Temurbek Umarov |Blog

Ishlarga qarang, so’zlarga emas

Ish so’rab keldi. Zo’r xodim ekanligini ko’p takrorladi. Eski ish joyidan so’radik. “Qutilganimizga xursandmiz” deyishdi.

Pul uchun ishlamayman dedi. Hamkasblar muhimroq dedi. Pulini ozgina oshirishgani uchun o’tib ketdi.

Sizdan hech nima ayamayman dedi. Nima so’rasangiz beraman dedi. Haqqimni so’radim. Hali ham ololmadim.

Quruq gapning vazni yo’q. E’tibor berib yurmang. Ishlarga qarang.

Ishlari yaxshi odam - yaxshi odam, shuni gapirmasa ham.

Ishlari yomon odam - yomon odam, hadis aytib tursa ham.

@azizrakhimov_blog

O`z qadringni o`zing bilmasang boshqalar nimaga seni qadrlashi kerak?

Valodya va uning oilasini juda katta olma bog`i bor. Ular avvallari olmalarni faqatgina o`zlari terib sotardi. Ular olmalarni 20 foizinigina terib sota olardi qolganiga ulgurmasdi, chunki ishchi kuchi kam edi. Keyinchalik ular qo`shnilarini ishga yollashdi va foydasi 4 barobarga oshib ketdi. Chunki endi olmalarni hammasini terib, sotish imkoni bor edida, undan tashqari qo`shnilar juda kam maoshga ishlashardi. Qo`shnilardan biri Dehqonqul Valodya ularga qanchalik zug`m qilsa ham mehnatini qadriga yetmasa ham "Valodya aka zo`r shu kishi bizani boqayapti, shu kishi bo`lmasa biz nima qilardik" deb bod-bod qaytarardi. Vaholanki Dehqonqulning yordami bilan Valodya yanada boyiyotgan edi, Dehqonqulsiz Valodya zarar ko`rardi.

Rizq Allohdan ekanligini va o`z mehnati qadrini bilmagan essiz Dehqonqul-a.....

Shu o`rinda Rossiya bizni boqyapti,ularsiz nima qilardik deyayotgan do`stlar, tushuninglar iltimos Rossiya bizni boqmayapti. Bizni tayyor va arzon ishchilarimiz bo`lmasa ularni iqtisodiyotiga katta zarar. Ularga keraksizki sizga ish berayapti.

Yevropalik bir professor bilan qochoqlar masalasida gaplashganimda u shunday degandi "qochoqlar bu tayyor ishchilarku, ularni bog`chasiga maktabiga va hokazo ulg`aygancha bo`lgan xarajatlariga pul to`lamaysan, tayyor ulg`aygan arzon kadr keladi va uni davlatingga to`g`ri integratsiya qilsang bo`ldi. Boshqa davlatdan kelib ishlaydiganlar davlat uchun juda arzonga tushadi." Shu uchun Yevropa juda ochiqlik bilan Ukrainalik qochoqlarni qabul qilayapti, chunki ukrainlar Yevropa davlatlariga osongina integratsiya qiladi.


Aytgancha Dehqonqul ismi Tog`ay Murodning "Otamdan qolgan dalalar"idan chopildi

@karimraximov

Эркакнинг икки тури.

Яқинда бир синглимиз маслаҳат сўраб қолди: “мен муваффақиятли эркакка турмушга чиқмоқчиман, шунга нима маслаҳат берасиз?”

Мен тўғриси буни ҳазилга олиб “муваффақиятли эркакка турмушга чиқиб кўрмаганман, шунинг учун маслаҳат беролмайман😂” деб жавоб бериб юборибман хафа бўлиб кетиб қолди.

Шунга шу пост орқали ўша синглимизга маслаҳатимни етказиб қўймоқчиман. Умуман эркаклар ўз табиатига кўра асосан икки турга бўлинади: турнир эркаклар ва уй эркаклар.

