ССВ матбуот котиби| Эмланиш – соғлик кафолати!

Президент Шавкат Мирзиёев тиббиёт муассасаларини жиҳозлаш ва хизматлар сифатини оширишга доир таклифлар тақдимоти билан танишди.
—
Президент Шавкат Мирзиёев ознакомился с презентацией предложений по оснащению медицинских учреждений и повышению качества услуг.

🌐@ssvuz  | 🌐@ssvmatbuotkotibi |🌐 Facebook | 🌐Instagram

🔴 🟦🟦🟦🟦🟦🟦🟦

❓ Гематология маркази дунёнинг қайси етакчи клиникалари билан ҳамкорлик қилмоқда?

✅ Республика ихтисослаштирилган гематология илмий-амалий тиббиёт марказининг ўтган йилдаги фаолияти ҳақида гап кетганда, бу ерда биринчи марта ўта мураккаб юқори технологик амалиёт — аллоген ва гаплоидентифик ўзак ҳужайралар трансплантацияси йўлга қўйилгани ва ушбу операция 30 нафар беморда муваффақиятли амалга оширилганлигини айтиш жоиз.

📌 Бу, албатта, марказда замонавий даволаш усуллари амалиётга самарали татбиқ этилаётгани ва халқаро ҳамкорлик изчил кенгайиб бораётгани билан бевосита боғлиқ.

🟢 Жумладан, ҳамкорлар кўмаги билан бемор ва донорни кросс-матч кўрикдан ўтказиш, сенсибилизациянинг олдини олиш учун шиша колонкали агглютинация технологияси ёрдамида қон гуруҳларини иммуногематологик текшириш, МАСС-спектометрия ва HLA генотиплаш сингари илғор усуллар йўлга қўйилди.

💬 — Марказимиз дунёнинг етакчи клиникалари билан ҳамкорлик қилиб келмоқда, — дейди Республика ихтисослаштирилган гематология илмий-амалий тиббиёт маркази директори Миралишер Исламов. — Бу барча ютуқ ва муваффақиятларимиз омили, десак хато бўлмайди.

⬇️ Асосий ҳамкорларимиз қуйидагилардан иборат:

🟣 Туркия Соғлиқни сақлаш вазирлиги қошидаги онкология ўқув-илмий госпитали;

🟣 Франциянинг Жорж Помпиду университети ҳамда гемостаз ва тромбоз маркази;

🟣 АҚШнинг “Globomikc” LLG компанияси;

🟣 Швейцариянинг Ново-Нордиск гемофилия фонди;

🟣 Санкт-Петербург тиббиёт университети қошидаги Гематолоия, онкология ва трансплантация маркази;

🟣 Москва гематология илмий-текшириш маркази;

🟣 Минск хирургия, трансплантология ва гематология илмий амалий маркази.

🔎 Шунингдек, марказимиз Тинч океани ва Осиё минтақаси мамлакатлари суяк қўмиги трансплантацияси ташкилоти (APBMT) аъзолигига қабул қилинди ва ташкилий қўмитага киритилди.

💬 Ходимларимиз малакасини ошириш ҳам ҳамкорлик алоқаларидаги муҳим йўналиш ҳисобланади. Ўтган йилда ўнлаб мутахассисларимиз АҚШ, Туркия, Россия ва Германиянинг гематология, онкология ва трансплантация марказларида малака ошириб қайтди.

🔬 Жорий йилда ҳам ҳамкорлик алоқаларини мустаҳкамлашга алоҳида эътибор қаратяпмиз. Туркия, Россия ва Жанубий Корея давлатлари мутахассислари билан биргаликда CAR-T ҳужайралар терапияси онкогематология амалиётига татбиқ этилади.

✅ Америкалик шерикларимиз билан эса Ўзбекистонда тиббиёт геномининг миллий стратегияси, сунъий интеллект борасидаги ишларни жадаллаштириш ҳаракатидамиз.

‼️ Умуман, бундан кейин ҳам халқаро алоқаларни кенгайтириб боришга устувор даражада эътибор қаратамиз. Зеро, бу пировард натижада марказ фаолиятини янада ривожланиш орқали аҳолимизга кўрсатилаётган тиббий хизматлар сифатини халқаро андозалар даражасига кўтаришга замин яратади.

