OʻzDSMI | RASMIY

Kafedralar va bo‘limlar o‘rtasida o‘ziga xos do‘stona musobaqa tashkil etilib, ular tomonidan bezatilgan dasturxonlar, milliy kiyimlar, namoyish etilgan urf-odatlar hakamlar tomonidan baholandi.

Tantanali marosimda Madaniyat vaziri o‘rinbosarlari – Murodjon Majidov va Yusufjon Usmonovlar so’zga chiqib, barchani qutlug‘ ayyom bilan samimiy muborakbod etishdi. Yurtimizda san’at va madaniyat rivojiga berilayotgan e’tibor haqida to’xtalib, birgina 2024-yilda sohaga oid 49 ta hujjat qabul qilinganini alohida e’tirof etib o‘tishdi.

Institut rektori, professor Nodirbek Sayfullayev yig‘ilganlarni Navro‘z ayyomi bilan samimiy muborakbod etar ekan, – “Navro‘z yangi kun, Sharqona yangi yil o‘laroq, yangi g'oyalarga, yangi marralarga ilhomlantiradi, shunday ekan biz – institut jamoasi bugun oldimizga Yangi O‘zbekiston san’ati va madaniyati rivojiga hissa qo‘shishdek katta maqsadlarni qo‘ymoqdamiz, zeroki, bugun Davlatimiz Rahbari tomonidan sohamizga berilayotgan e’tibor va g‘amxo‘rlik sabab mana shunday ulkan marralarni ko‘zlashimiz va uni amalga oshirishimizga barcha imkoniyatlar yaratildi”. – dedi.

Shundan so‘ng joriy yilda qutlug‘ 75 yoshini nishonlagan Oʻzbekistonda xizmat koʻrsatgan yoshlar murabbiysi, professor Munavvara Abdullayeva hamda qutlug‘ 70 yoshini nishonlagan O‘zbekistonda xizmat ko‘rsatgan artist, dotsent Nazriddin Shermatovlar samimiy muborakbod etilib, tashakkurnoma va esdalik sovg‘alari taqdim etildi.

Shuningdek, bugungi bayram tadbirlarida “Osh chempionati”, “Eng yaxshi bezatilgan hudud”, “Eng yaxshi milliy liboslar”, “Eng yaxshi urf-odat”, “Eng yaxshi bezatilgan Navro‘z dasturxoni ”, “Eng yaxshi hunarmandchilik namunalari” kabi nominatsiyalar g’oliblari ham munosib taqdirlandi.

Bundan tashqari, ma’naviy-ma’rifiy ishlarda faol ishtiroki va fanlarni a’lo bahoga o‘zlashtirganligi uchun bir guruh talabalar, jamoat ishlarida faol ishtiroki va o‘z ishini mas’uliyat bilan bajarayotganligi uchun xodimlar ham rag’batlantirildi.

“Rektor kubogi” sport musobaqalarida go’liblikni qo‘lga kiritgan professor-o‘qituvchilar va talabalar kubok, medal va esdalik sovg‘alari bilan taqdirlandi.