Noqonuniy tamaki mahsulotlar ulushi 2022 yilning dekabr oyidagi 21 foizdan 2023 yilning aprel oyiga kelib 22,5 foizgacha oshgan. Bu raqamlar unga nisbatan kurashni kuchaytirish kerak ekanligini, yangi choralar qo‘llash zarur ekanligini anglatadi.
Noqonuniy tamaki mahsulotlarining asosiy aylanmasi nazorat qilinmaydigan ko‘cha savdogarlari zimmasiga to‘g‘ri keladi. Bunga o‘z vaqtida qonunchilik palatasi e’tibor qaratdi va mamlakat rahbari tomonidan ham qo‘llab-quvvatlandi hamda bu faoliyatni taqiqlash ko‘zda tutilgan "Alkogol va tamaki mahsulotlarining tarqalishi hamda iste’mol qilinishini cheklash to‘g‘risidagi" O‘zbekiston Respublikasi
qonuni qabul qilindi.
Yangi qonunga ko‘ra noqonuniy tamaki mahsulotlarga qarshi kurashda ma’sul bo‘lgan vakolatli davlat organlari belgilab qo‘yildi. Bu organlar Bosh prokuratura huzuridagi Iqtisodiy jinoyatlarga qarshi kurashish Departamenti, bojxona organlari, soliq organlari, iste’molchilarning huquqlarini himoya qiluvchi organlar va IIV. Xodimlarning sonidan kelib chiqadigan bo‘lsak, aynan IIV O‘zbekistondagi noqonuniy tamaki mahsulotlarning falokatli darajadagi aylanmasiga qarshi kurashda ilg‘or bo‘lishi kutilmoqda.