Соғлиқни сақлаш вазирлиги
Матбуот хизмати.

🌐@ssvuz | 🌐@ssvmatbuotkotibi |🌐 Facebook | 🌐Instagram

❗️Мутахассис: Сурункали уйқусизлик эндокрин ва юрак-қон томир касалликлари ривожланиш хавфини оширади

🥱 Бугунги тезкор ахборот асрида аксарият инсонлар сурункали уйқусизликдан азият чекмоқда. Доимий стресс, маълумотларнинг ҳаддан ортиқ кўплиги одамларнинг ушбу муаммо билан кўпроқ рўбарў келишига сабаб бўляпти.

❓Хўш, бу ҳолат саломатлик учун қанчалик хавфли? Ундан халос бўлишда нималарга риоя қилиш керак?

👨‍⚕️Мазкур саволларга Миллий тиббиёт маркази директори ўринбосари Акмал Раҳматуллаев жавоб берди.

🩺 — Уйқу – инсон соғлигида муҳим ўрин тутади, — дейди мутахассис. — Сабаби одам ухлаганда мушаклар тонуси ва артериал қон босими пасайиб, юрак уриши, тўқималарга қон келиши ҳамда танадаги моддалар алмашинуви секинлашади. Натижада нафақат мия, балки барча тана аъзолари “дам” олади.

🟢 Афсуски, бугун кўпчилик билан суҳбатлашсангиз, яхши ухлолмаётганидан, айримлар эса сурункали уйқу келмаслигидан шикоят қилади.

🛏 Бунга эса жуда кўп омиллар сабаб бўлиши мумкин. Жумладан, асаблар зўриқиши, тунда ишлаш, оғир меҳнат шароити, стимулловчи дори препаратларини қабул қилиш, травматик вазиятлар, ноқулай ўрин-ёстиқлар, спиртли ва мунтазам кофеинли ичимликлар ичиш ҳамда тамаки чекиш каби ҳолатлар доимий уйқусизликни келтириб чиқариш хавфи юқори.

☹️ Қолаверса, бу муаммо кучли руҳий ва эмоционал шикастланишлар, невроз, хавотирланиш, бош мия касалликлари (айниқса, мия қон томирлари атеросклерози), ички аъзолар ва эндокрин безлар (буйрак, жигар, қалқонсимон без) хасталиклари билан боғлиқ нерв тизимининг функционал бузилишларида ҳам учрайди.

🫀Сурункали уйқусизлик оқибатида организмда турли эндокрин, юрак-қон томир ва овқат ҳазм қилиш тизими касалликлари ҳамда асаб ва руҳий хасталиклар ривожланиш хавфи ортади.

🔬 Агар мазкур ҳолат мунтазам безовта қилса, албатта, шифокорга мурожаат қилиш лозим.

🏃 Муаммодан халос бўлиш учун соғлом турмуш-тарзига риоя қилиш, спорт билан мунтазам шуғулланиш тавсия этилади. Бироқ уларни ухлаш олдидан бажармаслик керак.

☕️ Шунингдек, куннинг иккинчи ярмида таркибида кофеин бўлган ҳар қандай маҳсулотни истеъмол қилиш, ухлашдан аввал қаҳва ёки аччиқ чой ичиш мумкин эмас. Аксинча, ётишдан 5-10 дақиқа олдин тинчлантирувчи машқлар бажариш, сокин мусиқа тинглаш ва илиқ ванна қабул қилиш мақсадга мувофиқ.

‼️ Агар шифокор кўрсатмаси бўлмаса, зинҳор ухлатувчи дориларни қабул қилиш керак эмас.

Соғлиқни сақлаш вазирлиги
Матбуот хизмати.

🌐@ssvuz | 🌐@ssvmatbuotkotibi |🌐 Facebook | 🌐Instagram

❗️Кўз микрохирургияси: Янги симуляцион марказда йилига 300 нафар маҳаллий ва хорижлик мутахассис малака оширади

🟣 Мамлакатимизда авваллари офтальмология соҳаси бўйича юқори технологик жарроҳлик амалиётларини ўтказиш ҳақида гап кетганда “бунинг имкони йўқ” дер эдик.

