​​Хайрми, савобми, диёнат учун,
Мисқоллаб йиғилгай Қиёмат учун,
Ўзингиз қасд этган хиёнат учун,
Замонни айбламанг!

Сабрлиман дейсиз, кериб кавсингиз,
Бу асли, фақирлик, ё фирдавсингиз,
Тоғдай сабрингиз бор, ғордай нафсингиз...
Замонни айбламанг!

Аламлардан ёнса, кўзда чўғ бўлса,
Кўзлар оч бўлса-ю, қорин тўқ бўлса,
Менда бор бўлса, сизда йўқ бўлса,
Замонни айбламанг!

Қаҳрнинг майдони - дашту-ёбонлик,
Муҳаббатнинг маҳри - тору - тобонлик,
Асли феълингиздан номеҳрибонлик,
Замонни айбламанг!

Бирда буюксиз-у, бирда бечора,
Қадамлар шаҳдам-у, амал ночора,
Ўзни ёқламоққа тополмай чора,
Замонни айбламанг!

Ўлмасбек Самарқандий.

@Samarqandiy77