Shahnoza Soatova blogi

Байроқ ҳақида лонгрид

1. Мўғуллар босқини пайти Гурганж учун 7 ой қаттиқ жанг бўлди. 76 ёшли шайх Нажмиддин Кубро “Ё Ватан, ё ўлим!” деб ўз муридлари билан жангга кирди. Жанглардан бирида мўғул яловбардори шайхни қаттиқ яралади. Шайх ҳушини йўқотар чоғи яловбардор қўлидаги туғга (байроққа) ёпишди ва уни тортиб йиқилди – мўғул байроғи қулади. Бу душман учун жанг пайти жиддий маънавий зарба эди, байроқни тезда тик кўтариш лозим эди. Бироқ мўғул аскарлари ўнтаси бир бўлиб ҳам шайхнинг қўлидан байроқни тортиб ололмади, охири унинг панжаларини чопиб, байроғини “халос этиш”га муваффақ бўлди. Шарафли Шайх Кубро “шаҳидлар шоҳи” тарихи билан ўзи дарс берган хонақоҳга дафн этилди.

2. 1950-йилларда Шимолий ва Жанубий Корея вакиллари ўзаро музокараларга ҳар сафар ўз байроғини рақиб томонникидан каттароқ қилиб олиб кела бошлади. Байроқ пойгаси шу даражага етдики, байроқлар ҳажми бутун хонани эгаллади ва музокаралар жисмонан имконсиз бўлиб қолди. Шунда “байроқлар зиддияти”ни бартараф этиш учун томонлар алоҳида музокара бошлашга мажбур бўлишди.

3. Афғонистон байроғи 140 йил ичида 22 марта, АҚШ байроғи эса 27 марта ўзгаргани билан рекорд қўйди. Эътибор берилса, бу ўзгаришлар Афғонистонда сиёсий беқарорлик (тузумлар кўп алмашинуви), АҚШда эса, аксинча, барқарорликни (ҳар сафар давлат таркибига янги штат(лар) қўшилганида, унга юлдузчалар қўшиш учун ўзгариш бўлган) ўзида акс эттиради. Ўзбекистон бу борада анча барқарор – давлат ўз тарихида фақат 3 та байроқни кўрди – Туркистон Мухторияти, Ўзбекистон ССР ва Мустақил Ўзбекистон байроқлари. Ҳозирги байроғимизга бугун 33 йил тўлди.

4. 1991 йил давлат байроғимиз лойиҳалари Олий кенгашда муҳокама қилинган, телевидение тўлиқ кўрсатган (мактабда ўқирдим). Роса баҳс бўлганди. Шоиралардан бири “Бу не элким, боши узра якка бир байроғи йўқ, Сенга оқ ранг, менга кўк ранг деб талашмас чоғи йўқ” деб ёзгани ҳам эсимда. Лекин менга бу баҳсларни томоша қилиш ёқарди. Айнан ўшанда мен биринчи марта Туркистон Мухториятининг байроғини кўрганман (бир гуруҳ депутатлар шу байроқни қабул қилишни таклиф этишганди). Ҳозирги байроқни эса Биринчи президент Ислом Каримов таклиф қилган дейишади.

5.Бот-бот тармоқда Ўзбекистон байроғининг бошқа мамлакатлар ё шаҳарлар байроқларига ўхшашлигини кўрсатувчи бир гифка айланиб қолади. Мен байроқларнинг бир-бирига бироз қиёфадош бўлишида ёмонлик кўрмайман – умуминсоний тафаккур маҳсули бўлмиш рамзлар тили универсал, масалан, яшил деганда ер юзида деярли ҳамма табиатни, кўк деганда сув ё осмонни, қизил деганда қонни, ҳаётни тушунади ва бу рамзлар байроқларда акс этади. Халқаро Олимпиада байроғидаги 5 та ҳалқа нега айнан кўк, сариқ, қора, яшил, қизил рангларда? Чунки шу ранглардан ҳеч бўлмаса биттаси дунё мамлакатларининг байроғида албатта бор.