📍 Бироқ сўнгги йилларда тизимда кечаётган янгиланишлар туфайли эндиликда кўплаб ноёб операцияларни нафақат пойтахт, балки юртимизнинг энг олис ҳудудларида ҳам муваффақиятли бажариш имкони яратилмоқда.

✅ Айниқса, Республика ихтисослаштирилган кўз микрохирургияси илмий-амалий тиббиёт маркази ва филиалларининг илғор халқаро даволаш стандартларини амалиётга жорий этиш борасидаги ўрни салмоқли.

💬 — Ўтган йил нафақат марказ, балки филиалларимиз фаолиятида ҳам кўплаб янгиликлар кузатилди, — дейди муассаса директори Азамат Юсупов. — Жойларда 15 дан ортиқ янги даволаш ва ташхислаш усуллари амалиётга татбиқ қилинди.

➡️ Жумладан, Қашқадарё вилоятида асоратли ҳолатларда катаракта факоэмульсификацияси ва интраокуляр линзани склерага тикиш, Сурхондарёда тўр парда касалликларида витрэктомия амалиёти, Навоийда шох парда астигматизми мавжуд беморларда ТORIC IOLни ҳисоблаш ва глаукома хасталигида микроимпульсли транссклерал циклофотокоагуляцияси, Қорақалпоғистон Республикасида тракцион тўр парда кўчишида витрэктомия, Бухорода эса кератотопография каби кўплаб ноёб жарроҳлик операциялари йўлга қўйилди.

🔎 Шунингдек, илгари фақат марказнинг ўзида бажарилган катаракта факоэмульсификацияси, птеригиумэктомия пластика ва дакриоцисториностомия каби юқори технологик амалиётлар Ургут ва Боёвут туман тиббиёт бирлашмалари кўз касалликлари бўлимларида илк бор амалга оширилди.

🔬 Эътиборлиси, янги турдаги диагностика ва ташхис усулларининг вилоятлар, туман ва шаҳарлар даражасида йўлга қўйилиши, ҳудудларда маҳаллий шифокорлар билан биргаликда қўшма операциялар ўтказилиши ҳамда телемедицина натижасида марказга беморлар мурожаатлари сони ундан аввалги йилга нисбатан 2 баробарга камайди.

✔️ Мутахассисларнинг билим ва малакасини ошириш мақсадида бугунги кунда муассаса турли хорижий клиникалар, университетлар ва тиббиёт марказлари билан фаол ҳамкорлик қилиб келмоқда.

📍 Хусусан, ўтган йили Ўзбекистон, Қозоғистон, Туркманистон, Тожикистон ва Қирғизистон бош офтальмологлари томонидан Марказий Осиё глаукоматологлар Алянси ташкил қилиниб, ўзаро ҳамкорлик юзасидан келишувга эришилди.

✍️ Йил давомида АҚШнинг “Lions World Vision Institute” нотижорат кўз банки, Taмпa шаҳрининг офтальмологик илмий-тадқиқот институти ҳамда Россиянинг Гельмгольц номидаги кўз касалликлари миллий тиббий тадқиқотлари маркази, М.М. Краснов номидаги кўз касалликлари илмий-тадқиқот институти билан жами 7 та халқаро меморандум имзоланди.

♾ Давлатимиз раҳбари топшириғига биноан, 2024 йил муассасага Германия тараққиёт банки (KfW банки) грант маблағлари ҳисобидан 5 та Easy Eye виртуал симулятори, 4 та операцион микроскоп ва 4 та факоэмулсификатор ускунаси ўрнатилиб, Марказий Осиё давлат муассасалари орасида биринчи бўлиб, симуляцион марказ ташкил этилди. Натижада бу ерда йилига 300 нафар маҳаллий ва хорижий мутахассислар малака ошириш имконияти яратилди.

‼️ 2025 йил ҳудудий филиалларда 4 та ташхислаш ва 13 та даволаш усулларини жорий қилиш, ёш мутахассисларнинг хориждаги етакчи тиббиёт марказларида малакасини ошириш ҳамда чет эллик шифокорлар билан ҳамкорликда жойларда қўшма жарроҳлик амалиётларини ўтказиш режалаштирилмоқда.

