Booklover🫶✍

#ruhiy_yaqinlik

Kechagi oqshom so‘zlar ruhga ko‘prik bo‘ldi… Har bir jumla sirli pardani ochdi, har bir savol esa yangi ma’nolar sari yetakladi. Sukut so‘zga aylandi, his-tuyg‘ular esa ruhning aks-sadosi bo‘ldi. Va nihoyat, sirlar ortida biz bor edik – bir-birimizni his qilishga intilgan qalblar...Ruh tilsiz edi, biroq u oʻz tinglovchisini topdi…

©Booklover

Bilmadim, balki kulgilaringa
Kulgich bo’lmoq edi istagim..)

©Booklover

#drabbllar

***

Maktab ro‘parasidagi uy. Ota endi tili chiqqan bolasiga so‘z o‘rgatardi:
— Bitta so‘k bolam, oyingni bitta so‘kkin...
Oradan ancha yil o‘tdi. Maktab ro‘parasidagi o‘sha uyda ota o‘g‘liga tanbeh berardi:
— Ahmoq, onani ham so‘kib bo‘ladimi...

***

6 yoshli qizaloq hech qachon ko‘rmagan onasini suratiga boqqancha savol berdi:
— Dada nega biz hech qachon tug‘ilgan kunimni nishonlamaymiz?

***

— Nodiii, qara, senga mazzaya! Turmush o‘rtog‘ing boyvachcha. Dadanglarni ham qo‘sha-qo‘sha korxonalari bor, vuuuuy!!!
— Ha, rost. Tegingda doim mashina. Xohlagan ko‘ylagingni kiyib, xohlaganingni yeysan. Rosa baxtlisan, a?!
Nodira siniqqina jilmaydi.
Uyga kelganda eri divanda sarmast yotar, poldagi shpritsda ikki tomchi qon qotib qolgandi...

***

— G‘alvirni suvdan ko‘taradigan vaqt keldi,– dedi domla.
Ma’naviy zaif talabalar “ko‘tarma kran” uchun pul yig‘ishga tushishdi.

***

— Voyyy, olmaaa...
— Olsang egasidan so‘rab ol!
— Eee... so‘ragani uyalaman.
— O‘g‘irlashga-chi?!

***

— O‘g‘lim, bugun...
— Dada, iltimos keyin gaplashaylik! Bilasizku, ishim juda ko‘p.
— Men... Aytmoqchiydimki...
— Dadaaa, hali Nigorani bog‘chaga olib borishim kerak. Keliningiz bozorga tashlab o‘ting, deyapti! Ishga kech qolaman, tushinsangizchi!
O‘g‘il chiqib ketdi.
Ota o‘g‘il ortidan qarab qolarkan, shivirladi:
— Qaytishingda holva olib kel,  demoqchi edim. Onangni yegisi kelibdi. Bugun yetmish ikkiga kirdi...

***

Ko‘hlikkina juvon sochiga qo‘l tekkanini sezdi-yu, shartta o‘girilib, ortida turgan erkakning betiga tarsaki tushirdi.
— Uyatsiz! Ablah!
Juvon jo‘nab ketdi, sal narida turgan yigitlar kelib, erkakni yerga cho‘zib tashlashdi.
— Ayolga nega teginding, bolam? - so‘radi bir chol.
Erkak yirtilgan labiga kaftini bosdi:
— Sochida chayon yopishib turgan ekan, urib tushirmoqchi bo‘ldim. U meni noto‘g‘ri tushundi, shekilli.
— Tushirdingmi?!
— Yo‘q.

#drabbllar

©Booklover

Sizni quyosh, oʻzimni esa tunda chiqqan hilol oy deb bildim!

Sizni oʻzim uchun muqaddas Kaʼbam dedim, oʻzimni esa unga oshiq boʻlgan koʻngil uyi dedim!

Sizning qalbingizni Jannat bogʻlaridan bir bogʻ dedim, oʻzimni esa oʻsha bogʻdagi eng chiroyli gulga oʻxshatdim!

Sizni bahorga, oʻzimni esa bahordan ilhom olgan kabutarga qiyos qildim!

Sizni shabbodadek sokin, oʻzimni esa oʻsha shabbodada tebranib turgan gul yaprogʻidek nozik his qildim!

Sizni musaffo tongga, oʻzimni esa faqat siz bilan uygʻonadigan oftob nurlariga oʻshatdim!

