Bugungi oliy taʼlim, bu — shunchaki bilim berish jarayoni emas, balki Oʻzbekistonning xalqaro miqyosda kelajakdagi iqtisodiy va intellektual qudratini mustahkamlashning kalitidir. Soʻnggi yetti yil davomida Oʻzbekiston oliy taʼlim tizimi nafaqat respublikada, balki jahon xalqaro taʼlim bozorida raqobatbardosh, globallashuv jarayoniga javob beradigan, kasbiy malakalarni mukammal egallagan kadrlarni yetishtirishga katta eʼtibor qaratmoqda. Bu yoʻlda tinmay islohotlar olib bormoqda. Binobarin, taʼlim sohasiga qaratilgan eʼtibor mamlakatning iqtisodiy-ijtimoiy taraqqiyoti garovidir va Oʻzbekiston oliy taʼlim tizimi aynan shu yoʻlda ildam qadam tashlamoqda. Zero, keng koʻlamli demokratik oʻzgarishlar, jumladan, oliy taʼlim islohotlari orqali mamlakatimizda yangi Uygʻonish davri, yaʼni Uchinchi Renessans poydevori bunyod etilmoqda.