Elektromobillarni quvvatlantirish stansiyalariga doir muammoli masalalar oʻrganildi, takliflar ishlab chiqiladi

Energetika vazirligida elektromobillarni quvvatlantirish stansiyalarida yuzaga kelayotgan muammoli masalalarni oʻrganishga bagʻishlangan muloqot boʻlib oʻtdi.

Mazkur uchrashuvda Energetika vazirligi xodimlari, Bosh prokuratura, “Oʻzenergoinspeksiya”, Kadastr agentligi, “Hududiy elektr tarmoqlari” AJ, “Yashil energiya” MCHJ va Toshkent shahar hokimligining tegishli mutasaddilari, shuningdek, “Tok Bor”, “Megawatt Energy”, “GreenTE”, “Q.Watt”, “TezTok”, “Mustang Energy”, “Voltauto”, “EBB Charging” hamda “Spectre Energy” kompaniyalari rahbarlari ishtirok etdi.

Ochiq muloqot va qizgʻin bahs-munozaralarga boy tarzda kechgan ushbu anjumanda soʻnggi paytlarda ommaviy axborot vositalari hamda ijtimoiy tarmoqlarda “Toshkentda elektromobillarni quvvatlantirish stansiyalari asossiz oʻchirib qoʻyilmoqda” qabilida tarqalgan turli shov-shuvlarga oydinlik kiritib olindi. Subisteʼmolchi sifatida aholiga xizmat koʻrsatib kelayotgan kompaniyalar oʻzlari duch kelgan muammolar haqida gapirib berishdi. Tegishli mutasaddilarning bu boradagi izohlari tinglandi.

Muloqotda Energetika vazirligi quvvatlash stansiyalarini tarmoqdan uzish boʻyicha topshiriq bermaganligi hamda ekologiyamizni asrashga katta hissa qoʻshadigan elektromobillarni Oʻzbekistonda ommalashtirish tarafdori ekanligi alohida taʼkidlandi. Shu bilan birga, tadbirkorlardan ham energetika sohasiga taalluqli qonunchilik hujjatlarida belgilangan tartiblarga rioya qilib faoliyat yuritishlari soʻraldi.

Uchrashuv yakunida bu kabi muloqotlarni tez-tez oʻtkazib turish gʻoyasi barcha tomonidan maʼqullandi. Tadbirkorlar va soha mutasaddilarining fikr-mulohazalari tinglanib, takliflarni oʻrganib chiqishga kelishildi.

Telegram | Facebook | YouTube | Twitter