Ўзи муваффақиятли эркакнинг турмуш тарзини тасаввур қилиб кўрганмисиз?

Турнир эркаклар кечки олтида иш тугаши билан уйга етиб келмайди, у доимо ўзига янгидан янги мақсадлар қўйиб юради, ўзи билан ўзи мусобақалашади, у бир ҳафтада бир кўриниши мумкин, лекин сизда бошқа одамлар ҳавас қиладиган ҳамма нарса бўлади, лекин қўшнининг эри кўчада боласи билан коляскада юрган ҳолат сизда бўлмаслиги мумкин.

Турнир эркакларнинг доимо ғояси, ҳоббиси ва ўзидан катта мақсадлари бўлади, яна ўша ғоя ва мақсадлар тугаб ҳам қолмайди, доим уларга нимадир кам.

Уй эркаклари учун эса озгина созгина қоидаси амал қилади, улар ўша стабилликни афзал кўришади, камдан-кам ҳолларда риск қилишади, уй эркакларининг асосий приоритети оила ва фарзандлар, улар доимо иш тугаши билан уйига югуради, оила даврасида телевизор кўради, махсус диванда узала тушиб ётади, уй унинг севимли жойи, чунки ортиқча рисклар йўқ.

Аслида иккала турдаги эркаклар ҳам муваффақиятли, ҳамма ўзи учун ўзи ҳал қилиши керак қайси турдаги муваффақиятли эркакни танлашни, иккаласи бирда бўлганини учратмаганман, балки қаерлардадир бордир шундайлар.

@bektoshkhatamov

Karyeramni raketa qurishdan boshlayman.

Universitetni, kursni bitirish bilanoq mashhur, katta kompaniyalarga ishga kirishga intilmaslik yaxshiroq. Chunki u yerda aksar ishlar tizimlangan, vazifalar aniq taqsimlangan bo’ladi, kishi ko’p narsa o’rganolmaydi, bir xillikdan zerikib qolishi ham mumkin.

Bu huddi qurilishi yakunlanib qolgan katta binoga arxitektura chizishni o’rganish maqsadida kirishga o’xshaydi: nima qilish kerakligini tushunamiz, lekin aynan qanday qilib noldan qurishni o’rganolmaymiz. Zarur bo’lsa 1 xonali uychani ham mustaqil qurolmaymiz.

Kichikroq, endi shakllanayotgan kompaniya, startaplarda esa na tizim, na mahsulot yoki xizmati to’liq tayyor bo’ladi, balki birgalikda tayyorlanadi. Jamoada odam kamligi sabab aqlli, tajribali mutaxassislar bilan to’g’ridan-to’g’ri ishlash, o’rganish imkoniyati ko’proq bo’ladi.

Boshqa yo’l ham bor, do’stlar bilan kichikroq startaplar qilib ko’rish. Bu ham ko’p insoniy va kasbiy ko’nikmalarni o’rganishda yaxshi usul. Masalan, o’zim ham sotuv, marketing sohalarini, ishga olish, xayrlashish, muzokara qilish bo’yicha boshlang’ich ko’nikmalarni shu yo’l bilan o’rganganman.

Katta korxonalarga katta aql, tajribali mutaxassislar kerak, kichiklariga esa haftada 7 kun, 12-14 soat o’ranishga, “любой” ishni bajarishga tayyor, serg’ayrat yoshlar zarur. Xullas, birdaniga raketa qurish shart emas.

https://t.me/abdulloh_shamsiddin

Zoominar!

7-may, Yakshanba kuni soat 12:00 da Yevropaning nomdor universitetlarining magistratura bosqichlarida tahsil olayotgan yoshlar bilan zoom orqali suhbat olib boriladi. Mehmonlarimiz:

Yazdonov Doniyor, University of Padova, Italy
Quroqboev Shoxzod, KU Leuven University, Belgium
Samatboyeva Maftuna, BMS (Berlin mathematical school), Humboldt Universität Zu Berlin, Germany
Rajabova Nilufar, Karlsruhe Institute of Technology, Germany

Suhbatda Yevropaning universitetlari magistratura bosqichiga qanday hujjat topshirish, shartlari, jarayonlari, tahsil olish davomidagi qiyinchiliklar, e'tibor berish kerak bo`lgan tomonlar... va yana boshqa muhim mavzular to`g`risida mulohazalar olib boriladi.

