MENİN’ JİGİT WAQTIM, SENİN’ QIZ WAQTIN’
TASHGU desem, da’rhal tu’sedi eske,
Menin’ jigit waqtım, senin’ qız waqtın’ ...
Tuwra samalyottan tu’stim-de keshte,
Jataq jayın’ızdın’ esigin qaqtım.
No’kiste ekenin’de sen meni ku’nde,
Ha’tte saat sayın sag’ınar edin’.
Bul saparı ko’rip meni Tashkentte,
Salqın mıyıq tartıp «senbisen’» dedin’.
Gu’lshanda ashılg’an bir taza gu’ldey,
Shırayın’a shıray qosqan ekensen’.
Quwanıshımdı qa’ytip aytardı bilmey,
Jutınıp, telmirip qaray berdim men …
Kettik qoltıqlasıp ko’sheni boylap,
U’nsiz kiyatırmız. Esnep qoyasan’.
«Janım, aytshı, kiyatırsan’ ne oylap?
Erten’ ushırasamız qay jerde, qashan?».
Zer ko’ylek qoz shashıp janar u’stin’de.
Sen ayttın’: «a’piw et, mazam joq…» dedin’.
Ha’m ma’rmer teksheden sırg’ıp tu’stin’-de,
Kettin’ … Men sen ushın biyga’na edim.
Son’g’ı «Kazbegimdi» tutatıp alıp,
Uzaq tentiredim A’nhar boyına.
Ma’jnun tal shaqasın suwlarg’a malıp,
Senin’ shashların’dı salar oyıma...
TASHGU desem, mudam tu’sedi eske.
Menin’ jigit waqtım senin’ qız waqtın’...
Sag’an endi qaytıp ma’lel bermeske
Bel baylap, janımdı otlarg’a jaqtım.
«Kel» dep shaqıradı ashıq aynalar,
Bag’lar «kel, jigitim qayg’ırma» deser.
Ju’regimdi tırnap jılar «Ta’nawvar»,
Japıraqlardı tintip samallar eser.
Men ha’r barg’an sayın endi Tashkentke,
Sag’an ko’rinbewge tırısar edim.
Bir ku’ni tosattan meni ko’rdin’-de,
«Iras-aq senbisen’, senbisen’?» dedin’.
A’yne sa’ha’r waqta ashılg’an gu’ldey,
Qız bolıp pa’tin’e mingen ekensen’.
Hind qolına tu’sken asırandı pildey,
U’nsiz jetegin’e ere berdim men.
Tawıstay tarang’an Tashkent qızları
Doslıq izzetlerin ko’rsetti mag’an.
Eski doslarımday ku’lisip ba’ri,
Jaydı aldıma studentlik dasturxan ...
TASHGU - bilim bag’ı, jaslar doslıg’ı,
Qansha kewillerge nur berer jaqtın’!
TASHGU - mın’-mın’ qız-jigitler jaslıg’ı,
Menin’ jigit waqtım, senin’ qız waqtın’...
📖
@Qaraqalpaqsha ✅
#IbrayimYusupov
