#asardan_parcha
Saida Zunnunova katta yozuvchi, atoqli shoira bo‘lgani bilan ayolligiga borib Said Ahmad akani qattiq rashk qilar edilar. Bir kuni Said Ahmad aka kiyinib bir joyga borib kelaman, debdilar-da, uydan chiqibdilar. Ko‘ngliga shubha oralagan Saida opa kiyinibdilaru orqama-orqa ketaveribdilar. Buni Said Ahmad aka sezib, Yangiariq mahallasidan to hozirgi Amir Temur xiyobonigacha piyoda ketibdilar. Saida opa hamon kuzatib kelyaptilar. Said Ahmad aka xiyobonga borib, bir oz aylanibdilar, birovni kutgandek soatga qarab-qarab, ortga yana piyoda qaytibdilar. Yangiariq bilan xiyobon orasi taxminan 8 kilometr. O‘rdaga kelganda Saida opa domlaning uyga qaytayotganiga ishonch hosil qilib, taksi yollabdilar.
Said Ahmad aka uyga kelsa, Saida opa divanda behol inqillab yotibdilar.
- Nima bo‘ldi? - dedilar Said Ahmad aka o‘zini bilmaslikka olib.
- Kim biladi, ertalabdan beri ikki tizzam zirqirab og‘rib ko‘z ochirgani qo‘ymayapti. Yurolmayapman, o‘zingiz choy damlab, ichaqoling.
Said Ahmad aka qah-qah urib kuldilar.
- Menga qarang, eringiz ayol kishining ko‘zini o‘ynatadigan husnda tengsiz bo‘lmasa, nimasini rashk qilasiz...
Said Ahmad aka bugungi "sarguzasht"ni atayin qilganini aytganda Saida opa ham og‘riq aralash kulib yubordilar.
©Said Ahmad
"Xandon pista"