Undan tashqari suhbatda fizika-matematika fanlari doktori Abror Pirnapasov (Ecole normale supérieure de Lyon, France) ham ishtirok etadilar. Barcha qiziqqanlarni suhbatga qatnashishga taklif qilamiz. Ayniqsa yosh matematiklarga (chetda tahsil olish niyatida bo`lmaganlarni ham) suhbatda ishtirok etishni tavsiya qilamiz.

Suhbatga quyidagi zoom link orqali qatnashishingiz mumkin:
https://nus-sg.zoom.us/j/88616335996?pwd=RWpuWnpuSXdqQS9ySVF4cUJQYmxCZz09

Meeting ID: 886 1633 5996
Passcode: 469942

@karimraximov

Shoshqaloqlik

Bilasizmi dangasalikni o`zini ortidan doim yetaklab yuradigan bir qalin do`sti bor. U shoshqaloqlik, sabrsizlik. Shoshqaloqlik ayni paytda ko`pchilikda uchraydi, ayniqsa bizning yoshlarda, talabalarda. Bu nimada ko`rinadi? Hamma narsani juda tez tugatish hissi. Yoshlarni kuzatishim davomida shunga amin bo`lganmanki, biror ilmiy kitobni o'rganish davomida kitobni ayrim joylarini "bu menga kerak bo`lmasa kerak" deb o`rganmasdan o`tib ketadi va shu kitobni nima qilib bo`lsa ham palama-partish tugatib, tugatdim deb ✔️ belgisini qo`yib qo`yadi. ✔️ belgisini qo`ygan bilan kitobdagi nazariyalar miyasida qattiq joylashib olganday go`yo. Ammo bunday o`qish bilan faqatgina chala ilm olish mumkin. Chala ilm esa ilmsizlikdan yomonroq.

Yoshlarimizni shoshqaloqligini biror video, kino (kino ko`rish tarafdori emasman) ko`rayotganida ham ko`rish mumkin. 1 soatlik videoni o`tkazib o`tkazib 5 minutda ko`rib qo`yadi. Go`yoki kino ko`rishga vaqtini qizg`anayotgandek, lekin aslida shu bilan to`xtamaydi keyingi kinoga o`tib ketadi.


Sodda bir misol keltiraman. Eng kuchli osh pishiradigan oshpazlardan birini oshxonangizga taklif qiling. Unga hamma masalliqlarni bering va osh pishirish uchun 20 daqiqa bering. U oshpaz o`ta kuchli bo`lmasin 20 daqiqada osh tugul shovla ham pishirolmaydi. 20 daqiqada pishirilgan oshni yeganlar oshqozon og`riq bo`ladi va undan tashqari oshpaz o`ziga bo`lgan ishonchini yo`qotib bo`lmag`ur bir oshpazga aylanib qoladi.

Shoshqaloqlik faqatgina hozirgi yoshlarimizda emas butun jamiyatimizda ildiz otib ketgan. Misol uchun biror vazifa beriladida tez natija talab qilinadi. Keling oddiygina universitetni misol qilib olamiz. Talabalarga 4 yil davomida qaysi fanlar o`tilishini belgilash uchun aslida kuchli mutaxassislar hamma narsani, ko`plab tajribalarni, talabalarni vaqtini, fanlarni mantiqiy bog`langanligi, ketma-ketligi, ... larni hisobga olib yillar sarflab mukammal bir dastur qilishi kerak bo`lgan joyda bizda 2-3 oy muhlatda tez qilib berasan deydi. Yoki biror fandan mukammal bir majmua(fandagi barcha malumotlarni o`z ichiga olgan kitob) qilish uchun 1-2 yil vaqt ketadi, unda ham kuchli mutaxassislar ishlaganda. Bizda bunga 1 oy muhlat berishadi, va bo`lmag`ur talablar ham qo`shishadi. Ishonmasligingiz mumkin lekin hozirda universitetlarimiz shoshqaloqlik ruhida ishlaydi, har bir harakatida shoqaloqlikni ko`rasiz.

