𝗔𝗱𝗮𝗯𝗶𝘆𝗼𝘁 𝗢𝗹𝗮𝗺𝗶

АЁЛ...

Ундан асло ранжиманг,
Сўзласин у, жим деманг,
Аро йўлда қол деманг,
Бағрин тилмасин аёл,
Кўз-ёш тўкмасин аёл!

Бошин урар юмушда,
Нелар бўлмас турмушда,
Файз таратган фаришта,
Таъма қилмайди аёл,
Қадрин билмайди аёл.

Дош бериб синовларга,
Турли хил алдовларга,
Жавобсиз сўровларга.
Умрин бермасин аёл,
Бевақт сўнмасин аёл.

Меҳрга зор колмасин,
Ҳижрон бағрин тилмасин,
Қисмат ўйин қилмасин.
Фарёд солмасин аёл,
Ўйдан толмасин аёл.

Баҳордек порлаб турсин,
Дилга нур сочиб юрсин,
Бахтга қувониб юрсин.
Ўкинч билмасин аёл,
Кўз ёш тўкмасин аёл.

Бўш бешикка кўз тикиб,
Тунлар бедор ёш тўкиб.
Фарзанд сўраб қон ютиб,
Ғавғо солмасин аёл,
Шамдек ёнмасин аёл.

Армонларда қолдирманг,
Хазонларда қолдирманг,
Сарсонларда қолдирманг,
Ғамдан хормасин аёл,
Танҳо қолмасин аёл.

Борлиқ яратган ўша,
Ифор таратган ўша,
Пойига гуллар тўша.
Туғилганингдир мисол,
Онадир - она аёл.

©Абдувоҳид Сувонов
https://t.me/Adabiyot_olami

МУҚАДДАС АЁЛ...

Ошиқларинг пойингга гул отиб ҳам бўлди,
Хилватларда лабингдан бол тотиб ҳам бўлди.
Ва бу ҳақда кимларгадир сотиб ҳам бўлди,
Сен барибир муқаддассан,
Муқаддас аёл!

Аввал: “Кел-ей. Қучоғимга тўл, балқ”, дедилар,
Унамадинг, аёл ўзи терс “халқ” дедилар.
Ичолмагач юз ўгириб, шўр, талх дедилар,
Сен барибир муқаддассан,
Муқаддас аёл!

Сен дарёсан, ўпганини қирғоқ яширар,
Жуфтим бўл,- деб чопганини ҳар тоқ яширар,
Жаннатим,- деб қувонмасдан қумлоқ яширар,
Сен барибир муқаддассан,
Муқаддас аёл!

Асли бу бор эрмакларнинг борар ери Сен,
Росту ёлғон эртакларнинг борар ери Сен,
Асов ўтдай эркакларнинг борар ери Сен,
Сен барибир муқаддассан,
Муқаддас аёл!

Чорлашганда сен келсанг, гоҳ бекор келсанг-да,
Маст даврада бир сарин ел, бир тор келсанг-да,
Хор келсанг-да, номардларга гоҳ хор келсанг-да,
Сен барибир муқаддассан,
Муқаддас аёл!

Қимтинасан, астагина кўтарасан бош,
Минг йилликдир кўзингдаги жовдираган ёш,
Гуноҳкорлар мингу битта Сенга тегар тош,
Сен барибир муқаддассан,
Муқаддас аёл!

Ҳарир, хушбўй баданингда тошлар изи бор,
Кўкрагингда эгилган не бошлар изи бор,
Қуёш изи, куйдирган қуёшлар изи бор,
Сен барибир муқаддассан,
Муқаддас аёл!

© Ҳалима Худойбердиева
https://t.me/Adabiyot_olami

ЎЗБЕК КЕЛАЁТИР...

Яна хаёл узра ташбеҳлар хил-хил,
Бир пайғом васлига талпинар дадил.
Илҳом парисининг хушхабаридан
Сархуш сандуғочдай яйрамоқда дил –
Ўзбек келаётир тарих қаъридан!

Асраб наърасини, янгроқ сасини –
Қадим Хоразмнинг хазинасини,
Икки ярим, уч минг йиллар наридан
Опичлаб Авесто дафинасини,
Ўзбек келаётир тарих қаъридан!

Бир қанот – Алпомиш, бир қанот – Широқ,
Бир ён – Алп Эр Тунга, енгилмас тупроқ.
Ўт олиб мангулик самандаридан,
Тўмарислар қалбин ёритган чироқ –
Ўзбек келаётир тарих қаъридан!