Соғлиқни сақлаш вазирлиги
Матбуот хизмати.

🌐@ssvuz | 🌐@ssvmatbuotkotibi |🌐 Facebook | 🌐Instagram

🔴 🟦🟦🟦

❗️Республика эндокринология маркази кўмагида ҳудудларда ноёб жарроҳлик амалиётлари йўлга қўйилади

✅ Ўтган йил Республика ихтисослаштирилган эндокринология илмий-амалий маркази жамоаси учун сермаҳсул кечди, десак муболаға бўлмайди. Буни турли йўналишлар бўйича қўлга киритилган натижалар ҳам тасдиқлаб турибди.

📊 Мисол тариқасида марказда 59, вилоятларда 132, туман шифохоналарида 4 турдаги янги даволаш ва диагностика усуллари ҳаётга татбиқ этилганлигини келтириш мумкин.

📌 Шу сингари ютуқлар эътирофи сифатида мазкур муассасага ISO 9001:2015, ISO 7101:2023 халқаро сифат стандартларини жорий этганлиги муносабати билан махсус сертификатлар топширилди.

💬 — Кўрилган чора-тадбирлар натижасида ўтган йилда ҳудудлардан бизга мурожаат қилган аҳоли сони 2 баробар камайишига эришилди, — дейди мазкур муассаса директори Анвар Алимов. — Эндиликда ана шу натижаларимизни яхшилаш учун ихтисослашган тиббий хизматни аҳолига янада яқинлаштириш, касалликлар профилактикаси ва уларни эрта аниқлаш, мақсадли скринингни амалга ошириш, мутахассислар илмий салоҳиятини юксалтириш ҳамда соҳага инновацион технологияларни жалб этиш билан боғлиқ вазифаларни белгилаб олганмиз.

1️⃣ Биринчидан, туман (шаҳар) шифохоналарида авваллари ўтказилмаган 6 та янги диагностика ва даволаш усули жорий қилинади.

🔬 Маҳаллий жарроҳлар билан биргаликда 16 та туман ва шаҳарда қандли диабетнинг йирингли асоратлари, қалқонсимон без ҳамда липосакция бўйича жарроҳлик амалиётларини йўлга қўямиз.

📈 Ҳудудий филиалларимизда янги 8 та диагностика ва даволаш усули ўзлаштирилади.

2️⃣ Иккинчидан, туман тиббиёт бирлашмаларининг ходимлари марказда ўз билимларини оширса, филиалларнинг 14 нафар ва марказнинг 8 нафар мутахассиси чет давлатлардаги нуфузли клиникаларда малака оширади. Қолаверса, 335 нафар туман эндокринологи учун махсус ўқув курслари ўтказилади.

3️⃣ Учинчидан, ихтисослашган тиббий ёрдам хизматини такомиллаштириш мақсадида ҳар бир вилоятдан 2 тадан, жами 28 та туман ва шаҳарлар намунавий ҳудудга айлантирилади.

🟢 Тажриба алмашиш, маҳорат дарслари ўтказиш, янги технологияларни жорий қилиш ва ҳудудларда тиббий кўриклар ҳамда операцияларни амалга ошириш учун Россия, Туркия, Буюк Британия ва Германиядан 10 нафар мутахассисни жалб қилмоқчимиз.

4️⃣ Тўртинчидан, Германия ва Россия Федерацияси тегишли дастури асосида жами 208 та туман тиббиёт муассасасида "Қандли диабет 2 тур беморларни терапевтик ўқитиш бўйича миллий мактаби" фаолияти йўлга қўйилади.

5️⃣ Бешинчидан, ўзаро ҳамкорликда 40 ёшдан юқори аҳоли орасида қандли диабет ҳамда диабет олди ҳолатини эрта аниқлаш скрининги амалга оширилади ҳамда шу касаллик аниқланган беморларнинг диспансер назорати олиб борилади.

6️⃣ Олтинчидан, марказимизга жалб этиладиган чет эллик беморлар сонини 2 марта, ҳудудларда эса 2 карра кўпайтиришни мақсад қилганмиз.

