Менимча, Катанецнинг ўрнига тайинлашга энг оптимал вариант — Темур Кападзе. Ҳозирги таркибни ярми билан бирга ишлаган, ёшларни ҳам яхши билади — тарихда илк бор Олимпиадага чиқа олди, улар орасида авторитети ҳам юқори бўлса керак. Фақат муаммо унинг рози бўлиши ё бўлмаслигида: олдинда жуда қийин ўйинлар кутиб турибди, жамоани тайёрлашда бор-йўғи икки ой вақт бор. Катанец ноябр-декабр ойларида кетганида ҳам майлийди... Ё қаҳрамон бўласан, ёки халқ танқидларига кўмилиб кетасан. Қийин танлов.

Агар Кападзе варианти ўхшамаса, хорижлик мураббийлар билан музокаралар олиб бориш лозим. Улар ичида энг яхшиси — Кейруш. Осиё футболини, хусусан бизнинг бўлажак рақибларимиз — Эрон, БАА, Қатарни жуда яхши билади. Эронни гегемонга айлантирган мураббий. Ўйин услуби Катанецга ўхшаб кетади. Футболчиларга ҳам мослашиб кетиш осон бўларди. Адашмасам, ЎФА Катанецдан олдин айнан Кейруш билан музокаралар олиб борган, қандайдир деталларда келишувга эришилмаган. Бу сафар қатъиятлироқ бўлиш керак. Айтганча, агар Катанец услубига ўхшаш маҳаллий мураббийни тайинлаш керак бўлса, менимча, бу категорияга 5-2-3 тактикасида муваффақиятга эришаётган Рўзиқул Бердиев ҳам мос тушади.

Яна бир қизиқ вариант — Син Тхэ Ён. Жанубий Кореялик мутахассис Индонезия футболини янги даражага олиб чиқа олди. Унинг ёшлар билан ишлаш тажрибаси катта, интенсив, тезкор футбол тарафдори. Жамоамизга тайинланиши қийинроқ бўлса-да, кўриб чиқилишга арзийдиган номзод.

Сиз ҳам ўз вариантларингизни ёзинг. Катанецнинг ўрнига кимни кўришни истардингиз?

🔥@fayzboguz