Uzdiplomat | Расмий канал

Ислом цивилизацияси марказида қадимий Қуръон нусхалари қандай сақланади?

Ислом цивилизацияси марказига уюштирилган медиа-тур давомида марказ ходими Азим Ғофуров қадимий Қуръон нусхаларини, жумладан, Усмон Мусҳафини янги бинога кўчириш ишлари ҳақида маълумот берди.

"Қуръон залида аждодларимизга тегишли ва бевосита юртимизга боғлиқ бўлган 114 та Қуръон нусхалари олиб келиниб, витриналарда намойиш қилинади. Китобларнинг нусхалари олиб келиниши кўзда тутилган асли эмас. Фондлар ҳам асил нусхани Ўзбекистонни мулки экан деб бериб юборса, нур устига нур лекин асосан уларнинг факсимил нусхалари олиб келинади. Уларга зарар етмайди", — деди у.

Марказда Қуръони карим зали, қўлёзмаларни тиклаш ва рақамлаштириш бўлимлари, 100 мингдан ортиқ тарихий асарларни ўз ичига олган кутубхона ташкил этилиши режалаштирилган. Ҳамма учун марказ очиқ, ҳатто шанба-якшанба кунлари ҳам келиб кўриш мумкин бўлади.

🎥БАТАФСИЛ ВИДЕОДА КЎРИНГ!

Telegram | Instagram |  You Tube | Facebook | X

Ахрор Бурхонов: материал провокацион хусусиятга эга

Ўзбекистон ТИВ матбуот котиби  шовинистик видео ҳақида муносабат берди:

— Албатта, қайси миллатга мансуб бўлишидан қатъий назар, халқимизга қарата айтилаётган бундай гапларни мутлақо қабул қилиб бўлмайди. Ўзбекистон ўз фуқароларининг ҳуқуқлари, шаъни ва қадр-қимматини қаерда бўлишидан қатъий назар доимо ҳимоя қилган ва ҳимоя қилади.

Биз ахборот майдонини мунтазам равишда кузатиб борамиз. Ушбу видео интернетда топилиши биланоқ, Россия томонига дипломатик каналлар орқали зудлик билан мурожаат қилинган. Бундай пайтларда асл манбани топиш ва материалнинг ҳақиқийлигини текшириш жуда муҳимдир.

Табиийки, Россия томони шу заҳотиёқ “Бундай ҳақоратомуз баёнотлар, ким томонидан айтилишидан қатъи назар, чуқур афсусланарлилиги”ни таъкидлади.

Текширувлар натижасида ушбу материал провокацион хусусиятга эга бўлиб, халқларимиз ўртасидаги муносабатларда низо келтириб чиқаришга уринаётган бузғунчи кучлар томонидан тўқиб чиқарилгани маълум бўлди.

Россия томонининг хабар беришича, видеода тилга олинган шахс Россия Федерацияси фуқароси эмас. Ҳозирда Россиянинг расмий ОАВлари ҳам бу борада қатор материалларни эълон қилмоқда.

Яна бир бор барчага ҳар қандай ахборот материалини тарқатишда масъулият билан ёндашиш зарурлигини эслатиб ўтамиз. Тасдиқланмаган манбалардан олинган контентни тарғиб қилишни номақбул деб ҳисоблаймиз, дейилади муносабатда.

Хабарга илова қилинган видео январь ойида тарқалганди ва ўзбек жамоатчилигининг жиддий эътирозларига сабаб бўлган.

Telegram |Instagram |  You Tube | Facebook | X

Ўзбекистоннинг Албаниядаги биринчи элчиси фаолият бошлади

Бахтиёр Ибрагимов Ўзбекистоннинг Албаниядаги биринчи элчиси (қароргоҳи Венада) этиб тайинланди.

У Албания президенти Байрам Бегайга ишонч ёрлиқларини топширди, деб хабар қилмоқда Dunyo ахборот агентлиги.

Бахтиёр Ибрагимов 58 ёшда. Тошкент халқ хўжалиги институтини (ҳозирги Тошкент давлат иқтисодиёт университети) тамомлаган.

1992 йилдан бери ТИВ тизимида ишлайди. Вазирлик марказий аппаратида, шунингдек, Ўзбекистоннинг АҚШ ва Жанубий Кореядаги элчихоналарида турли лавозимларда ишлаган.

Эслатиб ўтамиз, элчи Бахтиёр Ибрагимов 2023 йил ноябрь ойидан бери мамлакатимизнинг Австриядаги элчиси ҳам ҳисобланади.

Бу лавозимга тайинлангунга қадар у Нью-Йорк шаҳрида Ўзбекистоннинг БМТдаги доимий вакили (2017−2023) лавозимида ишлаган.

Telegram | Instagram |  You Tube | Facebook | X

ДХХ мамлакат миқёсида катта тозалаш тадбирларини бошлади

Ўзбекистон Республикаси ДХХ ҳамда ИИВ тузилмалари томонидан жорий йилнинг 27-31 январь кунлари мамлакатимиз миқёсида «Антитеррор-тозалаш» кенг кўламли тадбирлари олиб борилди.

Оғир ва ўта оғир жиноятлар содир этишга мойил, республикадаги криминоген вазиятга салбий таъсир кўрсатувчи 418 нафар шахслар аниқланиб, уларга нисбатан жиноят ишлари қўзғатилди.

Жиноят ишлари доирасида 169 нафар шахслар қамоққа олиниб, 42 та жиноий гуруҳлар фаолиятига чек қўйилди. 399 нафар шахслар маъмурий жавобгарликка тортилиб, уларнинг 270 нафари маъмурий қамоққа олинди. 109 нафар қидирувдаги шахслар ушланди.

Telegram |Instagram |  You Tube | Facebook | X

Фарғонада инспектор бошқарувидаги BYD ва Damas тўқнашувида ўсмир ҳалок бўлди

ЙПХ инспектори жарима майдонига олиб кетилаётган BYD’ни юқори тезликда бошқарган.

Фарғона вилояти ЙҲХБнинг хабар беришича, ҳодиса Олтиариқ туманида 30 январ куни содир бўлган.

Рейд тадбири давомида 2004 йилда туғилган фуқаро М.Ғ. амакиси Ё.Ғ.га тегишли BYD Song машинасини тегишли ҳужжатларсиз бошқарганлиги аниқланган. Ҳолат юзасидан маъмурий баённома расмийлаштирилиб, ЙПХ инспектори Р.Қ. машинани жарима майдончасига олиб кетаётганда 2007 йилда туғилган вояга етмаган Х.Н. бошқарувидаги Damas билан тўқнашган. Damas машинаси боланинг устози А.С.га тегишли бўлган.

Ўсмир Damas’ни иккинчи даражали йўлдан асосий йўлга ҳайдаб чиққан. Асосий йўлдан келаётган BYD Song эса Damas’га келиб урилган.

ЙТҲ оқибатида Damas ҳайдовчиси тан жароҳати олиб, кўрсатилган тиббий муолажаларга қарамасдан шифохонада вафот этди.

Бош прокуратуранинг маълум қилишича, ЙТҲ юзасидан жиноят иши қўзғатилган.

Telegram | Instagram |  You Tube | Facebook | X