𝓐𝓶𝓲𝓻𝓪 𝓩𝓾𝓵𝓯𝓲𝓺𝓸𝓻

Қизларингизни аралаш муҳитда бўлишга тўғри келса, дадил бўлишга ўргатинг. Гарчи идеал бўлса-да, қизларимизни бутун умр назорат қилинадиган муҳитда яшашга мажбур қилишнинг имкони бор, деб ўйлаш нореалистик бўлиши мумкин. Шунинг учун, уни овлашга интилаётган акулалар ва тимсоҳлар оламида қандай омон қолишни ўргатинг.

Сохта ниятли овчи эркаклар заиф ва ҳимоясиз қурбонларни излайдилар. Шу боис, доимо эътибор талаб қиладиган, ҳамиша ёрдамга муҳтож бўлган аёл заиф ва осон ўлжа бўлиб кўринади. Жасур, ақлли ва қатъиятли аёллардан эса кўпинча қочадилар. Айтганча, бу таъқибчиларнинг кўпи ақлли эмас, зотан фикрлари фақат аёлни тўшакка қандай олиб киришга қаратилган бўлса, уларнинг ақли, агар бор бўлса, жиддий зиён кўради. Шунинг учун улар ишонтириш бош оғриқни келтириб чиқарадиган аёллардан қочадилар. Кўриб турибсизки, эркак дўстлари кўп бўлган, муаммосини доим эркак билан баҳам кўрадиган, дарсларни эркак тушунтирмагунча тушунмайдиган аёллар осон нишон бўладилар.

Қизларингизга шуни ўргатингки, итоат фақат эрига бўлиши керак, кўчадаги ҳар бир эркакка эмас. Ташқарида у ўзини Аллоҳ яратган қадр-қиммат ва ор-номус билан тутиши керакки, ҳатто эркаклар унга бемаъни гаплар билан яқинлашишдан аввал мулоҳаза билан ўйлаб кўрсин. Бундай аёлларни биз ҳаммамиз университет даврларимиздан эслаймиз. Улар кам бўлса-да, эркакларнинг ҳурматини қозонганлар.

Сиз ўзингизни эркакларга кўз-кўз қилиш обрў ва мавқе келтиради деб ўйларсиз, аммо аслида бу билан қадр-қимматингизни йўқотасиз. Эркак кишига осон мулоқотга киришадиган аёлдан кўра, у билан мулоқот қилиш қийин бўлган аёл кўпроқ қизиқарли кўринади. Шунчалик ноёб ва етиб бўлмас бўлингки, ҳатто эркак киши сиз билан қисқа суҳбатлашишни ҳам ютуғ деб билсин! Аёлларимиз шундай қимматбаҳо ва қадрли бўлишлари керак, бозор растасидаги ҳар ким текшириб кўрадиган арзон мол эмас.

Қизларингизни эркаклардан осонликча чўчимаслик ва уларнинг таъсирига тушиб қолмасликка ўргатинг. Улар сизга ўз жозибаларини ишлатишга уринадилар. Бу ҳийлаларни ўрганинг ва уларга нисбатан иммунитетга эга бўлинг. Ким самимий, ким сохта эканини аниқлашга уринманг. Буни аниқлай олишнинг шунчаки иложи йўқ. Барча калтакесаклар юзтубан ётибди, қайси бирининг қорни оғриётганини билишнинг сира имкони йўқ. Шунчаки, никоҳга етарлича жиддий муносабатда бўлган бирор кишини топгунингизга қадар (тайёр бўлганингизда) барча эркакларга эҳтиёткорлик билан муносабатда бўлинг, сўнгра уни қонуний жараёндан ўтказишга рухсат беринг. Агар энг яхшисини танлаш учун эркаклар билан муносабатга киришишни истасангиз, туйғуларингиз устун келади ва ор-номусингиз ҳамда иффатингизни ҳимоя қилиш учун қурган ҳар қандай тўсиқ кўз олдингизда қулаб тушади.

Аёлларимиз бебаҳо жавоҳирлардир, қизларингизни ҳам шундай бўлишга ўргатинг. Уларни озод қилиш баҳонасида аслида кийимларидан маҳрум этиб, яланғочликларини кўрсатмоқчи бўлган дунёга берилишига йўл қўйманг.

Абу Имрон

Қизлар комил бўлсин дедик баралла,
Ўз-ўзини боқсин бўлмасдан муҳтож.
Яшасин қийналмай қилиб таралла,
Оч қолмаса бўлди ҳамда яланғоч.

Ҳар не илм бўлса, ўргатдик, мана,
Ўргатдик бегона тилда сайрашни.
Қонунлар ҳаётда қилсин тантана –
Ўргатдик тилини қандай қайрашни.

Сочлар турмагию, юзнинг пардози,
Қандай ноз қилмакни, юрмак бехато;
Қўшиқ айтишни ҳам ўйнатиб созни,
Ўргатдик раҳбарлик илмини ҳатто.

Майли, гар қизиқса, овқат пиширсин,
Майли, тикиш тиксин – фитратида бор.
Истаса, Парижни, Лондонни кўрсин,
Эркин фикрласин, қилсин ихтиёр.

Бугун комиладир, олимадир у,
Маҳорат топдию замонага мос,
Эрга садоқатли бўлмоқ илми-ю,
Хотинлик қилишни билмайди, холос.

20. 09. 2024.

©Акром МАЛИК

Шу мўъжаз хонам ва сизларни ғойибона илиқ қучиб қоламан 💕