💝Хуршид Карим шеърлари💝

АКА ВА СИНГИЛ ҲАҚИДА

(Ривоят)

Ўтган бир замонларда,
Қадим Шош томонларда,
Бор эди бир безори,
Йўқ эди ҳалққа кори.

Кун бўйи бир иш қилмай,
Дайдиб,санғиб юрарди,
Тунлар ўғирлик қилиб,
Бир кунини кўрарди.

Эзгулик йўқ дилида,
Жаҳолатга ёр эди,
Ўзидек бир иккита,
Дўстлари ҳам бор эди.

Бир кун улар ярим тун,
Бир бирига уланди,
Катта ўлжа ишқида,
Тоғ ортига йўналди.

Йўл юрдилар, ортида,
Қолди кўплаб давонлар,
Йўл юрдилар,изидан,
Гуллаб кетди тиконлар.

Энг чўққига чиққанда,
Ҳаммаси чарчаб,толди,
Ўша безори бирдан,
Кўзларига ёш олди.

Маъюс тортди бир лаҳза,
Оқшом. Ой нур тўшайди,
-- Ҳов анаву қишлоқда,
-- Менинг синглим яшайди.

-- Ўзим билан оввора,
-- Бир ҳолин сўролмадим,
---Ака бўлиб бир бора,
---Йўқлаб ҳам боролмадим.

Шундай деб у безори,
Бир кўнглини бўшатди,
Қўлин чўзиб синглисин,
Қишлоғини кўрсатди.

Ҳақиқат доим ғолиб,
Ҳақ учун бордир Холиқ,
Тутиб олиб уларни,
Дорга осди ҳалойиқ.

Кетди улар риҳлатга,
Йўқ бўлди Ер бетида,
Ёнди,ёнди беаёв,
Ёнди дўзах ўтида.

Ёнди улар ҳаммаси,
Олов ёниб тинмади,
Лек ўша безорининг,
Битта қўли ёнмади.

Ёнмади дўзаҳда ҳам,
Оқибатнинг йўллари,
Ҳов ана синглим деган,
Ўша ака қўллари.

Қиссадан ҳисса шуки,
Оқибатсиз йўл тутманг,
Акажонлар ҳеч қачон,
Сингилларни унутманг.

Меҳрли бўлинг доим,
Чўкмасин дил,кўнгиллар,
Сизни ҳар балолардан,
Сақлагувчи сингиллар.



✍Хуршид Карим



t.me/Xurshid_Karim

БОЛАЛИГИМ

Ташвиш ғамлар юрагимдан ўтганида,
Рўзғор деган ўпқон мени ютганида,
Тирикчилик қўлга асо тутганида
Аста аста ҳаммасидан тонаяпман,
Болалигим сени қумсаб қолаяпман.


Уйқу қочган бедор, бедор кечаларда,
Кўнгилга дард инган фурсат,нечаларда,
Ўтганимда ўша тошлоқ кўчалардан,
Хотиралар ишқида мен ёнаяпман,
Болалигим сени қумсаб қолаяпман.


Онажоним эркалаши ёқар эди,
Кўз тегмасин деб туморлар тақар эди,
Ҳамма менга дўстдек кулиб боқар эди,
Бугун эса дунёлардан нолияпман,
Болалигим сени қумсаб қолаяпман.


Бахт бор эди онам ёғлик кулчасида
Меҳр тўла эди синглим чеҳрасида,
Акам мени кўтарарди елкасида,
У кунларни йиғлаб эсга олаяпман,
Болалигим сени қумсаб қолаяпман.


Қаддим букиб, дилимни хун этар ҳаёт,
Турфа тақдир, турфа синов тутар ҳаёт,
Бўлди қалбим тилкалама етар ҳаёт,
Аламлардан тўйиб фарёд солаяпман,
Болалигим сени қумсаб қолаяпман.


Хуршид Карим



t.me/Xurshid_Karim

ОНАМ КЕЛСА...


Файз қўшилар кунимга,
Қувонч қўнар дилимга,
Меҳмон бўлиб ёронлар,
Онам келса уйимга.

Қаср бўлар кошонам,
Нурга тўлар пешонам,
Яшнаб кетар остонам,
Онам келса уйимга.

