Uzun tuman Axborot-kutubxona markazi/Elektron adabiyotlar!!!

#tavalludlar

✍Iste’dodli shoira, jozibali nasriy asarlar muallifi Saida Zununova 1926 yilda Andijon shahrida xizmatchi oilasida dunyoga keldi. Otadan erta yetim qolgan Saida 1941–1943 yillarda Andijon pedagogika institutida tahsil oldi, viloyat maktablarida muallima, gazeta tahririyatlarida adabiy xodim bo‘lib ishladi. Saida Zununovaning birinchi she’ri 1945 yili “Paxta fronti” gazetasida bosilgan.
Adabiyotga muhabbat yosh shoirani O‘rta Osiyo Davlat universitetining filologiya fakultetiga yetaklaydi. U o‘qishni tamomlab, “Gulxan” jurnali, “O‘zbekiston madaniyati” gazetasi va Badiiy adabiyot nashriyotida, shuningdek, O‘zbekiston Yozuvchilar uyushmasida maslahatchi bo‘lib xizmat qildi.
Shoiraning yoshlik sururi, Vatan shukuhi va mehnat zavqini tarannum etuvchi “Qizingiz yozdi” (1948), “Yangi she’rlar” (1950), “Gullar vodiysi” (1954), “Qizlarjon”, “Bir yil o‘ylari” (1967) she’riy to‘plamlari kitobxonlar tomonidan katta quvonch bilan qabul qilindi.
Saida Zununova nasrda ham sermahsul ijod etgan adibadir. Uning “Gulbahor” hikoyalar to‘plamida (1956) ishchilar hayoti, oila va muhabbat mavzulari aks etgan bo‘lsa, “Gulxan” (1958) qissasining asosiy qahramoni ayollar bo‘lib, ularning yigirmanchi yillardagi kurashi o‘ziga xos badiiy bo‘yoqlarda ifodalangan. Adiba yozgan “Olov” (1962), “Bo‘ylaringdan o‘rgilay” (1972), “Direktor” kabi asarlarning qahramonlari ham munis ayollardir.
So‘zga xasislik, badiiy siqiqlik, tabiiylik, sun’iy obrazlardan qochish Saida Zununova hikoyalariga xos xususiyatlardir. Ona Vatanga sadoqat, vatanparvarlik, halol mehnat, baxt va muhabbat tuyg‘ularini kuylagan shoiraning lirik she’rlari, jozibador qo‘shiqlari, nasriy asarlari adabiyotimiz xazinasidan munosib joy olgan.
Taniqli yozuvchi Said Ahmadning sevimli rafiqasi bo‘lmish Saida Zununova 1977 yili og‘ir xastalikdan keyin 51 yoshida vafot etgan.
@uzuntumanAKM