Kulaymi, yig‘laymi bilolmay qoldim,
Alamdan ko‘nglimni qo‘ydim horitib,
Yuragim ezilib o‘ylarga toldim,
Yangi yil kelmoqda Otam qaritib.
Sochining oqlari ko‘payib yana,
Tomirlar bo‘rtibdi qo‘llarda ana,
O‘tib ketibdida bir yil ham mana,
Yangi yil kelmoqda Onam qaritib.
Bellarin bukibdi yillar shamoli,
Yiroqlab ketibdi yoshlikning soli,
Menku yashayapman dardlardan holi,
Yangi yil kelmoqda Otam qaritib.
Jarangdor ovozi pastlashib biroz,
Yuzini ajinlar qilibdi pardoz,
Qalbimdan chiqadi og‘riqli ovoz,
Yangi yil kelmoqda Onam qaritib.
O‘ylasam, tinmayin o‘rtanar dilim,
Yurakka zarracha sig‘maydi qilim,
Shamolday o‘tibdi yana bir yilim,
Yangi yil kelmoqda Otam qaritib.
Nimalar oldimu, nimalar berdim,
Qachon xasratlashib dardlarin terdim,
Men nodon yangi yil zo‘r bayram derdim,
Yangi yil kelmoqda Onam qaritib.
🌐 𝑻𝒆𝒍𝒆𝒈𝒓𝒂𝒎:
@Tme_Otam_Onam
