Ҳамма билди, аҳволи ёмон,
Юрагига санчилгандай ўқ.
Бева аёл шифохонада,
Дори қиммат, лекин пули йўқ.

Саҳарлари хушидан кетса,
Оқшомлари келар ўзига.
Хамширалар эътибор бермас,
Ёшлар тўлиб қолган кўзига.

Шифокорлар сезарди бугун
Бева аёл топширади жон.
Шунинг учун чиқмасди қуёш,
Шунинг учун йиғларди осмон.

Бева аёл тўплаб бор кучин,
Пичирлайди унсиз, бесадо :
- Етим қолган фарзандим учун
Кечирмайман сени, эй, дунё....

✍️Баҳодир Ғулом

@fayzbog_uz