DOʻPPI

Doʻppi kiymay qoʻydi odamlar,
Bir shoir, bir nosirdan boshqa.
Sochlar silliq,
Silliq qadamlar,
U ogʻirlik qilyapti boshga...
 
Rost doʻppilar,
Yolgʻon doʻppilar,
Kinolarda qolgʻon doʻppilar.
Chust doʻppilar,
Anjon doʻppilar,
Munchoqdek Margʻilon doʻppilar...
 
Doʻppi kiymay qoʻydi odamlar,
Bir shoir, bir nosirdan oʻzga,
Men ham sizga berdim savollar,
Shlyapamni bostirib koʻzga.
 
Doʻppi kiymay qoʻydi odamlar,
Koʻngil esa koʻrmoq tusaydi.
Madaniyat gullagan damlar,
Kallaga eʼtibor susaydi.
 
Doʻppi kiymay qoʻydi odamlar,
Na uyda va na koʻchada.
Mirtemirlar, Gʻafur Gʻulomlar
Yechgan doʻppi qoldi tokchada...
 
Bu qandayin koʻrgulik savdo,
Doʻppi kiymay qoʻydi xaloyiq.
Boshga loyiq doʻppi yoʻqdir yo
Bosh qolmadi doʻppiga loyiq.

© Muhammad Yusuf