Yuzdan parda ketsa,
Dildan diyonat,
Mehr rishtalari zimdan uzilsa;
Yuraklarni bossa shubha, xiyonat,
Ishonch ko'priklari buzilsa!
Yetimlar haqidan qo'rqmasa birov,
So'qmoqqa aylanib ketsalar
yo'llar;
Qiblagohlar osiy, tug'ishganlar
yov,
G'aznalarga cho'zilsa qo'llar.
Bolalar ruhiga hayot degan dars
Manmanlik urug'in joylasa;
Oshiqlar ko'chada ma'shuqasinmas,
Birovning yo'lini poylasa.
Elning shoirlari g'anim
zotlardek
Bir-birlarin g'ajib yesalar;
Minbarlarga chiqsa ko'chaning gapi,
Аndishani qo'rqoq desalar...
Bunday yurtda endi qirg'in shart
emas,
Vabo ham qochadi undan yiroqqa;
Hatto daryolari qurir basma-bas,
Hatto tuproqlari tushar titroqqa.
Xalqim, bundaylarni ko'rgansan
azal,
Ko'p chekkansan ular ozorin, dog'in,
Sen yengib o'tgansan, lekin har
mahal,
Xalqim, topinaman o'zingga tag'in.
©️ 𝐀𝐁𝐃𝐔𝐋𝐋𝐀 𝐎𝐑𝐈𝐏𝐎𝐕 𝐈𝐉𝐎𝐃I
Хаммаси сиз учун.
https://t.me/+g_ZGbMt--ZMyZTUy@beautywomen90