Меҳр дарё, сой бўлар,
Бошим кўкда ой бўлар,
Байрам бўлар, тўй бўлар,
Онам келса уйимга.

Армонларим ёд бўлар,
Қайғу, ғамлар мот бўлар,
Фарзандларим шод бўлар,
Онам келса уйимга.

Дуосин олиб такрор,
Ёнидан жилмам зинҳор,
Фариштадек беғубор,
Онам келса уйимга.

Чарчоқ нима билмайман,
Дилдан ғамни ҳайдайман,
Ёш боладек яйрайман,
Онам келса уйимга.

Қут барака кўл бўлсин,
Умри, ризқи мўл бўлсин,
Ҳар куним байрам бўлсин,
Онам келса уйимга.


Хуршид Карим


28.01.2025


Онасини соғинганларга юбориб қўямиз


t.me/Xurshid_Karim

ФАРҒОНА ҚИЗЛАРИ

🌸🌸🌸🌸🌸🌸🌸🌸🌸🌸

Кўклам каби гулгун юзлари,
Чаманларга туташ излари,
Гўзалликда тенгсиздир бешак,
Фарғонамнинг гўзал қизлари.
🌹🌷
Кулса кулар кўклардаги ой,
Юзин ювса девонадир сой,
Моҳичеҳра, гулчеҳра чирой,
Фарғонамнинг гўзал қизлари.
🌺🌸
Ширин сўзли,сўзлари -асал,
Дунё кулар жилмайган маҳал,
Ҳинд қизидан ўн чандон гўзал,
Фарғонамнинг гўзал қизлари.
💕💞
Ипакдайин момиқ, мулойим,
Ҳаёли -ю,гулюз,гулойим,
Кумушларни эслатар доим,
Фарғонамнинг гўзал қизлари.
🌹🌷
Ҳислатлари париларга хос,
Ярашади қилсалар ҳам ноз,
Келинингиз бўлса қандай соз,
Фарғонамнинг гўзал қизлари.
🌺🌸
Йиғламасин, ҳар доим кулсин,
Умрлари маънога тўлсин,
Бахт қасрига малика бўлсин,
Фарғонамнинг гўзал қизлари.

🌹🌷 🌹🌷

✍Хуршид Карим




t.me/Xurshid_Karim

ОПА СИНГИЛ


Бир бирига талпинишар бедор кўнгил,
Бири лола янглиғ бўлса бири сунбул, Оқибати достон бўлсин дунёларга,
Дийдорлашиб турсин доим опа сингил.


Синглисини сочларини ўрган опа,
Аразлашса биринчи хол сўрган опа,
Аро тушманг йўлин тўсиб қилиб хафа,
Дийдорлашиб турсин доим опа сингил.


Жигар опа, жигар сингил меҳрибони,
Кўрса яшнаб кетар ахир нур жаҳони,
Доим муштоқ кутар ота хонадони,
Дийдорлашиб турсин доим опа сингил.


Сингил келиб опадан хол сўраб турсин,
Опа сингил тўйларида яраб турсин,
Кўкда ой ҳам ҳавас билан қараб турсин
Дийдорлашиб турсин доим опа сингил.


Сингил боғлаб турган не не хожаларни,
Опа тергаб турган ини оғаларни,
Оқибати узилмасин божаларни,
Дийдорлашиб турсин доим опа сингил.


Нима кутса шуни кўрсин тақдиридан,
Юзи ёруғ бўлиб турсин Ҳақ нуридан,
Айирмасин жигарларни бир биридан,
Дийдорлашиб турсин доим опа сингил.




Хуршид Карим







t.me/Xurshid_Karim

ҚИЗИ БОР ОТАЛАР


Ҳаёти қувонч-у, нурга тўларкан,
Уйлари ифорли гулга тўларкан,
Қиз бола биларкан ота қадрини,
Қизи бор оталар бахтли бўларкан.


Кўнгиллар тин олар меҳрин тафтидан,
Парилар сув ичар нозик кафтидан,
Қувониб яйрарлар бир кун бахтидан,
Қизи бор оталар бахтли бўларкан.


Ёғ тушса яларлик остонасини,
Меҳрла безаркан дил хонаси,
Аллоҳ ярлақагай пешонасини,
Қизи бор оталар бахтли бўларкан.