Bunday misollar juda ko`p, har biringiz bunday holatlarga guvoh bo`lgansiz. Bunday holatlarni faqatgina universitetlarda emas deyarli har bir sohamizda uchratishingiz mumkin. Shoshqaloqlikni to`xtatib sabr va aql bilan harakat qilmasak osh tugul shovla ham yeyolmaymiz.


Shoshib noto`g`ri qadam tashlagandan ko`ra shoshmay chuqur o`ylab to`gri qadam tashlagan maqul.

@karimraximov

Сизнинг қаҳрамонингиз ким?

Мен бизнесни айнан таълим соҳасида олиб борганим учун ҳозирги болаларнинг қаҳрамонлари ҳақида кўп ўйлайман. Биласизми, болаларнинг қаҳрамонларига қараб уларнинг келажакда ким бўлишлари ва қандай ишларни амалга ошира олишларини билиб олиш мумкин.

Американинг буюк бўлишига учта нарса асосий муҳим омил ҳисобланар экан:

1. Мулк (материал ва интеллектуал) ҳуқуқининг жуда қаттиқ қўриқланиши;
2. Бизнесга жуда кенг йўл очилиши;
3. Болалар учун қаҳрамон ярата олиши;

Ҳа, учинчиси мени ўйлашга мажбур қилди, ростан ҳам Америка фильмларини, мултьфильмларини томоша қилсангиз, қаҳрамонлар умуман уддалаши қийин бўлган ишларни бажаришади. Супермен, ўргимчак одам, бэтмен шулар жумласидан.

Эътибор беринг, улар болаларга нималарни сингдирмоқда? Уддалаб бўлмайдиган иш йўқлигини, ҳаммаси ўз қўлингда эканлигини, фақат ўзинг хоҳласанг, атрофдаги барча сенга ёрдамчи бўла олишини сингдиришмоқда.

Энди ўзимизнинг қаҳрамонларга эътибор беринг, “Зумрад ва Қиммат” угай она ва ҳар ишни “хоп бўлади” деб бажарадиган сипо қизга битта кампир бир сандиқ тилла бериб юборади. Осон-а? Икки кун битта яхши кампирникида хизмат қилсанг, бир сандиқ тилло бор. У кампир у тиллоларни қаердан олди? Шунча тиллоси бор одам уйига битта хизматкор олса, бўлмайдими? деган саволлар ўнинчи планда ҳам боланинг миясига келмайди.

Ёки “Кенжа ботир”ни олайлик, уч ака-ука бўлар эмишда, энг кучлиси кенжаси бўлар эмиш, кейин у подшоҳнинг қизини битта ўлимдан сақлаб қолади ва подшоҳ унга мамлакатнинг ярим мулкини тортиқ қилиб юборади. Осон экан-да?

Ёки Афандини олинг, у камбағалларни ҳимоя қиламан деб бойни пулга ухлатади, бу дегани бойни ухлатиб кетса ҳам бўлаверади, бойга бало ҳам урмайди дегани. Бой доимо салбий образда гавдаланади, камбағал эса доимо ижобий образ тимсоли. Афанди алдаб бировнинг пулини ухлатиб кетди-ку, бу мумкинми? дейдиган саволни ҳеч ким ўйлаб ҳам кўрмайди.

Бундай қаҳрамонларга эга бўлган авлод катта бўлса, нималар қилади? Шу оддий маиший муаммоларни ечишдан нарига ўтмайди. Бир миллион доллар пул топиб олсайдим, зўр бўлар эди-да деб ўзини ўзи овутиб юраверади.