7️⃣ Еттинчидан, рақамли ва инновацион технологиялар, телемедицина ҳамда масофавий маслаҳат дастурларига алоҳида эътибор қаратилади.

‼️ Бу залварли вазифаларни бажаришга марказ жамоасининг салоҳияти ҳам, техник имкониятлари ҳам етарли.

Соғлиқни сақлаш вазирлиги
Матбуот хизмати.

🌐@ssvuz | 🌐@ssvmatbuotkotibi |🌐 Facebook | 🌐Instagram

🔴 🟦🟦🟦

❗️Травматология ва ортопедия: Мураккаб жарроҳлик операциялари туманлар даражасида ўтказилмоқда

✅ Ихтисослашган тиббий хизмат халққа яқинлашмоқда. Бир пайтлар энг илғор хорижий мамлакатлар клиникалари, кейинчалик пойтахтда бажарилган юқори технологик амалиётлар эндиликда ҳудудларда ҳам босқичма-босқич жорий этиляпти.

🩺 Бу борада травматология ва ортопедия соҳасида эришилаётган ютуқлар ҳам салмоқли.

💬 — Ўтган йил давомида муассасамизнинг ҳудудий филиаллари орқали 6 минг нафардан зиёд беморларга тиббий ёрдам кўрсатилди, 350 дан зиёд операциялар ўтказилди, — дейди Республика ихтисослаштирилган травматология ва ортопедия илмий-амалий тиббиёт маркази директори Мурод Ирисметов.

📊 — Вилоятларда 22 турдаги, туман шифохоналарида 5 турдаги янги даволаш ва диагностика усуллари амалиётга татбиқ этилди. Натижада 2024 йилда марказимизга тўғридан-тўғри мурожаатлар сони 2 баробар камайди.

✅ Шунингдек, фақат муассасамизда бажариб келинган суяклар туннелизацияси ва тромбоцитлар билан бойитилган плазма юбориш, тизза бўғими диагностик артроскопияси, медиал менискэктомия, туғма маймоқликда перкутан ахиллотомия, ахиллопластика ва пайлар транспозицияси, чаноқ-сон ва тизза бўғимларини тотал эндопротезлаш каби қатор юқори технологик амалиётлар илк бор туман (шаҳар)лар даражасида бажарилди.

🔎 Бирламчи тизимда болаларда сон туғма чиқиши ва дисплазиясини эрта аниқлаш ва даволаш тизимини жорий этиш мақсадида жойларда сайёр ўқувлар ва маҳорат дарслари ташкил этилди.

🔬 Бундан ташқари, Нукус шаҳрида бўлиб ўтган Ўзбекистон травматолог-ортопедларининг илмий-амалий анжумани доирасида Қорақалпоғистон Республикаси кўп тармоқли тиббиёт марказида ортопедик нуқсони бўлган 58 нафар оғир беморда хорижий мутахассислар иштирокида мураккаб жарроҳлик операциялари бажарилди.

🖥 Телетиббиёт йўналишида ҳам салмоқли натижаларга эришяпмиз. Жумладан, ўтган йили ҳудудлар билан худди шу усулда 191 та тиббий маслаҳат, 42 та консилиум ва 62 та намойиш амалиётлари ўтказилди.

🟣 Бу орқали кўплаб беморларга яшаш жойининг ўзида туриб малакали ихтисослаштирилган тиббий хизматдан самарали фойдаланиш ва саломатлигини тиклаш имконияти яратилди.

‼️ Жорий йилда бу йўналишдаги амалий чора-тадбирлар кўламини янада кенгайтиришни режалаштирганмиз.

Соғлиқни сақлаш вазирлиги
Матбуот хизмати.

🌐@ssvuz | 🌐@ssvmatbuotkotibi |🌐 Facebook | 🌐Instagram

🔴 🟦🟦🟦

❗️ССВ: Республика урология марказида ўтган йил 3 минг 700 га яқин юқори технологик операциялар ўтказилди

✅ Республика ихтисослаштирилган урология илмий-амалий тиббиёт маркази 2024 йилни салмоқли натижалар билан якунлади. Жумладан, бу ерда бир қатор ноёб жарроҳлик амалиётлари йўлга қўйилди.