Sizni yoʻldosh yulduzga, oʻzimni esa sizning izingizdan ergashuvchi kichik sayyoraga teng koʻrdim!

Sizning muhabbatingizni dengizga, oʻzimni esa sizning quchogʻingizda suzuvchi qayiqqa mengzadim!

Sizning nigohingizni Jannat eshigiga chogʻladim, menga esa unga yetishish ancha mushkul boʻldi!

Koʻnglimni musaffo oynaga mengzadim, unda faqat sizning aksingiz porlaganini koʻrdim!

Siz bilan oʻz hayotimni tun va tongga muqoyasa qildim — tun tongga yetisholmaganidek, men ham sizga yetisha olmadim! Sizga yaqinlashganim sari sizdan yiroqlashayotganimni angladim! Siz tomon talpindim, biroq qanchalik yaqinlashmay, siz tun bag‘ridan chiqib ketayotgan tong kabi uzoqlashib borardingiz…
Sizga intilgan sari, go‘yo osmonni tutmoqchi bo‘lgan qushdek, qanot qoqganim bilan sizga yetolmasligimni his qildim..!

By me

©Booklover

#tasavvuf

Mansur Hallojning fikricha, barcha dinlar mohiyatan ilohiy bo‘lib, barchasi birdir.Yagona haqiqatga turli tomonlardan qarashlar - dinlardagi tafovutni shakllantirgan. Dinlarning birligi muhim; barcha din ahllarining maqsadi va xohishi aslida bir xil – Haqqa intilish. Shu nuqtayi nazardan, ularning hammasi o‘zicha haq. Farqi nomlanishda va shaklda, xolos. Bu yerdagi tag mohiyatida yotgan falsafa shuki, inson o‘zi tanlagan dinga emas, balki Alloh tomonidan tanlangan dinga e’tiqod qiladi…buyurilgan narsalarning ba’zilari iroda etilgan bo‘lsa, ba’zilari iroda etilmagan, lekin faqatgina iroda qilingan narsa sodir bo‘ladi, deydi.

Mansur Halloj, Muso a.s.ning so‘zlari ham, Fir’avnning so‘zlari ham: “Bu so‘zlar oldindan belgilab qo‘yilgan va o‘zgarmas taqdir natijasida aytilgan”, deydi. Iblisning Odam a.s ga sajda qilmasligini ham Halloj tavhid, ishq va futuvvat nuqtayi nazaridan talqin qilgan. Unga ko‘ra, Iblis Allohdan o‘zgaga sajda qilmaslikni, ilohiy taqdirda belgilab qo‘yilganligini bilgan va sajda qilish amrini sinov va zohiriy bir xusus deb bilgan.

Iblis Allohga qattiq bog‘langani uchun Undan boshqa hech kimga ta’zim qilmas, sajda qilish sharafini faqat Ungagina saqlagan. Haqning “Agar sajda qilmasang, seni abadiy azoblayman” degan ogohlantirishiga qarshi: “Azoblanayotganimda meni ko‘rib turasanmi?” deb so‘raydi. "Ha" deb javob olganida, “Meni ko‘rib tursang, unda bu azobga chidashga arziydi”, deydi.

Mansur Halloj - ishqni rohat-u zavq emas, dard-u azob deb bilar, oshiq hech ikkilanmay, ma’shuqa uchun eng alamli azobga chidashi kerak, deydi. Rivoyatga ko‘ra, u qatl qilingan kuni tanasidan oqayotgan qon bilan tahorat olib, “Ishq namozi uchun faqat qon bilan tahorat qilinadi” degan ekan.

Halloj fanoda shu darajaga erishganki, "butun borlig‘imda Allohdan o‘zgasi yo‘q, Uning huzurida men ham yo‘qlikka aylandim, faqat Alloh bor" degan mazmunda "Analhaq" degan. Biroq, uning bu bayonoti bilan o‘zini xudo deb da’vo qilgan degan hukm xato. Uning bu boradagi to‘liq bayonoti quyidagicha: “Agar Allohni tanimasangiz, Uning asarini taning va biling, mana shu asar – mana menman, men haqman, chunki men abadiy Haq bilan haqman.” (K.Tavosin, 208).

