Ko‘pchilik uchun kasb – bu faqat daromad manbai, lekin aslida, u bizning fikrlash tarzimiz, xatti-harakatlarimiz va hatto shaxsiy hayotimizga ham sezilarli darajada ta’sir qiladi. Biz buni bilmagan holda, kasbiy ko‘nikmalarimiz va odatlarimiz hayotimizning boshqa jabhalariga ham singib boradi. Odamlarning fe’l-atvoriga qarab, ularning kasbi hayotga bo‘lgan qarashlariga, muloqot uslubiga va kundalik odatlariga qanday ta’sir qilganini kuzatamiz ko'p hollarda.
O‘zimdan misol keltiradigan bo‘lsam, kasbimning ta’siri kundalik hayotimda sezilarli darajada aks etayotganini payqadim. Ishdan tashqari holatlarda ham tabiiy ravishda tashabbus ko‘rsatib, boshqaruvni qo‘lga olishga harakat qilaman. Muammolarga eng optimal va oson yechim qidira boshlayman, beixtiyor. Survival skill'larim sezilarli darajada oshdi, bu esa kutilmagan vaziyatlarda tez va to‘g‘ri qaror qabul qilishga yordam beradi. Shuningdek, yozishmalarda imlo va gaplarning mantiqiy tizimliligiga bo‘lgan e’tiborim ham kuchaydi. Ilgari introvert bo‘lgan bo‘lsam, vaqt o‘tishi bilan extrovertlik tomon siljib, odamlar bilan erkin muloqot qilishni o‘rgandim. Hatto har doim oldindan rejalashtirish va zaxira reja (buffer) bilan yurish odatimga aylanib qoldi.
Kasbim faqat moliyaviy ehtiyojlarimni qondiribgina qolmay, balki shaxsiy va kasbiy rivojlanishimga ham katta hissa qo‘shmoqda. O‘zimni turli sohalarda sinab ko‘rgan inson sifatida, bugun tanlagan kasbimda o‘zimni kelajakda ham tasavvur qila olishim meni quvontiradi. Bu yo‘lda orttirayotgan tajribalarim hayotimning turli jabhalarida qo‘l kelayotganini anglash esa menga yanada ko‘proq motivatsiya beradi.
Siz ham kasbingiz shaxsiy hayotingizga qanday ta’sir qilayotganiga hech e’tibor berganmisiz?