🔬 Спонгиоз танани кесмасдан анастомотик уретропластикалаш, пешоб найчаси лапароскопик буккал пластикаси ҳамда пешоб найчасини лапароскопик ичак сегменти билан алмаштириш сингари юқори технологик мураккаб жарроҳлик амалиётлари шулар жумласидан.

⬇️ Бу операцияларнинг ноёблиги ва мураккаблиги ҳақида тўла тасаввурга эга бўлиш учун улардан бири хусусида кенгроқ тўхталиш жоиз.

🩺 Сурхондарёлик 28 ёшли бемор пешоб чиқаришдаги қийинчилик шикояти билан мурожаат қилган эди. Текширувдан сўнг унга пешоб чиқариш канали торайиши ташхиси қўйилди. Кейин спонгиоз танани кесмасдан уретропластика амалиёти ўтказилди. Бундай ёндашув интраоперацион қон кетиши ва нервлар шикастланишини камайтириши билан аҳамиятлидир.

📌 Умуман, ўтган йил давомида муассасада 5 та янги диагностик ва 2 та даволаш амалиёти жорий этилди.

💬 — Йил давомида марказимизда 7 мингга яқин опрерациялар бажарилгани ҳамда шундан 3665 таси юқори технологик амалиёт эканлигини алоҳида айтиб ўтмоқчимиз, — дейди мазкур муассаса директори Шуҳрат Мухтаров. — Айни чоғда марказнинг моддий техник базасини яхшилаш ҳам доимий эътиборимизда. Масалан, ўтган йил охирида Қувайтнинг Араб иқтисодий ривожланиш фонди маблағлари ҳисобига 20 турдаги ташхис қўйиш ва даволаш амалиётлари учун фойдаланиладиган асбоб-ускуналар олиб келинди.

🛬 Фаолиятимиз ривожида халқаро ҳамкорлик муҳим аҳамият касб этмоқда. Йил давомида 31 нафар ходимимиз АҚШ, Россия, Австрия, Германия, Нидерландия, БАА, Япония, Хитой, Жанубий Корея ва Франция каби давлатларнинг етакчи клиникаларида малака ошириб қайтди.

📍 Ҳамкор давлатлар мутахассислари билан биргаликда қатор ноёб жарроҳлик амалиётлари ҳам ўтказдик. Мисол учун, Москва давлат тиббиёт университети профессори Е.В. Шпоть иштирокида марказ ҳамда унинг Бухоро ва Фарғона ҳудудий филиалларида лапароскопик простатэктомия, лапароскопик цистэктомия, лапароскопик илеоцистопластика, лапароскопик аденомэктомия, лапароскопик парциал нефрэктомия каби ноёб операциялар бажарилди.

📈 Ҳудудий филиалларни ҳар жиҳатдан ривожлантириш ва шу орқали тиббиётни халққа янада яқинлаштиришга ҳам катта эътибор қаратилмоқда. Натижада йил давомида жойларда 18 мингдан зиёд турли операциялар ўтказилди. Шундан қарийб 5700 таси юқори технологик жарроҳлик амалиётларидир.

🟣 Яна бир гап. Янги турдаги диагностика усулларининг вилоятлар, туман ва шаҳарларда йўлга қўйилиши, ҳудудларда маҳаллий шифокорлар билан биргаликда қўшма операциялар ўтказилиши ҳамда телемедицина натижасида ўтган йили марказимизга жойлардан мурожаат қилган беморлар сони олдинги йиллардагига нисбатан сезиларли даражада камайишига эришилди.

‼️ Республика ихтисослаштирилган урология илмий-амалий тиббиёт маркази жамоаси жорий йилда натижаларни янада яхшилашни мақсад қилган.

Соғлиқни сақлаш вазирлиги
Матбуот хизмати.

🌐@ssvuz | 🌐@ssvmatbuotkotibi |🌐 Facebook | 🌐Instagram

⚡️ ТАЙИНЛОВ

✅ Соғлиқни сақлаш вазирлигининг тегишли буйруғи билан Асамутдинов Жалолиддин Шарафутдинович Тиббиёт ташкилотларини лицензиялаш ва аккредитациялаш маркази директори этиб тайинланди.