©Booklover

✍#taqriz #tahlil   (Amerika adabiyoti)

📚 "Tuxum"  (hikoya)
👤 Endi Veyer

Boshqalar mavjud emas. Bu borliqda sendan boshqa hech kim yoʻq. Faqat sen va men bormiz!

BADIIY TAHLIL

Hikoya bir odamning avtohalokatda vafot etishi bilan boshlanadi. U o‘zini notanish joyda, ilohiy mavjudot – "Men" bilan suhbatda topadi. Ushbu mavjudot unga o‘limidan keyin nima sodir bo‘lishini tushuntiradi. Qizig‘i shundaki, bu odam aslida yagona ong egasi bo‘lib, u qayta tug‘ilish orqali turli zamon va joylarda odam sifatida yashaydi. "Men" unga butun insoniyat aslida uning o‘zligini rivojlantirish uchun yaratilganini va koinotning mohiyati shaxsiy o‘sish ekanini tushuntiradi.

Hikoya karma va reenkarnatsiya g‘oyasiga asoslanib, odam har safar yangi shaxs sifatida tug‘iladi va hayot tajribasi orqali o‘zligini rivojlantiradi. Bu, aslida, har bir inson bitta ongning turli qiyofalardagi tajribasi ekanini anglatadi.

Agar har bir inson bir xil ongning turli shakllari bo‘lsa, demak, kimnidir xafa qilish yoki yomon ko‘rish o‘z-o‘zini yomon ko‘rish bilan barobardir. Bu fikr insoniyatni birlashtiruvchi kuch sifatida empatiyaning muhimligini ko‘rsatadi.

— Har doim kimningdir jonini og'ritib, sen avvalo o'zingni joningga ozor yetkazgansan. Har doim kimgadir yaxshilik qilib, sen o'zingga yaxshilik qilgansan. Yer yuzida o'tgan har bir baxtli yoki qayg'uli lahzani sen va faqat sen boshingdan o'tkazasan.

Hikoya juda qisqa bo‘lsa-da, undagi mazmun chuqur va ko‘p qirrali. Muallif kam so‘z bilan katta falsafiy g‘oyalarni yetkazish san’atini qo‘llaydi.

Asar deyarli butunlay suhbat shaklida yozilgan. Bu usul o‘quvchini bevosita falsafiy bahs ichiga tortadi va o‘ziga xos muhit yaratadi.

Tuxum ramzi insoniyatning hali to‘liq shakllanmagan, rivojlanish jarayonidagi bosqichini ifodalaydi. Ya’ni, insoniyat hali tug‘ilmagan, balki katta o‘zgarish yo‘lida ekan.

XULOSA

Endi Veyerning "Tuxum" hikoyasi hayot, o‘lim, reenkarnatsiya, empatiya va insoniyatning yagona mohiyati kabi katta mavzularni ixcham va ta’sirchan shaklda yoritib beradi. Asar o‘quvchini o‘z hayoti va boshqalar bilan bo‘lgan munosabatlari haqida o‘ylashga undaydi. Bu hikoya har bir inson o‘ziga, atrofdagilarga va insoniyatga boshqa ko‘z bilan qarashga sabab bo‘lishi mumkin.

❗️ Albatta, oʻqib koʻring.

🎯 Tarjimon: Nazarbek Nazarov

🕰 Mutolaaga 10 daqiqa vaqtingiz ketadi.

📖 Pdf oʻqish uchun:
https://t.me/bookerberg/684

🎧 Audio tinglash uchun:
https://t.me/bookerberg/685

©Booklover

#nazm

Кўргим келар гулбоғини,
Ёзгим келар дил доғини,
Васлинг-ла кўклам чоғини
Бир-бирга ўхшатгим келар.

©Booklover

#eslatma
#ogohlantirish

Meni rasm va videolarimni birovga tarqatgan, butunlay begona insonlarga ulashgan va mendan beruxsat orqamdan turib ish qiladiganlardan rozi emasman! Qiz bolani butun umrlik saqlab kelayotgan or-nomusini bir soniyada chiqitga chiqarayotganlar, sal orqa-oldini oʻylab ish qilinglar. Bir qizni boshqasiga tavsiya qilaman deb undan beruxsat shaxsiy maʼlumotlarini tarqatayotganlarga jinoiy javobgarlik borligini bilsangiz kerak!

Gap egasini topadi degan, umiddaman!!!

©Booklover