Nega yig‘lamaysiz, hali dunyoda,
Armonga ilashiq so‘zlar tirikdir.
Nega yig‘lamaysiz kezib piyoda,
Topganimiz hijron, alam sherikdir.

Nega yig‘lamaysiz, qo‘shiq aytadur
Hamon yuragida sinig‘i borlar.
Nega yig‘lamaysiz, yig‘lar qaydadir
Hali biron kuyni chalmagan torlar.

Nega yig‘lamaysiz, dunyo ko‘rganlar
Ko‘zida hurkaklik namoyon, ziyrak.
Nega yig‘lamaysiz, ketmoqda tinmay,
Hazrati Insonlar, vafo ham siyrak.

Nega yig‘lamaysiz, yurak ta’mirsiz,
Hech kimsa to‘kischa baxtliman demas.
Nega yig‘lamaysiz, axir umrimiz
Oldinga ketmoqda, orqaga emas...

Xayrulla Hamidov