Yoshlar - kelajagimiz ️️️

Qaytim yo‘qmi, ishonch ham yo‘q!
Jondor tumanidagi 1067 taksi xizmatiga tanqidiy nigoh

Bugungi kunda aholining transport vositalaridan foydalanish darajasi oshgani sari, yo‘lovchi tashish xizmatlarining sifati va halolligi yanada muhim ahamiyat kasb etmoqda. Ayniqsa, "1067" kabi xususiy taksi xizmatlariga bo‘lgan ishonch – mijozga ko‘rsatilayotgan xizmat sifati, odob, va albatta, pul bilan bog‘liq muomalaga bog‘liq.

Afsuski, Jondor tumanida bu xizmatga nisbatan ishonch tobora so‘nmoqda.

Yaqinda ushbu xizmatdan foydalangan bir fuqaroning boshidan o‘tgan holat bunga yaqqol misoldir. Xizmatdan foydalangan taksi narxi 6390 so‘mni tashkil etgan. Mijoz 50 000 so‘m bergan, ammo haydovchi atigi 42 000 so‘m qaytargan. Qolgan 1500 so‘m, haydovchining aytishicha, “qaytim yo‘q” degan bahonaga qurbon bo‘lgan. Holbuki, hozirgi kunda 1000 so‘mlik kupyura muomalada yuribdi. 500 so‘mlik kupyuralarning kamligi tushunarli bo‘lishi mumkin, ammo 1000 so‘mlik pulni "yo‘q" deyish – bu oddiy beparvolik emas, balki iste’molchining haqqiga tajovuzdir.

Bu birinchi holat emas. Ayni shunday vaziyatni boshdan kechirgan fuqarolar ko‘p. Ammo ulardan nechta odam rasmiy shikoyat qiladi? Nechtasi o‘z haqi uchun kurashadi?

Eng achinarlisi, ushbu tizimdagi nosamimiylik va befarqlik mijozlarni bu xizmatdan butunlay sovutmoqda.

Bu yerda gap faqat 1500 so‘mda emas – bu, aslida, xizmat ko‘rsatuvchi tizimga bo‘lgan ishonchda. Bir marta aldangan mijoz endi bu xizmatdan qayta foydalanishga ikkilanadi, hatto boshqa yo‘lovchilarga ham salbiy fikr bildiradi.

Savol tug‘iladi:
Bu holatni kim nazorat qiladi?
Nega haydovchilar mijozni "mayda pul yo‘q" degan oddiy bir jumla bilan aldashi mumkin?

Taksi xizmatini tartibga soluvchi tashkilotlar qayerga qarayapti?
1067 taksi xizmatining o‘zida ham mijozlar bilan ishlash madaniyatini shakllantirishga e’tibor qaratilishi zarur. Agar har bir haydovchi o‘z faoliyatida halollikni ustuvor qo‘ysa, bu nafaqat mijozlar roziligi, balki xizmatning uzoq umr ko‘rishiga xizmat qiladi.

Agar bu kabi holatlarga nisbatan qat’iy chora ko‘rilmasa, ertaga 1500 so‘m emas, balki 5000 so‘m, 10 000 so‘mliklar ham "yo‘q bo‘lib ketishi" hech gap emas. Va nihoyat, puldan ko‘ra muhimroq narsa – xalqning ishonchi bo‘lib qoladi.

Shunday ekan, tegishli tashkilotlar, jumladan, Monopoliyaga qarshi kurashish qo‘mitasi, transport bo‘limlari va iste’molchilar huquqlarini himoya qilish agentligi bu kabi holatlarga befarq bo‘lmasligi kerak. Chunki har bir mijoz, har bir so‘m va har bir ishonch muhim!

@yoshlar_kelajagimiz_buxoro

Yandex: Xizmat Bormi, Mas'uliyat-chi?

Bugungi kunda tezkor ovqat yetkazib berish xizmatlari hayotimizning ajralmas qismiga aylanib ulgurdi. Xususan, Yandex kabi yirik platformalar ko‘pchilikning asosiy tanloviga aylangan. Biroq, bu xizmatning sifatiga oid ko‘plab shikoyatlar mavjud. Shulardan biri – buyurtmalar yetkazilmasligi va to‘lov mablag‘lari qaytarilmasligi.

Shaxsiy tajribam asosida aytishim mumkinki, Yandex xizmati orqali ikki marotaba ovqat buyurtma qildim. Ammo har ikki holatda ham buyurtma bekor qilindi. Eng achinarlisi, xizmat yetkazib bera olmagan ovqat uchun mablag‘im qaytarilmadi. Sabab esa turli xil bahonalar bilan kechiktirish.

Bu holat nafaqat meni, balki ko‘plab foydalanuvchilarni tashvishga solmoqda.

Bu kabi muammolar iste'molchilar huquqlarining buzilishiga olib keladi. Aslida, mijoz o‘z mablag‘lari uchun xizmat yoki mahsulotni olishga haqli. Agar yetkazib berish amalga oshmasa, pul o‘z vaqtida qaytarilishi shart. Aks holda, bu noqonuniy harakat sifatida baholanadi.

Yandex kabi yirik kompaniyalarning mas'uliyatsizligi mijozlarning ishonchini yo‘qotishiga sabab bo‘ladi. Shunday ekan, mijozlar bunday holatlarga nisbatan loqayd bo‘lmay, o‘z huquqlarini talab qilishlari lozim. Agar siz ham shunday muammoga duch kelsangiz, kompaniyaning qo‘llab-quvvatlash xizmatiga murojaat qiling, agar natija bo‘lmasa, iste'molchilar huquqlarini himoya qiluvchi tashkilotlarga murojaat qilishdan tortinmang.

Mijozlar nafaqat pul, balki ishonch ham yo‘qotayotganini Yandex tushunishi kerak. Kompaniya mijozlar manfaatlarini e'tiborga olmasa, bozorga nisbatan ishonch pasayib, raqobatchilar foydasiga ishlashi aniq.

Ha aytgancha, pulim hali hamon qaytarilmadi. 😃