Payg‘ambarimizning (sollallohu alayhi va sallam) rafiqasi Hadicha (roziyallohu anho) savdo-sotiq bilan shug‘ullangan, o‘zining biznesi bo‘lgan.
Bu dalilni ko‘pincha opalar o‘z mehnat qilish va biznes yuritish huquqini asoslash uchun keltirishadi.
Ha, bu haqiqat. Ammo bir muhim jihat bor.
Birinchidan, Hadicha (roziyallohu anho) halol va ma’qul hisoblangan sohada daromad qilgan. To‘g‘riroq aytganda, u bevosita savdo qilmagan, balki yollangan ishchilar orqali tijorat bilan shug‘ullangan. Aynan shu yo‘l orqali u Muhammad (sollallohu alayhi va sallam) bilan tanishgan va keyinchalik unga turmushga chiqqan. Shuning uchun, Hadichaning tajribasini dalil qilib, birovning labini yoki badan qismlarini kattalashtirish, gunohga yetaklaydigan narsalarni sotish yoki obunachi yig‘ish uchun ma’nosiz videolar tayyorlash, keyin esa sahifasida reklamalar orqali daromad qilish – noto‘g‘ri. Hadicha (roziyallohu anho) bunday ishlar bilan shug‘ullanmagan va o‘z erini ham harom ishlarga sherik qilmagan.
Ikkinchidan, u biznes yuritgan va boy bo‘lgan bo‘lsa-da, eri bilan ajrashish haqida o‘ylamagan. Afsuski, bugungi kunda ba’zi musulmon ayollar shaytonning vasvasasi bilan, "Farzandlarim bor, o‘z biznesim bor, o‘z daromadim bor, uyim bor, mashinam bor, endi erning nazorati, paypoqlari va shikoyatlarini nega ko‘tarishim kerak?" degan fikrga borib qolishadi.
Mol-dunyo Hadichani buzmagan va unga "endi erimga ehtiyojim yo‘q" degan fikrni singdirmagan. U eriga "patriarxal tuzum" vakili sifatida qaragan emas. Aksincha, bor imkoniyatini va mol-mulkini eriga bag‘ishlagan. Kim haqiqiy romantik munosabatlar haqida bilmoqchi bo‘lsa, Muhammad (sollallohu alayhi va sallam) va Hadicha (roziyallohu anho) orasidagi munosabatlarni diqqat bilan o‘qisin.
Ba’zilar aytishi mumkin: "Lekin uning eri Payg‘ambar edi – axloqi oliy, chinakam erkak! Bugungi kunning erlari unga tenglashmaydi." To‘g‘ri, lekin siz ham Hadicha emassiz.
Bu gap bilan ayolning ishlashi yoki biznes yuritishiga qarshi chiqilayotgani yo‘q. Gap shundaki, opa-singillarimiz buni diniga va oilasiga zarar yetkazmaydigan tarzda amalga oshirishi kerak. Ular o‘z ish faoliyatida halollik va e’tiqodni ustun qo‘yishi, Alloh ato etgan boylik esa eriga mensimay qarashga sabab bo‘lmasligi lozim.
Kim bo‘lishimizdan qat’i nazar – erkak yoki ayol, boy yoki kambag‘al, uylangan yoki yolg‘iz – biz, avvalo, musulmonmiz. Hayotimizni va o‘zaro munosabatlarimizni shu asosda qurishimiz lozim.
Filadzum
