Dadam tabassum bilan yuzimga qaradi va:
- Senga hozir bir hikoya aytib beraman, keyin duo qilib ko'zlaringni yumasan, - dedi.
- Kunlardan bir kuni kichkina bir bola dengiz qirg'og'ida o'tirib dengizni tomosha qilayotgan ekan. Uning bu holati baliqchi qayiqlari qirg'oqqa kelishsa, ulardan baliq olaman deb kutib turgan bir cholning diqqatini tortibdi. Bir oz kuzatib turgandan keyin bolaning yoniga boribdi.
- Qalaysan, bolakay, bugun dengiz juda ham chiroyli. Dengizni tomosha qilishga keldingmi? - debdi.
Yosh bola o'girilib qaramasdan ham:
- Dengiz chiroyli, lekin shamol esyapti. Koptogim dengizga tushib oqib ketdi. Shuni kutayotgandim, - debdi.
Haligi chol bolaning yoniga o'tirib:
- Agar sal yoshroq bo'lganimda, suzib borib koptogingni olib kelardim. Lekin bunga kuchim yemaydida, - debdi.
Yosh bola indamabdi. Uzoqlarga oqib ketgan koptogini ko'rish uchun qirg'oqqa yaqin joydagi qoyalar ustiga chiqibdi.
Haligi chol esa:
- Hech qachon umidingni uzma va har doim duo qil, - deb nasihat qilibdi.
Bolakay hursand bo'lib:
- Duo qilsam, koptogim qaytib keladimi? - deya savol beribdi.
- Alloh xohlasa, albatta qaytib keladi, - deya javob beribdi chol.
Cholning aytganlarini o'ylab ko'rganday bo'lib, o'zi
bilgan duolarni o'qishni boshlabdi. Oqshom vaqti bo'lgani uchun havo bir oz salqin ekan. Quyosh botay deb qolgan bir vaqtda qayiqchilar qirg'oqqa qaytishibdi. Bolakay bo'lsa koptogini qaytib kelishini kutar, koptoksiz uyga qaytishni
xohlamayotgan edi. Haligi qari odam bir oz avval qirg'oqqa chiqqan baliqchining yoniga boribdi. Har doim baliqlarni shu baliqchidan sotib olar ekan.
- Ovingiz baroridan kelgan bo'lsa kerak, bir necha kilo baliq olmoqchi edim, - debdi.
Baliqchi chelak ichidagi baliqlarni ko'rsatib:
- Shuncha tuta oldim holos, bugun ovimiz uncha o'xshamadi, - deb javob beribdi.
Bu suhbatni eshitib turgan bolakay:
- Duo qilib ko'rmadingizmi? - deya ularning suhbatiga qo'shilibdi.
Baliqchi hayron bo'lib bolaning yuziga qarab termilib qolibdi. Anchadan beri unutib qo'ygan narsasini eslagandek bo'libdi. Bolakayning yonoqlarini silab:
- Duo dedingmi, bolakay? - debdi past ovozda. - Duo qilsam, baliq tuta olamanmi?
- Alloh xohlasa, albatta tutasiz, - debdi bolakay.
Baliqchi jilmaygan ko'yi bolaga qarab qolibdi. Keyin qayig'iga qaytib, to'rlarning ustidagi eski narsalarni olibdi. U yerda bir koptok bor ekan. Hali qurimagani uchun yangiday bo'lib yarqirab turarkan.
Baliqchi uni bolaga uzatib:
- Bir oz avval dengizdan topib oldim, ol, bu koptok seniki bo'la qolsin, - debdi.
Bolakay xursand bulib ketibdi, lekin, bir tomondan, hayron bo'lib qolibdi. Chunki duosi ijobat bo'lgan edida. To'pini mahkam quchoqlab:
- Bundan keyin mening ruxsatimsiz ketib qolish yo'q, agar duo qilmaganimda, holing ne kechardi? - debdi.
Fotih Duman, «A'mo» kitobidan.
