to waste ur time

Yetisholmasang nima qipti, axir? Sevganing seni sevmasa nima qipti? Ayriliq? Xiyonat? Qo‘ysang-chi, nima farqi bor? Rostan ham bularning ahamiyati bormi o‘zi?

Sevgilingdan seni sevishini talab qilishing tamagirlik emasmi?

Sen sev. Telbalarcha sev. Pinhona sev. Oshkora sev. She‘r bitib, qo‘shiq kuylab sev. Suratini chizarkansan sev. Ovozini, ko‘zlarining rangini unutib qo‘yib, eslashga urinarkansan sev. Azob va hijron qoningni so‘rib olarkan sev. Uyqusiz, hissiz tunlarda sev. Yig‘lab sev. Kulib sev. Kul bo‘lib sev. Seniki bo‘lmasligini o‘ylab iztirobga tush va sev. Sevaver. Muhimi sevasan-ku. Bundan ham ahamiyatli nima bor, axir, aytsang-chi, nima bor bundan muhimroq?!.

Sen sevasan, muhabbating bor. Baxtlisan. Visol nisbiy tushunchadir, ehtimol. Visol, hijron, rashk, xiyonat... Bularning bari muhabbat ta‘sirida orttirilgan, balki, to‘qib chiqarilgan. Ilohiysi muhabbat. Inson muhabbat bilangina inson. Bizni aldashgan, tiriklik ramzi ham muhabbat. Muhabbatsiz o‘lib qolish ham chin. Faqat muhabbat mavjud, xolos.

Muhabbatdan boshqasi yolg‘on. Muhabbatdan boshqasi safsata.
Muhabbatdan boshqasi gunoh.

Ishqsizlar na bu dunyoga, na narigi dunyoga sig‘adi. O‘ylab qoldim, ishqsiz insonga Jannat ham haromdir, ehtimol. Ha, sevmaslik – gunoh. Eng og‘ir gunoh – ishqsizlik. Va bu gunohni Xudo kechirmaydi, deb qo‘rqaman. Xudo meni kechirmaydi. Sezyapman, his qilyapman. Go‘yo muhabbatga endi aloqam yo‘qdek. Albatta-da! Muhabbatga mutlaqo daxlsizman. Mutlaqo! Qanaqasiga daxlim bo‘lsin?!.

Muhabbatsiz na Xudoga, na o‘zingga, na baxtga yetishasan. Senga faqat va faqat muhabbat tilayman. Muhabbatsiz hech biri tatimasligini anglagan kuning sen tamoman boshqa odamga aylanasan.

samo
00²⁹
1.02.2025

Quyosh yerni oyga topshirar ekan ,
Men har kuni kimgadir nimanidir aytishga ulgurmayotgandekman