ШАЙХ САБОҚЛАРИ

ҚИЁМДА ҚЎЛНИ ҚАЕРГА ҚЎЙИШ ЛОЗИМ?

@Savollar_kanal 14310-савол

Ассалому алайкум устоз. Намоз ўқишда қўлни киндик остига қўйиб туришлигини биламиз. Телевизорда Арабистондаги намозларни кўриб ўтирсам хамма одам хар хил холатда турибди. Бир хиллари қўлини кўкрагига бир хиллар киндигини остига. Буни дўстимдан сўрасам, улар бошқа мазхабдагилар экан. Саволим, бизнинг мазхабда қайси хадисларга асосланиб қўлни киндик остига қўйилади-ю, бошқа мазхабларда қайси оят ёки хадисга асосланиб қўлини бошқа жойга қўяди?

ЖАВОБ:

– Ва алайкум ассалом! Али розияллоҳу анҳудан ривоят қилинади: «У киши: «Суннат - намозда кафтни кафт устига қилиб киндикнинг остига қўйиб туришдир», деди».Абу Довуд ва Аҳмад ривоят қилганлар.Ушбу ривоятни Ҳанафий мазҳабида татбиқ қилинган. Буни бошқа кўпчилик уламолар ҳам қўллаганлар.


Шайх Муҳаммад Содиқ Муҳаммад Юсуф роҳимаҳуллоҳ

🔎 @ShayhSaboqlari ✔️

ҚАЛБИ МУҲАББАТ ИЛА МУНАВВАР ЭТИЛГАНДИ

Мусъаб ибн Умайр розияллоҳу анҳунинг кийими йиртиқ-ямоқ, ўзи кўп оч юрганидан озиб, заифлашиб қолганди. Расулуллоҳ соллаллоҳу алайҳи васаллам уни кўрганларида: «Аллоҳ таоло қалбини ҳидоят нури билан мунаввар этган зотга қаранглар. Мен уни Исломга киришидан олдин ота-онаси (Маккадаги энг бой одамлардан бири бўлган) энг зўр таомлар, энг зўр ичимликлар билан парваришлаб едирганини кўрганман. Аллоҳ ва Расулига бўлган муҳаббати уни сизлар кўриб турган мана шу ҳолга келтириб қўйди», деган эдилар.
Мусъаб ибн Умайр розияллоҳу анҳунинг бу муҳаббати туфайли у бир маҳалладан ўтса, одамлар унинг шу кўчадан ўтганини ифоридан билишар эди. Энг бой одамлардан бирининг фарзанди, энг яхши таом ва ичимликларни ичиб, энг яхши кийимларни кийиб юрадиган инсон Исломни қабул қилганидан кейин Аллоҳ ва Расулига муҳаббат қўйгач, бу оламнинг фароғатидан воз кечган эди.

“Расулуллоҳ соллаллоҳу алайҳи ва салламга муҳаббат ҳақида 101 қисса” китобидан.

🔎 @ShayhSaboqlari ✔️

ЖАННАТ КИМЛАРГА ВОЖИБ БЎЛАДИ?

Абу Саид розияллоҳу анҳу шундай ривоят қилади: Ҳазрат Пайғамбаримиз соллаллоҳу алайҳи васаллам шундай марҳамат қиладилар: "Ким Рабби сифатида Аллоҳни, дини дея Исломни, Расули дея ҳазрат Муҳаммад соллаллоҳу алайҳи васалламни танладим (ва улардан мамнун бўлдим)”, деса, жаннат унга вожиб бўлади" (Абу Довуд ривояти). Уқба ибн Амир розияллоҳу анҳу шундай ривоят қилади: Зиммамизга туяларни ўтлатиш вазифаси юклатилган эди. Буни навбати билан бажарар эдик. Бир куни туяларни ўтлатиш навбати менга келди. Пешиндан кейин туяларни ўтлатишга мен олиб кетишим керак эди. Туяларни ўтлатиб қайтаётганимда Расулуллоҳ соллаллоҳу алайҳи васалламни учратиб қолдим. Ул зот одамларга қараб хитоб қилаётган эдилар. Муборак сўзларидан шуларни эшитиб қолдим:
- Чиройли таҳорат олиб, кейин икки ракат намоз ўқиган ва намозга бутун руҳи ва ўзлиги билан юзланган ҳеч кимса йўқки, ўзига жаннат вожиб бўлмасин! (Бу сўзларни эшитганда ўзимни тута олмай:) "Қанчалар ажойиб сўзлар!" дедим. (Бу гапимни эшитган) ёнимда турган бир одам:
- Сал аввалроқ келганингда эди, бундан ҳам гўзал сўзларни эшитар эдинг! - деди. Ким экан дея ўгирилиб қарасам, у ҳазрат Умар ибн Хаттоб экан. У сўзида давом этиб: - Сени кўрдим, яқиндагина келдинг. Сен келмасингдан олдин ҳазрат Набий соллаллоҳу алайҳи васаллам: "Сиздан ким таҳоратини олиб, буни чиройли тарзда адо этса, сўнг: “Ашҳаду анла илаҳа иллаллоҳ ва ашҳаду анна Муҳаммадан абдуҳу ва Расулуҳу". (Маъноси: "Шаҳодат келтираманки, Аллоҳдан бошқа илоҳ йўқдир ва яна шаҳодат келтираманки, Муҳаммад Аллоҳнинг қули ва Расулидир”)”, деса ўзига жаннатнинг саккизта эшиги баравар очилади. У қайси биридан киришни истаса, шу эшикдан жаннатга киради", дея марҳамат қилдилар, - деди.

«Расулуллоҳ билан бир соат суҳбат» китобидан.

🔎 @ShayhSaboqlari ✔️