Жуда бўлмаса, битта бойнинг қизига уйланиб олиш хаёли уни асло тарк этмайди. Доим осмондан чалпак ёғишини кутиб яшайдиган ёки қайсидир бойни алдаб пулини чайиб юборадиган авлод бўлади қолади.

Фарзандингизнинг қаҳрамонларига эътиборлироқ бўлинг.

@bektoshkhatamov

Kuchanma

Bodibildin bilan shug’ullanishni endi boshlagan kishiga treyner o’rtacha 2 hafta davomida qo’l, yelka, qanoat kabi barcha mushaklarga yengil o’g’irlikdagi toshlar bilan ishlashni yuklaydi.

Keyin esa har trenerovkada ko’pi bilan ikki mushakka, masalan yelka va qanotga quvvatiga qarab o’g’irroq toshlarda ishlashni vazifa qilib beradi. Tosh vazni ko’tarishga oson bo’lib qolgandagina oshiriladi.

Trenerning birlamchi vazifasi shug’ullanuvchi o’z badanini chiroyli qilaman deb mushaklariga og’ir jarohat olishini oldini olish. Kurashda ham shunday, avval to’g’ri yiqilish o’rgatiladi, keyin yiqitish.

Moliyaviy erkinlik borasida ham mutaxassislar shu yondashuvni tavsiya qilishadi: “ Boy bo’lishdan ko’ra boy yashash muhimroq”. Ya’ni, kishi o’zini qattiq stress, tushkunlik va bankrotlikka soladigan qarorlar qilmasligi lozim.

Masalan, muddatli to’lov sharti bilan uy sotib olishga qaror qildingiz. Boshlang’ich to’lovga yig’ib qo’ygan pulingiz bor. Oylik to’lov $1500 dan 36 oy, sizning oylik daromadingiz esa $2000.

To’lovdan keyin qolgan $500 bilan ro’zg’or tebratish mumkin, lekin bu qarorning natijasida ba’zi cheklov va salbiy tomonlar bor:

1. Rejalanmagan istalgan xarajat stressga sabab bo’ladi;

2. Shaxsiy rivojlanishga pul ajratilmaydi yoki kamroq ajratiladi (kitob, kurs va hk);

3. Oilaviy va yaqinlar bilan madaniy dam olish kamayadi;

4. Yetishmovchilikni qoplash uchun qo’shimcha ishlanadi, oila yoki rivojlanish vaqtidan;

5. Ish yoki yashash joyini alishtirish qiyinlashadi;

6. Tashqaridagi ehson, yordamlar to’xtaydi yoki keskin kamayadi.

Ro’yxatni davom ettirish mumkin. Xulosa qilib aytganda, pul, mulk vaqt tejashi, xotirjamlikni ziyoda qilishi kerak.

Shunday qilib, ikkita iphone 14 ga yetadigan pul bo’lsa keyin 1 ta sotib olinadi, kuchanmasdan.

https://t.me/abdulloh_shamsiddin

Oʻz qarashingiz boʻlsin

Har bir inson, tahlil qilishni oʻrganishi kerak. Bu hayotimizda juda kerak boʻladi.

Har bir eshitgan, koʻrgan narsamizni oʻzimizning qarash bilan tahlil qilishni, oʻz usulimiz bilan yondosha olishni oʻrganishimiz kerak.

Hatto, tajribali va ilmli insonlar bilan boʻlgan suhbatdan keyin ham, u insonlarning fikrlarini tahlil qilib, oʻz qarashimiz bilan taqqoslab koʻraylik.

Bu faqat bizning aqli rivojlanishimizga katta yordam beradi. Nima eshitsak ha shunday ekanda, ha toʻgʻri fikr deb emas, nimaga toʻgʻri ekanligini anglab, keyin tasdiqlashni o'rganaylik.

@kaizen_jp_uz