G'iyosiddin Yusuf | blog

Ustozlarning hurmati oiladan boshlanadi!

Farzandingizning ustozini hurmat qilishingiz shart! Chunki:

▪️ ustoz siz bermagan bilimni bermoqda;
▪️ farzandingizga o'rnak bo'lishingiz kerak. U ustozini hurmat qilsa, ilmidan manfaat ola oladi. Ixlos qilinmagan kishining gapi ham shubhali tuyuladi;
▪️ har qanday ustoz ilmning hurmatidan hurmat qilinaveradi. U ustoz farzandingizga dars bermaganda ham hurmat qilishingiz kerak edi, dars bergani sababli yanada haqli bo'ladi.

#ustoz #tarbiya

@GiyosiddinYusuf

Har bir bolaga alohida e’tibor

Bolalar bir oilada o‘sib, bir xil tarbiya ko‘rishsa-da, ularning xarakteri, qiziqishlari va ehtiyojlari bir-biridan farq qiladi. Shuning uchun har bir bolaga alohida e’tibor qaratish ota-onaning muhim vazifasidir.

Farzandingiz bilan muntazam muloqot qiling, ularning hissiyotlarini tushunishga harakat qiling va o‘ziga xos qobiliyatlarini qo‘llab-quvvatlang. Ularning har birini boshqa birov bilan solishtirish o‘rniga, o‘z imkoniyatlariga qarab rag‘batlantirishga intiling.

Bu nafaqat ularning o‘ziga bo‘lgan ishonchini oshiradi, balki oilada iliq va mustahkam munosabatlarning shakllanishiga yordam beradi. Unutmang, har bir bola o‘z dunyosiga ega va u alohida e’tiborga loyiq!

#tarbiya

@GiyosiddinYusuf

Odamlar bilan munosabatlarimizni yaxshilash yo'llaridan biri ularning farzandiga e'tibor qilishimizdir. O'rtog'ingizga farzandlarini maqtab qo'ying yoki ularning ismini aytib hol so'rab ko'ring, qanchalar xursand bo'ladi. Sizga boshqacha qaraydi, bolalarim uning uchun ahamiyatli ekan deb quvonadi.

Chunki inson farzandini o'zidan ko'ra ko'proq yaxshi ko'radi. Uni yaxshi ko'rganlarni ham yaxshi ko'radi. Mabodo aksi bo'lsa, uning ham munosabati teskarisiga o'zgaradi: farzandini yomon ko'rgan kishini xushlamaydi, uni yoqtirmagan kishini yoqtirmaydi va hokazo.

Bu barcha ota-onalarda bor tuyg'ular deb o'ylayman. Buning uchun din, millat, irq bilan farqlanilmaydi. Hatto insonlardan boshqa mavjudotlar ham farzandini boshqalardan himoya qiladi.

#tarbiya

@GiyosiddinYusuf

To'rt yil oldin shu kunda Muhammad Amin ismli yigit feysbukda ko'rishaylik degan ma'noda post yozgan ekan, shu postga layk bosib o'tib ketgan edim, izohda kaminani belgilab, "Kelasizmi, G'iyosiddin aka?" — dedi. Taklifni qabul qildim.

Ali O'zbekning "Adana kebab" nomli kafesida ko'rishdik — 4 kishi bo'ldik, xolos. Ularning orasida Muhammad Ali Eshonqulov ham bor edi.

U kishi borishini aytmasdan, post va izohlarni o'qib borgan ekan. Ancha suhbatlashdik, Muhammad Ali ancha gapirdi. Shunday ko'rishib turishni taklif qildi. Ikki haftada bir marta ko'rishishga zo'rg'a rozilik berdim, vaqtim kamligini aytdim.

U vaqtlar Muhammad Ali hali mediada mashhur emas edi. Shu uchrashuvimizdan keyin men u kishini "Kitob. Tavsiya va tahlil" ko'rsatuvimizga taklif qildim. "Million dollarlik xatolar" kitobi haqidagi suhbatimiz yaxshi qabul qilindi.

Undan keyin Muhammad Alini "Osmondagi bolalar" ko'rsatuviga taklif qilishdi. Ana shundan keyin bu kishini uncha-munchaga tutib bo'lmay qoldi. Hozir o'tirib suhbatlashish u yoqda tursin, telefonni ham ko'tarmaydilar, shaxsiydagi xabarlarga ham javob bermaydilar. )

#Xotira #hazilnamo

@GiyosiddinYusuf

Farzandga onasini hurmat qilishni o’rgatish

Ota o’z ayolini hurmat qilsa, bolalar onasiga bo’lgan munosabatni aynan undan o’rganadi. Chunki farzandlar otaning onaga ko’rsatgan mehr-muhabbati, ehtiromi va samimiyatini ko’rib ulg’ayadi.

Shu bilan birga, ota ham, ona ham o'z onalariga yaxshi munosabatda bo'lish bilan o’rnak bo’lsagina, bolalar ham onasini e’zozlashni o’z hayotlariga singdiradi. Haqiqiy tarbiya so’z bilan emas, amal bilan bo'ladi.

#tarbiya

@GiyosiddinYusuf

Vaqt juda tez o'tadi: "Sevaman, sog'indim" SMSlari tezda "Kasha, pampers"ga aylanadi!

#Tabassum

@GiyosiddinYusuf

Arzimas ishlarga ahamiyat bermang

Kitob nomi: «Arzimas ishlarga ahamiyat bermang. Hamma ishlar arzimasdir».