Байроқ нафақат давлат рамзи – аввало у ватан рамзидир. Уни фақат бинолар пештоқига эмас, қалбларга қадамоғимиз шарт!

Сана муборак!

#bayrogimfaxrim
#bayroqkuni

@shahnozxon

Бугун йўл-транспорт ҳодисаси қурбонларини ёд этиш халқаро куни.

Муҳрим Ўзбекистонда ҳар йили йўлларда сон жиҳатидан Украинадаги урушдаги билан тенг болалар ўлаётганини айтиб, буни миллий фожиа деб баҳолаяпти. Қўшиламан!

Қоидабузарликни оқлаганлар, ёқлаганлар, “фатво” берганлар (“козёл”, хоин, ҳаром ва ҳк), сизлар шу миллий фожиада қоидабузарлар билан тенг айбдорсиз!

Тормоз ва газ педаллари орасида бир неча сантиметр масофа бор. Ҳайдовчи шу икки тепки орасида турган тирик жонлар масъулиятини ҳис қилиши керак. Баҳоналар ўтмайди!

Аҳвол ўзгариши керак. Жамият ўзгариши керак, ижтимоий фикр ўзгариши керак, давлат органларининг муносабати ўзгариши керак. Тинч юртда урушдагидек болалар ўлаётган экан, демак, биз нотўғри йўлдамиз.

@shahnozxon

Контрабанда маҳсулотларга қарши курашиш бўйича фуқаролик масъулияти

Контрабанда маҳсулотлар нафақат давлат иқтисодиётига, балки фуқароларнинг соғлиғига ҳам жиддий хавф туғдиради. Ноқонуний тамаки ва алкоголь маҳсулотлари сифат назоратидан ўтмаганлиги сабабли истеъмолчилар ҳаётига таҳдид солиши мумкин.

Солиқ ҳамкори бўлиш — фуқаролик бурчларимиздан бири, чунки қонунбузарликлар ҳақида хабар бериш орқали, биз:
- Жамият саломатлигини ҳимоя қиламиз
- Қонуний тадбиркорларни қўллаб-қувватлаймиз
- Давлат бюджетига кўмаклашамиз
- Рағбатлантирувчи кешбэк оламиз

Soliq.uz иловаси орқали контрабанда маҳсулотлар ҳақида хабар бериш қўлланмаси:

✅ 1. Илова билан танишув
➖ Soliq.uz иловасини юклаб олинг (линк)
➖ Шахсий кабинетга киринг

✅ 2. Хабар бериш жараёни
➖"Soliq hamkori" бўлимини танланг
➖"Soliq qonunchiligining buzilishi turi" қисмига ўтинг
➖"Noqonuniy tadbirkorlik faoliyati (alkogol, tamaki va boshqa mahsulot)" бандини белгиланг

✅ 3. Далилларни юклаш
➖ Савдо нуқтаси ҳақида маълумот киритинг (қўлда ёки QR-код орқали сканерлаб киритиш)
➖ Фото ва видео материалларни илова қилинг (10 МБгача)
➖ "Хабар жўнатиш" тугмасини босинг

❓ Ҳуқуқий асос:
Ўзбекистон Республикаси Президентининг 2023 йил 4 апрелдаги 110 сонли Қарорига мувофиқ акциз маркаларисиз ва рақамли маркировкасиз алкоголь ҳамда тамаки маҳсулотларини сотиш қатъиян тақиқланган.

💰 Рағбатлантириш:
Аниқланган қонунбузарлик учун жарима суммасидан 2 000 000 сўмгача кешбэк олиш имконияти мавжуд.

❗️ Муҳим эслатма:
Хабарлар махфий қолади, шахсий маълумотларингиз ҳимояланган бўлиб, Сиз фуқаролик позициясини намоён этиш орқали жамият фаровонлигига ҳисса қўшишнинг мумкин.