Даҳосининг сонсиз меваси билан,
Самарқанд, Бухоро, Хиваси билан,
Қанча тош битикнинг ўйиқ бағридан,
Шошга тенгдош бўлган шеваси билан,
Ўзбек келаётир тарих қаъридан!

Азалдан заковат нурига ёлчиб,
Зулматларга ирфон ёғдусин сочиб,
Туриб, туну куннинг туташ еридан,
Не-не сайёралар, қитъалар очиб,
Ўзбек келаётир тарих қаъридан!

Чиқариб нурафшон йўлга карвонин,
Бошига кўтариб тенгсиз сарбонин,
Куч олиб истиқлол зафарларидан,
Яна юлдузларга тақаб нарвонин,
Ўзбек келаётир тарих қаъридан!

Йўл бўшат, дилларда музлаган армон!
Йўл бўшат, менсимай хор қилган нодон!
Яна минг йилликнинг тонготаридан,
Йўл бўшат, замона! Йўл бўшат, жаҳон! –
Ўзбек келаётир тарих қаъридан! 

© Акиф Бағир, озар шоири
https://t.me/Adabiyot_olami

РАМАЗОННИ БОЙ БЕРМАЙЛИК РАМАЗОННИ…

Биродарим, шукроналар айтинг бугун,
Дуолар-ла ўтказайлик отган тонгни.
Гуноҳларни мағфиратлар этмоқ учун,
Рамазонни бой бермайлик, рамазонни.

Фаришталар ҳамроҳ бўлсин изингизга,
Парвардигор нурин сочсин дилингизга,
Иймон тиланг ҳам ўғилга, қизингизга,
Рамазонни бой бермайлик, рамазонни.

Гоҳо билмай гуноҳ қилдик ожиз банда,
Туғилгандай покланмоқлик, жисм танда,
Улуғ ойнинг фазилатин ҳар қадамда,
Рамазонни бой бермайлик, рамазонни.

Таровиҳлар ўқилгайдир нурли ойда,
Қуръон тиловати зиёдадир нурли ойда.
У дунё - чун қиёматда берар фойда,
Рамазонни бой бермайлик, рамазонни.

Занжирларга банди бўлгай лаъин шайтон,
Охиратни обод қилмоқ, бизда имкон,
Огоҳликка чорладим-да, эй мусулмон,
Рамазонни бой бермайлик, рамазонни.

Рўза тутинг,
Тангрим берсин сабрингизни,
Малоиклар кўкка элтсин қадрингизни,
Артсинлар юракдаги дардингизни,
Рамазонни бой бермайлик, рамазонни.

Биродарим, шукроналар айтинг бугун,
Лаббайка, деб қарши олинг Ҳақ азонни.
Яратганнинг жаннатига етмоқ учун,
Рамазонни бой бермайлик, рамазонни.

Рамазонни бой бермайлик, рамазонни...

© Абдувоҳид Сувонов
https://t.me/Adabiyot_olami

БИР ХАЁЛ

Табиатда, сирли-сеҳрли,
Кӯп бӯлмади кузатдик кузни.
Қиш келди-яй, бирам меҳрли,
Кӯрсатгиси келар хӯб ӯзни.

Қор ва ёмғир тенгсиз ҳадия,
Изғириндан олдик баҳра, панд.
Алқади эл, ризқу рӯз- дея
Шукр, бугун оппоқ Самарқанд!,

Кетгиси йӯқ негадир қишнинг,
Чӯзилди-ёв хизмат сафари.
Тоби қочар мазаси бӯшнинг
Кутиб фасли баҳор зафарин.

Чимчилайди ҳар куни совуқ,
Жим, тилайди баргини дарахт.
Этик-палто момиқ чирмовуқ,
Келмайсанми, баҳорой барвақт.

Фасл билан қайда ишимиз?
Ахир, уйли, ишли кишимиз.
Бироқ,  ошса қиш ҳам ҳаддидан
Кӯрсатамиз, дир-дир тишимиз.

Бу бир хаёл, нурга ташналик,
Баҳор қалбда очган куртаклар.
Шеъриятга, гулга ошнолик,
Эй, оташин, сирдош юраклар.

Ҳар фаслнинг кези, ӯрни бор,
Борлиқ сӯзин айтади мағур!
Қиш амалда турсада кибор,
Март деяпти календар қурғур.

© Тошпӯлат Ӯрхун
https://t.me/Adabiyot_olami