Ushbu kitobda insonning ruhiy holatini yaxshilash, kundalik hayotda yengil va samarali yashash yo‘llari haqida muhim tavsiyalar berilgan. Quyida ayrim boblarning muxtasar mazmuni bilan tanishamiz:
• Boshqalarning fikrlarida oz bo‘lsa ham to‘g‘ri jihatlarni izlang.
• Tanqidlarni o‘zingiz uchun saboq va zavq olish vositasiga aylantiring.
• Mutaassiblikni yengish uchun o‘zingizdagi beshta jihatni yumshating.
• Boshqalarni tanqid qilishdan o‘zingizni tiying.
• Allohning qudratini barcha ishlaringizda his qiling.
• Sevimli insonlar haqida kundalik fikr yuriting.
• Tavozelikni odat qiling va bag‘rikeng bo‘lishni afzal ko‘ring.
• Beminnat yaxshilik qilishga intiling.
• Hayotni imtihon sifatida qabul qiling va kayfiyatga bog‘liq bo‘lmaslikka o‘rganing.
• Munozaralarda hikmat bilan ish tuting va yaxshilab tinglashni o‘rganing.
• Atrofdagi insonlarga, yosh bolalar yoki qariyalardek e’tibor bilan qarang.
• Ozgina bo‘lsa ham kundalik yolg‘iz qolishga vaqt ajrating.
• Odamlarga tabassum qiling va qiyinchilikdagi kishilarga xushmuomalada bo‘ling.
• Har bir narsa ideal bo‘lmasligini eslab turing.
• Sabr qilishni o‘zingizga mashq qiling.
• Har doim o‘zingizni oddiy deb biling, bilim va obro‘ jihatidan boshqalardan pastroq deb qabul qiling.
• Kelajak uchun reja qilib, o‘tmishdan dars olib, bugungi kun bilan yashashni o‘rganing.
• Xudbinlikdan xalos bo‘lib, mashhurlikka intilishni tark qiling.
• Insonlarga rahmli bo‘ling va ayblaringizni tan oling.
• Va eng muhimi, arzimas ishlarga ahamiyat bermang.

Inson uch narsa bilan takomillashadi:
1. Arzimas ishlarga e’tibor bermaslik.
2. Xatolarni kechirish.
3. Zaiflarga rahm-shafqat qilish.

Ma'mur Muxtor tarjimasi

@GiyosiddinYusuf

Bolani nonushtada nima bilan ovqatlantirish kerak?

To‘g‘ri nonushta bolaning kun davomida energiyaga to‘la bo‘lishi va sog‘lom rivojlanishi uchun juda muhim. Quyidagi mahsulotlar bilan nonushta organizmning zaruriy ehtiyojlarini qondiradi:

▪️ Oqsil va kalsiy manbalari.
Qatiq, yogurt, sut va pishloq bolalar uchun kalsiy va oqsil yetkazib beradi, bu suyaklarning o‘sishi va mustahkamlanishi uchun muhim. Nonushta uchun zapekanka, sirnik yoki erkin vareniklar juda mos. Qatiga shakar qo‘shmasdan meva yoki rezavorlar aralashtirish bu taomni yanada foydali va mazali qiladi. Bolaning yoshiga qarab sut mahsulotlari miqdorini nazorat qilish zarur.

▪️ Murakkab uglevodlar bilan boy kashalar.
Suli, grechka yoki tariq kashalari oshqozon-ichak tizimini himoya qiladi va murakkab uglevodlar orqali uzoq vaqt davomida energiya beradi. Shuningdek, ular tarkibidagi B vitaminlari miya va asab tizimi faoliyati uchun foydalidir. Kashalarni yog‘ va shakar bilan haddan ortiq to‘yintirmaslik kerak.

▪️ Tuxum.
Tuxum oqsili oson hazm bo‘lib, bolaning o‘sishi va rivojlanishi uchun zarur. Omlet yoki qaynatilgan tuxumdan tayyorlangan taomlar uzoq vaqt davomida to‘q tutadi. Tuxum tarkibidagi xolin moddasi miya faoliyatini yaxshilaydi. Ammo tuxumni haftasiga 3-4 martadan ortiq iste’mol qilmaslik tavsiya etiladi.

Maslahat: Har bir bolaning ovqatlanishi o'ziga xos bo‘lishi mumkin. Bolaning ehtiyojlarini to‘g‘ri aniqlash va to'g'ri ovqatlanishni tashkillashtirish uchun pediatr bilan maslahat qiling.

#parvarish #tarjima

@GiyosiddinYusuf

Ayolni qadrlash haqida men eshitgan eng kuchli gaplardan biri:

— Ayolimga ozor bermasin deb 20 yildan beri sarimsoqpiyoz yemadim!

#Erkaklar

@GiyosiddinYusuf

Domlalar, ustozlarning foydali videolari keng tarqalgani yaxshi, albatta, lekin buning uchun ularning obro‘lariga, saviyalariga mos bo‘lmagan ishlar qilmaslik kerak deb o‘ylayman. Masalan, "Izohda subhanalloh deb yozib qoldiring" kabi gaplar bilan din dushmanlariga kulgi bo‘ldik!

Ha, subhanalloh deyish savobli amal, lekin domlaning ma’ruzasiga munosabat sifatida yozilmayapti bu so‘z! Subhanalloh ma’ruzalarni keng tarqalishi uchun ishlatiladigan zikr emas, aytiladigan o‘rni boshqa uning!

#Mulohaza

@GiyosiddinYusuf