СЕНИ ИЗЛАЙМАН

Хаёл етмас яқин-йироқларда мен,
Сомончидай овлоқ сўқмоқларда мен,
Кемалар қайтмовчи қирғоқларда мен,
Ёшлигим кечган ул қишлоқларда мен
Тунда ёниб қолган чироқларда мен,
Сени излайман.

Яхшилар уйида; ёмонлар ичра.
Ҳали тарқалмаган гумонлар ичра,
Ўрилмай қор босган сомонлар ичра,
Дурлари таланган уммонлар ичра,
Биз кўрган, кўрмаган замонлар ичра
Сени излайман.

Туманли юртларнинг пойтахтидан ҳам,
Гадо тўрвасидан, шоҳ тахтидан ҳам,
Юм-юм ёш тўккандан ё бахтлидан ҳам,
Тузалган беморнинг илк аҳдидан ҳам,
Тўрт фаслнинг эрка дарахгидан ҳам
Сени излайман.

Баҳорги жилғанпнг бўйларида жим,
Севишмаганларнинг тўйларида жим,
Кекса ҳофизларнинг куйларида жим,
Ўн олти ёш қизнинг ўйларида жим,
Бева хотинларнинг кўйларида жим
Сени излайман.

Юлдузлар пойгаси солган чангда ҳам,
Ерда камалаксиз ётган рангда ҳам,
Она сўнггн ўғлин берган жангда ҳам,
Қиличлар юзига қўнган зангда ҳам,
Ватандан олисда ё Ватанда ҳам
Сени излайман.

Ел оралаб юрган эгатлар узра.
Тошни ёриб сўлган кўкатлар узра,
Остонада сўнган журъатлар узра,
Қўл силтмай ўтганим бекатлар узра,
Альбомларда сарғиш суратлар узра
Сени излайман.
Қадимда эканинг биламан-ку мен,
Ёнимда эканинг биламан-ку мен,
Олдинда эканинг биламан-ку мен,
Дардимда эканинг биламан-ку мен,
Қалбимда эканинг биламан-ку мен –
Сени излайман?!

ОМОН МАТЖОН