НИЯТ
Ҳақ каломи ҳамиша тилда,
Шундан юзи ёруғдир элда,
Маккатилло ишқи бор дилда,
Байтингни бир кўрсат отамга!
Насиб этсин улуғ саодат,
Шараф бирла айтмоқ шаҳодат,
Ҳарамингда қилмоқ ибодат,
Байтингни бир кўрсат отамга!
Ҳикмат бисёр ҳамду-санода,
Бахтиёрдир Еру – самода,
Шайтонга тош отсин Минода,
Байтингни бир кўрсат отамга!
Кетсин дилдан ташвишу, ғубор,
Топиб ўтган умридан иқбол,
Ўпсин Ҳажар асвадни бир бор,
Байтингни бир кўрсат отамга!
Ҳар мўминга айлагин раво,
Дилда иймон, садоқат – вафо,
Саъй айласин Марваю, Сафо,
Байтингни бир кўрсат отамга!
Етмиш йиллик армонлар ўлсин,
Юрагига қувончлар тўлсин,
Ҳеч бўлмаса, Умрада бўлсин,
Байтингни бир кўрсат отамга!
Мадоридан қолмасдан аввал,
Фариштанг жон олмасдан аввал,
Ҳузурингга бормасдан аввал,
Байтингни бир кўрсат отамга!
Ҳар бир фарзандга ота - оналарини Байтуллоҳга олиб боришдек бахт насиб этсин!
Ўлмасбек Самарқандий.