O‘zbek xalq og‘zaki ijodi 🎩

Tutullar (tez aytish)

Xalq – donishmand, xalq – daho. Ming yillar davomida xalq tomonidan yaratilgan og‘zaki ijod namunalari o‘zida ulkan ma’rifat, tajriba va tafakkur tarzini tashib kelgan. Bolalari aqlli, zehnli va ziyrak bo‘lishini istagan o‘zbek xalqi qadim-qadimdan ular uchun turli o‘yinlar, sanamachoqlar, tutal (tez aytish)lar va chaldirmoqlar kabi kichik janrdagi og‘zaki ijod namunalarini yaratib kelgan.

Bular orasida tutallar ayrim nutq tovushlarining ko‘p qaytarilishi yoki tovushlarning so‘z va iboralar tarkibida talaffuzni qiyinlashtiradigan darajada murakkab joylashishiga asoslanadi.

Tutallar bolada nutq ravonlashishi, har bir tovushning aniq va to‘g‘ri talaffuz qilinishi, so‘z boyligining ortishi hamda gap mazmunini qisqa va lo‘nda yetkaza olish mahoratining oshishiga xizmat qiladi.

Tutallardan namunalar:

Chumchuq chug‘urchiqni cho‘qimasa,
Chug‘urchiq chumchuqni cho‘qimaydi.

Shu mushuk, shum mushuk, shumshuk mushuk.

Boqi qoqini Soqiga sotdimi?
Soqi qoqini Boqiga sotdimi?

Olim Olimadan olma oldimi?
Olima Olimdan olma oldimi?

Tutallarni aytib ko‘rishga harakat qiling ☺️

🔸Zabarjad Media – eng yaxshisini ilinamiz!