Xiyobonlar, bog‘lar va ko‘plab daraxt hamda o‘simliklar o‘sadigan hududlarni buzishni ta'qiqlash jamiyat va atrof-muhit manfaatlarini himoya qilish uchun juda muhim. Bunday joylar aholining dam olishi, toza havo olish va hordiq chiqarishi uchun zarur. Yashil hududlar shaharlarda ekologik muvozanatni saqlab, havoni tozalaydi va iqlimni tartibga soladi. Agar ular xususiy mulkka aylansa, qurilish va tijorat faoliyatlari natijasida tabiatga jiddiy zarar yetishi mumkin.

Agar fuqarolar faollik ko‘rsatmaganida, Anhor bog‘i ham allaqachon vayron bo‘lgan bo‘lar edi. Shuningdek, 2023 yil kuz oylarida, 1950 yilda tashkil etilgan Botanika bog‘ining Fanlar akademiyasi tasarrufidan poytaxt hokimligi tasarrufiga o‘tishiga oz qolgandi. Bu borada ko‘plab faollar norozilik bildirgan. Agar bog‘ hokimiyatga o‘tganida, u olimlar nazoratidagi tabiat hududidan biznes ob’ektiga aylangan, daraxtzor esa allaqachon qurilish maydoniga aylangan bo‘lar edi.

Shu sababli, bunday yashil hududlarni asrab-avaylash va ularni saqlab qolish jamiyatning ekologik farovonligi uchun muhim vazifa hisoblanadi. Fuqarolik pozitsiyasi esa aynan mana shunday kuchga ega – u tabiatni himoya qilish, jamoat manfaatlarini ilgari surish va kelajak avlodlarga yashil muhitni saqlab qolish yo‘lida hal qiluvchi rol o‘ynaydi.