Жонга дармон бўлар ширин сўзлари,
Гул-у, райҳонларга тўлар излари,
Жаннат эшикларин очар қизлари,
Қизи бор оталар бахтли бўларкан.


Бу дунё ўткинчи, ўткинчи ғамлар,
Гоҳ қувонч, гоҳ ғамдан кўзларда намлар,
Ўғлим йўқ деб ғамга ботманг одамлар,
Қизи бор оталар бахтли бўларкан.



Хуршид Карим




t.me/Xurshid_Karim

БОШҚАСИНИ СЕВМА

Менга жафо қилма севгилим,
Ғуруримни тилма севгилим,
Бир ўтинчим сендан илтимос,
Бошқасини севма севгилим.

Майли менга айла ноз фироқ,
Ўтларда ёқ, азобларда ёқ,
Ҳаммасига чидайман бироқ,
Бошқасини севма севгилим.

Сенга айтай дилдаги сўзим,
Бир ўзингни кўради кўзим,
Сенинг бахтинг танҳо мен ўзим,
Бошқасини севма севгилим.

Майли ёғдир сочларимга қор,
Кўксимга санч нишларинг такрор,
Эй мен учун яралган дилдор,
Бошқасини севма севгилим.

Олиб қочма мендан ой юзинг,
Жонга дармон сенинг бир сўзинг,
Бир умрга севганим ўзинг,
Бошқасини севма севгилим

Хуршид Карим




t.me/Xurshid_Karim

БАХТ...
🍃🌺
Соғлик тўсин оилангга,
Хотиржамлик синч бўлсин,
Бу беш кунлик дунёда,
Хўжалигинг тинч бўлин.
Энг катта бахт шу дўстим.
🍃🌺
Дуо олиб отангдан,
Кетсанг ҳар тонг ишингга,
Меҳр сочса волиданг,
Баҳор,ёз куз қишингга,
Энг катта бахт шу дўстим.
🍃🌺
Эзса ширин,ташвиш ғам,
Рўзғоринг бекам бўлса,
Бир дастурхон устида,
Жигарларинг жам бўлса,
Энг катта бахт шу дўстим.
🍃🌺
Ҳамроҳ бўлса ҳар доим,
Шукроналик туйғуси,
Ҳовлинг узра янграса,
Болаларинг кулгуси,
Энг катта бахт шу дўстим.
🍃🌺
Юрсанг соғу саломат,
Тўлса каму кўстларинг,
Яхши ёмон кунингда,
Елка тутса дўстларинг,
Энг катта бахт шу дўстим.
🍃🌺
Кўриб кўзлар қувонса,
Бахт иқболга ёрлигинг,
Кимлар учун бахт бўлса,
Бу дунёда борлигинг,
Энг катта бахт шу дўстим.
🍃🌺
✍Хуршид Kарим

t.me/Xurshid_Karim

27-yanvar, 2025
https://youtube.com/shorts/3C2c1-578TA?si=9eagMu-byvLGHrPP
Ютубдаги каналимизга ҳам обуна бўлинг

ДАРС ҚИЛИШСИН

   

Дил тубида нолалар,
Эй амма -ю, ҳолалар,
Ўйнамасдан телефон,
Дарс қилишсин болалар.


Махкам боғлаб белини,
Ёдлаб байту шеърини,
Кўрмасдан *Гулперини
Дарс қилишсин болалар


Очиб китоб дафтарин,
Мисоли гул -настарин,
Чиройли қилиб хатин,
Дарс қилишсин болалар.


Нима кўп замонада,
,,Матоҳ''лар ҳар ёнада,
Телевизор йўқ хонада,
Дарс қилишсин болалар.


Ўйаб ўйла ,изла,топ,
Бахслар қилишсин ҳар боб,
Тик турмайди бўм бўш қоп,
Дарс қилишсин болалар.


Устозлари бўлар шод,
Кундалик бўлмас касод,
Мултьфилмдан ВОЙДОД,
Дарс қилишсин болалар.


Келди ҳуш замоналар,
Тўлсин китобхоналар,
Азиз ота оналар,
Дарс қилишсин болалар.


Бир ҳазил шеър сўзладим,
Ростми ёлғон сўзларим,
Ҳақиқатни кўзладим,
Дарс қилишсин болалар.
            


🖋Хуршид Карим






t.me/Xurshid_Karim