2024-yil sarhisobi:

•  Sinovli kunlar:

Bu yili ish topish masalasida juda qiynaldim. Juda ko'p joyga suhbatga borib va undan muvaffaqiyatli o'tdim, lekin so'nggi oylik maosh masalasi kelishuvga erishish oson bo'lmadi. Bundan keyin ham osonlashishi dargumon. Bozor sohaga endi kirib kelgan dizaynerlar bilan to'la va talabga nisbatan taklif juda katta. Bozor tartibga kelishi uchun bir necha yil kerak bo'ladi.

• Transferlar:

Yil davomida 3 ta firmada ishlashga ulgurdim. Bu o'ziga yarasha qiyinchiliklar tug'dirdi. Ikki marta kichik depressiyaga ham uchradim. Lekin hammasi xayrli yakunlandi.

• Ixtisoslashuv (yoki pozitsiyalashuv)

Mahalliy bozorda smd, manipulatsiya, qadoq, brendingga ixtisoslashgan dizaynerlar juda ham koʻp topiladi. Raqobat juda kattaligi uchun bu yo'nalishdagi oylik maoshlar juda ham pasayib bormoqda. Shuni hisobga olgan holda, boshqalardan ajralib turishim uchun bu yil asosan muzeylar uchun infografik dizaynlar tayyorladim.

•  Statistika:

Yil davomida 5 ta katta loyihalar bilan ishlashga ulgurdim:
1. Al-Xorazmiy xalqaro olimpiadasi.
2. O'zbekiston Harbiy prokuraturasi muzeyi.
3. Olimpiya va paralimpiya shon-shuhrati muzeyi.
4. Geologiya muzeyi.
5. Farmatsevtika tarixi muzeyi.

• Ko'nikmalarni rivojlantirish:

Illustros dizayn maktabining 3 oy davom etgan "Logo & Branding" kursida o'qidim. Kursda ustozim Madina Mavlonova tomonidan 3 oy davomida brending jarayoniga oid juda ko'plab yangi bilimlarni oldim.

•  Qilgan xulosalarim:

O'tgan yil oxirida 2024-yilda asosan shaxsiy brend uchun ishlashni reja qilgandim, lekin yetarlicha vaqt ajrata olmadim. Yana bir narsani tushunib yetdimki, hamma narsa shaxsiy brendga bog'liq emas ekan. Eng avvalo o'zi ustimda ishlashni to'xtatmasligim kerak.

•  Kelajak rejalari:

Kelgusi yil uchun juda katta rejalar tuzdim. Bulardan ba'zilari: instagram va youtube'da ham blog yuritish, dizayn studio ochish va dizayn bo'yicha kitob yozishni boshlash.

Yil davomida blogimni o'zim hohlagandek faol yurita olmadim. Shunday bo'lsada blogdan chiqib ketmaganingiz uchun tashakkur. Kelgusi yilda ham xayrli ishlarimiz bardavom boʻlsin!