Миллий курашимизни жаҳон миқёсида оммалаштириш бўйича ҳаракатларни кучайтириш зарурДарҳақиқат, спорт орқали миллатнинг қудрати, иродаси ва анъаналари дунёга намоён бўлади. Ҳар қайси халқнинг миллий колоритини кенг тарғиб қилишда унинг миллий спорт тури, маданий мероси ёки бой тарихи муҳим дастуриламал вазифасини ўтайди. Шуниси қувонарлики, жонажон юртимиз бу борада юқоридаги уч жиҳат бўйича ҳам дунё давлатлари билан бемалол рақобатлаша олади.
Бежиз бу ҳақида сўз очмадим. Биласиз, бугунги кунда жаҳонда миллий спорт турларининг оммалашиши давлатларнинг спортга қаратаётган эътибори, халқининг жисмоний салоҳиятини юксалтириш билан бир қаторда миллат сифатида ўзлигини дунёга танитишга хизмат қилмоқда.
Мисол учун, японларнинг сумо кураши, корейсларнинг таэквондоси, русларнинг самбо каби миллий спорт турлари халқаро майдонда эътироф этилган. Бу давлатлар ўз спорт турларини дунёга танитиш учун йиллар давомида астойдил меҳнат қилишди. Шундан келиб чиқиб, биз ҳам ўз миллий курашимизни жаҳон миқёсида кенг тарғиб қилишимиз, уни халқаро даражада оммалаштиришимиз зарур, деб ўйлайман.
Хабарингиз бор, куни кеча жисмоний тарбия олийгоҳида “Йил эътирофи – 2024” тақдирлаш маросимида қатнашдик. Тадбир доирасида ёш спортчиларимиз билан бир пиёла чой устида суҳбатлашдим. Унда ёшларимиз миллий белбоғли курашни ривожлантириш, уни дунёда ўз ўрнига эга халқаро даражадаги спорт турига айлантириш бўйича бир қатор муҳим таклиф ва ташаббусларни илгари суришди.
Ёшларимиз белбоғли курашнинг халқаро нуфузини ошириш учун, аввало, унинг қоидаларини халқаро стандартларга мувофиқлаштириш, йирик халқаро мусобақалар ташкил этиш, ушбу спорт турини рақамли платформа орқали тарғиб қилиш кераклигини таъкидлашди. Шунингдек, ёш авлодни ушбу спортга қизиқтириш учун мактаб ва университетларда махсус машғулотлар кўламини кенгайтириш таклифини ҳам билдиришди.
Ёшларимизнинг миллий курашимизга бўлган меҳри, уни жаҳонга олиб чиқиш бўйича жонкуярлик билан ташаббуслар билдиришидан, очиғи, қувондим. Чунки белбоғли кураш фақатгина миллий спортимиз эмас, балки халқимизнинг азалий қадриятлари, мардлиги, ҳалоллиги билан алоҳида ўрнига эга бўлган аждодларимиз меросидир.
Албатта, ёшларимиз орасида белбоғли курашнинг довруғини дунёга танитиш учун астойдил меҳнат қилаётган кўплаб жонкуярлар бор. Улар орасида "Зулфия" мукофоти соҳибаси Фарангиз Абдунабиева алоҳида эътиборга лойиқ.
Фарангиз ёш бўлишига қарамай, жаҳон ва минтақавий миқёсда бир қатор нуфузли ғалабаларни қўлга киритган. Унинг Россиянинг Қозон шаҳридаги Жаҳон чемпионатидаги муваффақияти, Остонадаги "Бутунжаҳон кўчманчилар ўйинлари"даги ғалабаси ёки "Брикс" ўйинларида олтин медални қўлга киритиши – фақат спорт ютуғи эмас, балки аёллар иродасининг юксак намунасидир.
Белбоғли кураш орқали биз Ўзбекистоннинг спорт соҳасидаги қудрати ва анъаналарини дунёга танитишимиз мумкин. Нега деганда, кураш ёшларимиз учун нафақат жисмоний кучни, балки иродани, сабр-тоқатни, интизомни сингдирувчи улкан мактаб ҳисобланади.
Миллий спорт турларини ривожлантиришда партиямиз қуйидаги мақсадларни амалга ошириш ғояларини илгари суради:
1. Халқаро майдонда оммалаштириш:
Белбоғли курашни Олимпия спорт турлари қаторига қўшиш учун зарур ташаббусларни илгари суриш.
2. Турнирлар ташкил этиш:
Йирик халқаро мусобақалар – “Олтин белбоғ” турнирини ҳар йили анъанавий тарзда ўтказиш.
3. Рақамли тарғибот:
Белбоғли кураш бўйича махсус онлайн платформалар ва мультимедиа контентини яратиш.
4. Ёшлар билан ҳамкорлик:
Мактаб ва олий ўқув юртлари базасида белбоғли кураш бўйича алоҳида курслар жорий этиш, турли ёш тоифалари учун мусобақалар ташкил қилиш.
Мақсадимиз муштарак — миллий спортимиз нуфузини ошириш йўлида биз ёшларимизни ҳар томонлама қўллаб-қувватлаймиз ва уларнинг фидойилиги, жонкуярлигига таянамиз.
Робахон МАХМУДОВА,
Сиёсий Кенгаш раиси🌐 Adolat.uz |🔵 Facebook | 🚀Telegram |📷 Instagram |🐤 Twitter | 🎬 YouTube
