G'iyosiddin Yusuf | blog

72 yoshli Muhammad Aziz – dunyodagi eng ko‘p suratga olingan kitob sotuvchisi, Rabot shahri, Marokash.

U kuniga 6–8 soat vaqtini kitob o‘qishga bag‘ishlaydi va faqat ovqatlanish, namoz o‘qish yoki mijozlariga yordam berish uchun tanaffus qiladi. Qolgan vaqtda esa u shahar bo‘ylab yurib, kitob izlaydi va keyinchalik ularni o‘z do‘konida sotuvga qo‘yadi.

U kishining o'zi bunday deydi: “Men arab, fransuz, ingliz va ispan tillarida 4000 dan ortiq kitob o‘qiganman, demak, 4000 dan ortiq hayotni yashaganman. Har bir inson shunday imkoniyatga ega bo‘lishi kerak! Menga kunimdan zavq olish uchun faqat ikkita yostiq va bir kitob kifoya".

#Tarjima #kitob

@GiyosiddinYusuf

Bolalar uchun odobga doir yangi kitob yozdim. Rasmlar bo'yicha dizayner @Dilshod_Bahrom bilan birga ishlayapmiz.

Tez kunlarda emas, lekin 2-3 oyda nashr qilinadi, inshaalloh. 😊

#Ijod

@GiyosiddinYusuf

"Galaktikada bir kun" — birinchi va ikkinchi kitoblar

Mendan bolalar uchun qanday kitoblar tavsiya qilishimni so‘rashadi. Endi qo‘rqmay ushbu kitoblarni tavsiya qila olaman! Chunki Sa’dullo Quronovning ushbu asari bolalar dunyoqarashini kengaytish, ilmga bo‘lgan intilishini oshirish, insonning aziz va mukarram ekani, vaqtning qadriga yetish, hayotdagi turli mashaqqatlarga mardonavor qarshi tura olish, irodali bo‘lish kabi xislatlarni rivojlantirishga xizmat qiladi.

Asar qahramoni Ahmad kichik yoshda bo‘lishiga qaramay, fizika, matematika, astronomiya kabi fanlarni a’lo darajada biladi. Natijada u ixtirolar tanlovida ishtirok etish uchun koinotda harakatlanadigan kema yasash loyihasini tuzadi. Ahmadning loyihasi hali mukammal bo‘lmagani sababli tanlovda o‘rin ola olmasa-da, Salmir sayyorasidan kelgan Margol ismli kishining e’tiborini tortadi va u Ahmaddan chizmalarini berishini, ular asosida kema yasab, Salmir sayyorasi uchun zarur bo‘lgan kristallni izlab topishni iltimos qiladi. Ahmad o‘zga sayyoralikka yordam qo‘lini cho‘zadi, ikkisi birga "Ko‘kkezar" kemasini yasashadi va bu safarda Ahmad ham hamroh bo‘ladi...

Sarguzashtlar mana shu yerdan boshlanadi. Voqealar bir-biri bilan juda ham ustalik bilan bog‘langan, o‘quvchini nihoyatda qiziqtirib qo‘yadi. Orada xayoliy holatlarni izohlab beruvchi ilmiy qarashlar ham berib o‘tiladi. Shuning uchun bu asar "ilmiy-fantastik qissa" deyiladi.

Kitobning ikkinchi qismi ham birinchi qismdagi voqealar bilan bevosita bog‘liq. Unda ham Ahmad koinotga safar qiladi va vaqt tuynugidan million yillar ortga qaytib, Meriya sayyorasidan koinot javohirini topadi. Ayni shu joy bolalar uchun juda muhim deb o‘ylayman.

Asardagi har bir voqea juda ta’sirli, kutilmagan voqealar, kulminasion nuqtalarga boy. "Obbo! Endi qahramonlar nima qilar ekan, boshi berk ko‘chaga tiqib qo‘ydi-ku!" deb siqilib turganingizda o‘ylamagan joyingizdan yechim chiqib kayfiyatingiz ko‘tariladi.

Qisqasi, o‘qish kerak. Asar tili juda ravon ekan. Bolalar tushunishga qiynalmaydi, kattalar zerikib qolmaydi. Sa’dullohning bunday mahoratli yozuvchi ekanini bilmagan edim. Alloh ijodlariga baraka bersin. Ayni kunlarda "Galaktikada bir kun"ning uchinchi qismini yozayotgan ekanlar, Alloh oson qilsin!

