қарори билан божхона хизмати полковниги Насиров Ғайрат Фархадович Божхона қўмитаси Раисининг биринчи ўринбосари этиб тайинланганлиги ўқиб эшиттирилди.

Бунга қадар Ғ.Насиров “Тошкент-Аэро” ихтисослаштирилган божхона комплекси бошлиғи лавозимида хизмат қилиб келаётган эди.

Шу кунга қадар Божхона қўмитаси Раисининг биринчи ўринбосари лавозимида хизмат қилиб келган Илхом Мухторов эса божхона органларидаги бошқа тузилмаларда ўз хизматини давом эттиради.

Йиғилишда божхона органлари олдига жорий йилда қўйилган вазифалар ижросига доир қатор масалалар кўриб чиқилди.