Xayrulla Hamidov official

Шунга ўхшаш кўп янграётган фикрларга менинг-да эътирозларим бор:

Йигитлар Катанецсиз ҳам ўйнай олишини Юсупов КХДР билан ўйиндан кейин беихтиёр "гуллаб" қўйди.

Бирор бир жамоа мураббийсиз ўйнай олади деб ўйламайман. Тўғри, футболчилар фундаментал илмга эга. Лекин бошқарувчи бўлмаса, ҳамма учун аниқ топшириқ берилмаса, майдоннинг ўзида тушунмовчилик бўлади. Катанец Ашурматовни 5-ҳимоячи қилиб туширганида, жамоа буёғига қандай ўйнашини биляпмизу, демакки, Катанец ўйиннинг дирижёри, унинг ишораси билан “музика” туғиляпти. У кимгадир ёқимсиздир, лекин ўша ишорадан сўнг юзага чиқяпти. Яъниким, Ўткир “борини бериш”га урғу қўйишда шу гапни ишлатди деб ўйлайман.
Кейин бизда ғалати тушунча бор: ҳимояга ётаётганимизда, гол ўтказиб юборганимизда мураббий айбдор-да, олдинга ўтсак, ҳаммасини футболчилар қилган бўлади. Йўқ, футбол бу жамоавий ўйин, унда мураббийнинг икки натижада ҳам улуши бор, футболчилар билан тенг камида. Вазиятлар яратилаётган бўлса, шунга мураббий ундаган бўлади, футболчилар кетдик олдинга деб ўзидан ўзи югуриб кетмайди. Ҳужумга ўтаётганда ҳам шу гап.

Хорижлик мураббий кетса, ишсиз қолиши мумкинлигидан қўрқадиган бошқа одам(лар) ва жойини йўқотиш хавфи бор лидерлар ҳақидаги гап ҳам кимнингдир тасаввури деб ўйлайман. ЎФА бу терма жамоаларимизга оид мусобқаларни ўтказиб берадиган ташкилот, ундаги ҳодимлар Катанецдан олдин ҳам ишлашган, кейин ҳам ишини қилаверади, бу мураббийнинг қолиши билан боғлиқ жараён эмас.
Лидерлар ҳақидаги гап янада ғалати. Улар ўзи лидер бўлса, нимасидан қўрқишади? Қайтанга ўртамиёналар қўрқадику одатда. Лидер қўрқса лидер бўлармиди?!

Яна бир машҳур гап: айни пайтда термада рақобат йўқ!

Анчелотти Ла Лигада энг кам футболчи алмаштирадиган мураббий экан. Демакки, бу муносабат натижа келтирувчи ўринда яшашга ҳақли.
Кейин, бировнинг ўрнини кутиб ўтирган ортдаги ўйинчилар тушган пайтларидан фойдаланиб максимал соф рақобатни ушлаб туришаётгани кўп-да сезилмаяпти. Буни нега кўрмаяпмиз?
Мен бир пайтлар ёшлар термасида Жалолиддиновни Аббосдан кўра лидерроқ дегандим. Нима деб ўйлайсиз, турли термаларда асосий таркибда тушиб, кулибгина фақат ўз ишини қилиб юрган Файзуллаев нега бирдан лидер бўволди? Ҳа, уни айни шу рақобат пиширди. Ўзини кўрсатиши кераклигига ундади.

Хуллас, рақобат ташқаридан олиб келинадиган футболчилар билан ҳам, ичкаридаги ўйинчилар билан амалга ошириш мумкин бўлган жараён.

@xayrulla_hamidov

ТЎРТ ОМИЛ

Аслановнинг кўп фикрларига аслида қўшиламан, лекин тарозининг нариги палласига тош босадиган қўшимчаларни ҳам излаб кўрадиган одатим бор. Шунга кўра кўз илғайдиган тўрт омилни келтириб ўтаман:

1. Катанецнинг футбол илми. У кўп услубларни амалда қўллай олади, ҳимояни севса-да, ҳужумга ўтиш фазасида тўғри муносабатда бўлаётганини кўряпмиз. Унинг истеъфосини сўраётганлар ҳам “Катанец футболни чуқур тушунмайди, ҳужум қилишни билмайди”, дейишмаяпти, балки муносабатини ўзгартиришини исташмоқда, холос. Биргина масала шу. Илмсизлик бўлса, бир услубдан бошқасини чиндан-да билмаслик бўлса, бунинг давоси йўқ эди. Ахир, бир даврлар бўлган, бир мураббийимиз тамомий ҳужум қилишни билмаса, бириси ҳимоя деган сўзни тушунмасди. Ҳозир Катанецнинг футбол тушунчалари масаласида ҳеч кимда эътироз кўрмадим. Асосан ҳисобда олдинда бораётганимизда ҳужумкорликдан қайтмаслик, журналистлар билан муомаласи ва шунга ўхшаш мавзулар. Илмсизлик эмас.
Катанец ҳатто вақти келганда ўта таваккалчи ҳам. Бошқа мураббийлар даврига қараганда кўпроқ камбэкка эришгани сабаби ҳам шу туркумдан. Сезяпсизми, ҳисобни ушлашимиз керак ўринда қанчалик хавотирланаётган бўлсак, ҳисобда ортда бораётганимизда умуман қўрқмаяпмиз, қанақадир самовий ишонч пайдо бўлган. Бу ҳолатни олдинги бирор бир мураббий даврида эслай олмайман;

2. Катанец термамиздаги асосий ўзгаришни ҳимоя чизиғида қилганидан келиб чиқсак, чизиқларда баланс юзага келди, ҳатто юлдузлик масаласида ҳам. Ҳа, мураббий бундан кейин ҳам бошқа ўринлардан кўра ҳимоя борасида бош қотираверади, “гол уришни эплайди булар, муҳими гол ўтказмаслигимиз керак” қабилида ишлайверади. Айни шу омил гол уришимиз керак пайтда Б планнинг дарҳол ишлаб кетишига ёрдам беряпти, чоғи;

3. Ўткир Юсуповнинг қутқарувлари ҳақида гапирилса, мураббий бемалол: “бу танлов айнан меники, ҳеч ким унга ишонмаганда ҳам ўйнатавердим, Суперлиганинг энг зўр посбони туриши керак дейилганда ҳам Ўткирга ишонч билдираверган менман” дея олади. Тўғрисиям-да, Ўткирга бошидан буён энг кўп ишонган икки одам бўлса, биттаси Сречкодир, иккинчиси — камина;) Дарвозабонлик соҳасидаги асосий деталлардан бири ҳам шу — ишонч. Юсупов Катанецга сейвлари билан раҳмат деяётгандек;

4. Терма жамоа муҳитининг гўзаллиги ва ЎФАнинг мураббийлар штабига қатъий ён босаётгани. Бу жуда муҳим омиллар. Камдан кам мураббийда бунақа узоқ даврда термамиз эт-тирноқ бўлиб, ўзини оила каби тутганини эслайман. Маҳаллий мураббийларга одатда қандай муомала бўлади, биласиз, шундан келиб чиқсак, Катанец кетса, бугунги ҳолатни йўқотиб қўйишимиз аниқ. Бу иноқликни роса янграётган негативларки буза олмаяптими, робиталар ҳавас қилгули даражада;

Бу “тошлар” қанчалик вазн боса олади, билмадим, лекин бир хил фикрнинг уч хил янграши бўлиб қолган “Футбол плюс”ни анча қиздириб берарди;)

@xayrulla_hamidov