SHÓRCHI 24 | Расмий канал 🔹

⚡️ O‘zbekistonda eng kam oylikni o‘qituvchi va shifokorlar olmoqda

2024 yilda O‘zbekistonda o‘rtacha nominal (soliq va boshqa to‘lovlarni o‘zi ichiga olgan) oylik ish haqi 5 mln 357 ming so‘mni tashkil etdi (2023 yilda 4 mln 562 ming so‘m bo‘lgan). Hisob-kitoblarda qishloq xo‘jaligi va kichik tadbirkorlik subyektlari ish haqlari inobatga olinmagan. Aks holda bu raqamlar sezilarli pasayishi mumkin edi.

“Fermer xo‘jaliklari hamda kichik tadbirkorlik subyektlari yilda bir marta hisobot taqdim etishi belgilangan”, deya hisobotga izoh beradi agentlik.

O‘tgan yil yanvar—dekabr oylarida hududlar bo‘yicha o‘rtacha oylik ish haqining eng yuqori ko‘rsatkichi doimgidek Toshkent shahrida kuzatilgan — 9,1 mln so‘m. Keyingi o‘rinlarda Navoiy (6,7 mln so‘m), Toshkent (5,1 mln so‘m), Andijon (4,6 mln so‘m) hamda Buxoro (4, 3 mln so‘m) viloyatlari qayd etilgan.

Eng kam o‘rtacha ish haqi Qashqadaryo (3,8 mln so‘m), Surxondaryo (3,8 mln so‘m) va Namangan (3,9 mln so‘m) viloyatlarida kuzatilgan.

Ish haqining eng yuqori o‘sish sur’atlari Toshkent shahri (21,4 foiz), Samarqand (17,6 foiz), Sirdaryo (16,7 foiz), Namangan (16,5 foiz) va Farg‘ona (15,1 foiz) viloyatlarida bo‘lgan.

O‘tgan yili quyidagi sohalarda o‘rtacha oylik ish haqi eng baland darajada to‘langan:

Bank, sug‘urta, lizing, kredit va vositachilik faoliyati — 15,3 mln so‘m;
Axborot va aloqa sohasi — 13,1 mln so‘m;
Tashish va saqlash sohasi — 8,1 mln so‘m;
Sanoat sohasi — 6,4 mln so‘m.
Mazkur miqdorlardagi ish haqlari o‘rtacha oyliklarga nisbatan yuqori ko‘rsatkichni tashkil qilgan.

Yil davomida ta’limda 3,6 mln so‘m, sog‘liqni saqlash va ijtimoiy xizmatlar ko‘rsatishda 3,4 mln so‘mlik o‘rtacha ish haqi to‘langan. Ushbu miqdorlar boshqa sohalardagiga qaraganda eng quyi pog‘onalarda bo‘lib, o‘rtacha ish haqi darajasidan sezilarli past.

@SHURCHI24_RASMIY