#mutolaa2025

@GiyosiddinYusuf

Gohida men soatlab bir joydan jilmay, uyqu vaqtida uxlamay 1-2 oyda bitta kitob yozaman. Keyin oylab Din ishlari bo'yicha qo'mitada ruxsat kutadi, sahifalovchi "3-4 kunda sahifalab beraman" deb 2-3 oy olib yuradi, musahhih "15-20 kunda o'qib beraman" deb 2 oy o'qiydi...

#Ijod

@GiyosiddinYusuf

"Maymunlar sayyorasi" tugadi!

Abdulla Qodiriy "O‘tkan kunlar"da Kumush vafot etgan joyini yozayotib yig‘lagan ekan — "Kumushni o‘ldirib qo‘ydim!" deb. Kitobni tugatib men ham shunday kayfiyatda turibman — endi qahramonlar taqdiri qanday kechadi? Ongli insonlar qani?..

"Maymunlar sayyorasi" tafakkurga undovchi fantastik asar, "katta bolalarning" kitobi ekan. Ha, aytgancha, bolalar o‘qimasin!

Kitobda o‘zga sayyoraga borgan insonlar maymunlar olamiga tushib qoladi. Lekin bu maymunlar taraqqiy topgan, gapiruvchi, insonlardek kiyinadigan, qisqasi, butun hayot tarzi insonlardek bo‘lgan maymunlar edi. Bu sayyoradagi insonlar esa ongsiz, gapirmaydigan, kiyimsiz bo‘ladi. Ularni maymunlar hayvon sifatida ko‘radi. Maymunlar qo‘liga asir tushgan, mana shu ongsiz odamlar ichidagi qahramonlarimiz o‘zining ongli inson ekanini isbotlab, Yerga qaytishi oson kechmaydi. Ammo oradan 700 yil o‘tib ketgan edi, ularni Yerda ham yorqin kelajak kutmayotgan edi...

Bir kishi shahar tomosha qildirish uchun nihoyatda baland minoraga olib chiqilsa, yo‘lda u ko‘p ajoyibotlarga guvoh bo‘lsa, oxirida esa minora tepasidan tashlab yuborilsa, buni kuzatib turgan kishi nimani tuyadi? "Maymunlar sayyorasi" kitobini o‘qib bo‘lgan kishi ham shunday hisni tuyadi...

#Mutolaa2025

@GiyosiddinYusuf

Erkak kishi oilasi uchun mas’ul

Har bir erkak oilasi uchun mas’uldir. U oila a’zolarini yaxshilikka buyurib, yomonlikdan qaytarishi kerak. Har kun o‘tgan kun davomida nima ishlar qilgani: kitob o‘qigani, yaxshilik qilgani va shu kabilar haqida juftingiz va farzandlaringizdan so‘rang. Kamchiliklar bo‘lsa, hali to‘ldirishga vaqt bor. Shuningdek, kun davomida xatolarga yo‘l qo‘ygan bo‘lsalar, ulardan saboq olib, qayta takrorlamaslikni tushuntiring.

📚Gʻiyosiddin Yusufning «Tarbiya-chi?» kitobidan #iqtibos

Kitobni xarid qilish

Yanada ko'proq iqtiboslar

"Oyning orqasidagi sir — Ira tamadduni" nomli kitob haqida

Shu yil boshidan bir necha fantastik asarlarni o'qishni niyat qilgan edim. Shunday kitoblardan biri yakuniga yetdi, alhamdulillah.

Ushbu kitobda Ira sayyorasida yashaydigan odamlarning (!) koinotda minglab yillar davomida sargardon bo'lib, oxiri Yer sayyorasiga joylashish tarixi hikoya qilinadi.

Noshirlardan uzr so'ragan holda avval jichcha tanqid qilaman: kitobda badiiy jihatdan biroz kamchiliklar bor, voqealarni yasama ulash hollari kuzatilgan. Shuning uchun mutaxassis kishi (yozuvchi, muharrirlar) yoki ko'p kitob o'qigan kishilar biroz zerikib qolishi, g'ashi kelishi mumkin.

Ammo kitob bolalar uchun mo'ljallanganini hisobga olsak, bolalar bu kabi kamchiliklarni sezmaydi va maza qilib o'qiydi. Kitobdagi tasavvuriy voqealar bolalar dunyoqarashini kengayishiga, ilm-fanga bo'lgan qiziqishi ortishiga sabab bo'ladi deb o'ylayman.

Bolalar uchun kitoblar nashr qilishda g'ayrat qilayotgan @Pingvinbooks nashriyotiga va kitobni nashrga tayyorlagan @Misbahkitoblar jamoasiga uzr va rahmat aytaman. Alloh ishlaringizga rivoj bersin!

#Mutolaa2025

@GiyosiddinYusuf