➡️ Ж. Асамутдинов 2005 йил Мирзо Улуғбек номидаги Ўзбекистон миллий университетининг бакалавриат, 2008 йил магистратура босқичини тамомлаган.

🔎 Турли йилларда “Tashkent Healthcare” МЧЖ раҳбари, “Ask Doctor” МЧЖ директори, Соғлиқни сақлаш вазирлигининг Лизензиялаш, аккредитациялаш ва тиббий туризмни ривожлантириш бошқармаси ҳамда Давлат-хусусий шериклик, тиббий туризм ва хусусий секторни ривожлантириш бошқармаси бошлиғи каби масъул лавозимларда ишлаган.

📌 Янги раҳбар зиммасига тиббиёт ташкилотларини лицензиялаш ва аккредитациядан ўтказишда илғор халқаро тажрибага асосланган талабларни ишлаб чиқиш, ушбу тизимни янада такомиллаштириш, халқаро аккредитация ташкилотларини жалб қилиш орқали маҳаллий тиббий хизматлар сифатини янада ошириш билан боғлиқ қатор вазифалар юкланди.

Соғлиқни сақлаш вазирлиги
Матбуот хизмати.

🌐@ssvuz | 🌐@ssvmatbuotkotibi |🌐 Facebook | 🌐Instagram

🔴 Беғараз донорлик

❓ Ўтган йили юртимизда қанча сифатли қон тайёрланди?

✅ Донорлик — эзгу ва савобли амал. Беғараз қон топшириш — одамийликнинг олий намунаси. Донорлар ана шундай инсонлар бўлиб, улар туфайли ҳар куни минглаб беморлар ҳаёти сақлаб қолинади.

📌 Айниқса, мураккаб трансплантация амалиёти ўтказиладиган, онкологик, гематологик касалликларга чалинган ва бахтсиз ҳодиса туфайли оғир тан жароҳати олган беморлар учун қон муҳим восита саналади.

🔎 Қайд этиш керак, бугун юртимизда соҳа муассасалари фаолиятини такомиллаштириш, уларнинг моддий-техник базасини мустаҳкамлаш, аҳоли орасида беғараз донорлик ҳаракатини ривожлантиришга катта эътибор қаратилмоқда.

📊 Ҳозирги пайтда бу йўналишда Республика қон қуйиш маркази, Тошкент шаҳар “Қон препаратлари” илмий ишлаб чиқариш корхонаси, 13 та ҳудудий ва 2 та республика тасарруфидаги қон қуйиш станцияси ҳамда 13 та қон қуйиш бўлимлари самарали фаолият юритяпти.

🟢 Мақсад — даволаш муассасаларини керакли қон препаратлари ва компонентлари билан таъминлаш, жамиятда донорлик маданиятини шакллантиришдан иборат.

➡️ Жаҳон соғлиқни сақлаш ташкилоти тавсиясига кўра, ҳар бир давлат ўз аҳолисининг қон компонентлари ва препаратларига бўлган эҳтиёжини қоплаш учун 1000 нафар кишига қон топширишлар сони 30 нафар ва ундан ортиқ бўлиши, сифатли қон билан таъминлаш учун эса донорлар сони 1000 нафар кишига 10 нафар ёки аҳоли сонига нисбатан 1 фоизни ташкил этиши лозим. Бизда эса бу рақам 8 нафарга тўғри келади. Агар ушбу кўрсаткич 10 нафарга ортса, 100 фоиз талаб қондирилади.

📈 Юртимизда донорлик ҳаракати оммалашиши натижасида мамлакатимизда 2022 йил 122 тонна, 2023 йил 134 тонна, ўтган 2024 йилда эса 147 тонна сифатли қон тайёрланди.

✅ Мамлакатимизда 18 ёшдан 60 ёшгача бўлган, вазни 50 килограммдан юқори, гемоглабин миқдори эркакларда 128, аёлларда эса 120 бўлган ҳар бир шахс донор бўлиши мумкин. Йилига эса ҳар бир шахс 4 марта қон топшириш имконига эга. Ҳар бир топширилган қоннинг максимал миқдори 450 миллилитрдан иборат.

