Раббим яқинимсиз!

Мени суйган азал
Дунё бошида
Танлаган, оқлаган
Худо қошида
Азоблар ичида
Кўзим ёшида
Раббим яқинимсиз
Шафқат айлаган!

Гуноҳкор танамда
Гуноҳни кўрмай
Хукм қилмай мени,
Нега ?-деб сўрмай
Қон тўккан мен учун
Нажоткорим-эй
Раббим яқинимсиз
Шафқат айлаган!

Яқиним ким?- деди
Англолмайин ким
Яна ким англолмай
Ўтиб кетди жим
Очдингиз бир куни
Сиздир яқиним!
Раббим яқинимсиз
Шафқат айлаган!

Кимлар келмадилар
Яқинингман деб
Кимлар елмадилар
Яқинингман деб
Ёлғон илтифотин
Кўришсалар эп
Раббим яқинимсиз
Шафқат айлаган!

Сизнинг Севгингизда
Ғубор кўрмадим
Дунёда меҳри чин
Диндор кўрмадим
Сизда на шарт, на бир
Озор кўрмадим
Раббим яқинимсиз
Шафқат айлаган!

Бу буюк Севгингиз,
Садоқатингиз
Менга шифо берди
Жароҳатингиз
Менга Хаёт берди
Иноятингиз
Раббим яқинимсиз
Шафқат айлаган!

Топмадим дунёда
Чин меҳр истаб
Меҳрим берсам, қаҳрим
Чиқарди қистаб
Кимдан нафрат олдим,
Ким қўйди талаб
Раббим яқинимсиз
Шафқат айлаган!

Сиздан миннатдорман,
Худога шараф!
Яшагим келади
Бир Сизга қараб
Шафқатли бўламан,
Пичирлайди лаб:
Раббим яқинимсиз
Шафқат айлаган!

Равшан Хизиров