📋 Айтиш лозимки, мамлакатимизда беғараз қон топширувчи шахслар бир қанча ҳуқуқ, имтиёз ва кафолатларга эга бўлиб, бу борада қонунчилик янада такомиллаштирилмоқда.

✍️ Хусусан, куни кеча Олий Мажлис Қонунчилик палатасининг навбатдаги мажлисида депутатлар томонидан Ўзбекистонда донорлик ҳаракатини қўллаб-қувватлаш тизимини янада ривожлантиришга қаратилган қонун лойиҳаси биринчи ўқишда концептуал жиҳатдан кўриб чиқилди.

🟣 Мазкур қонун лойиҳаси билан “Ўзбекистон Республикаси фахрий донори” кўкрак нишони билан тақдирланган шахсларга улар учун қулай бўлган вақтда ҳар йилги меҳнат таътилига чиқиш, шаҳар жамоат транспортининг барча турларидан (йўналиши ва йўналишсиз таксилардан ташқари) бепул фойдаланиш ҳуқуқини бериш назарда тутилмоқда. Шунингдек, санаторий-курортларда даволаниш учун йўлланмаларни навбатсиз олиш ҳуқуқи бериляпти.

‼️ Шу ўринда Соғлиқни сақлаш вазирлиги юртдошларимизни беғараз донор бўлишга ҳамда ёрдамга муҳтож беморларга кўмак беришга чақиради.

Соғлиқни сақлаш вазирлиги
Матбуот хизмати.

🌐@ssvuz | 🌐@ssvmatbuotkotibi |🌐 Facebook | 🌐Instagram

⚡️ ТАЙИНЛОВ

✅ Соғлиқни сақлаш вазирлигининг тегишли буйруғи билан ҳудудларда қатор тайинловлар амалга оширилди.

⬇️ Хусусан:

➡️ Алимбетов Байрамбек Нагметович Қорақалпоғистон Республикаси соғлиқни сақлаш вазирининг молия-иқтисод ва инвестиция бўйича ўринбосари этиб тайинланди.

📌 Б. Алимбетов 1999 йилда Қорақалпоқ давлат университетини тамомлаган.

🔎 Турли йилларда Нукус тумани қишлоқ ва сув хўжалиги бўлими бош ҳисобчиси, Қорақалпоғистон Республикаси Ғазначилик бошқармасининг Нукус тумани бўйича гуруҳ бошлиғи ўринбосари, Нукус шаҳри бўйича ғазначилик бўлими бошлиғи ўринбосари, Нукус тумани ғазначилик хизмати бўлими бошлиғи каби масъул лавозимларда ишлаган.

❗️ Б. Алимбетов тайинловга қадар Нукус тумани ҳокимининг молия-иқтисодиёт ва камбағалликни қисқартириш масалалари бўйича биринчи ўринбосари – иқтисодий ривожлантириш ва камбағалликни қисқартириш бўлими бошлиғи сифатида фаолият кўрсатиб келаётган эди.

* * *
➡️ Қодиров Баҳодиржон Исмоилович Андижон вилояти соғлиқни сақлаш бошқармаси бошлиғининг молия-иқтисод ва инвестиция бўйича ўринбосари лавозимига тайинланди.

📌 Б. Қодиров 2008 йилда Андижон қишлоқ хўжалиги ва агротехнологиялар институтини тамомлаган.

🔎 Турли йилларда вилоят эндокрин касалликлар диспансери, вилоят соғлиқни сақлаш бошқармаси, Андижон шаҳар кўп тармоқли марказий шифохонасида бош ҳисобчи, вилоят Давлат молиявий назорати бошқармасида бўлим бошлиғи ўринбосари, бўлим бошлиғи каби масъул вазифаларда ишлаган.

❗️Б. Қодиров тайинловга қадар Иқтисодиёт ва молия вазирлиги ҳузуридаги Давлат молиявий назорати инспекцияси Андижон вилояти бошқармаси бошлиғи ўринбосари лавозимида фаолият кўрсатиб келаётган эди.

Соғлиқни сақлаш вазирлиги
Матбуот хизмати.

🌐@ssvuz | 🌐@ssvmatbuotkotibi |🌐 Facebook | 🌐Instagram