Майдон узра кураги ерга тегмаган эл бу,
Бошига қилич келса, бўйин эгмаган эл бу,
Мангуберди, Паҳлавон, Тўмарис-у Широқ бу,
Буюклари бағрида уйғоқ ётган тупроқ бу.

Садо бериб тургайдир Кубронинг фарёдида,
Бобурларнинг зорида, Чўлпонларнинг додида,
Ҳар на жавру ситамдан оҳи ортиқ фироқ бу,
Армон бўлиб юракда тошдай қотган тупроқ бу.

Кимнинг жони уйғонмас, кимнинг ори уйғонмас,
Ватан деса кимнинг ҳам дилда бори уйғонмас,
Етмиш икки минг томир ичра бедор титроқ бу,
Тўрт минг тўрт юз сўнгакни даст уйғотган тупроқ бу.

Юртим, шаънингга лойиқ бир Сўз демай кетмоқ йўқ,
Келсам бир келибман-да, сени севмай кетмоқ йўқ,
Юрак узра ҳилпираб турган шонли байроқ бу,
Ўзбекистон – Отам бош қўйиб ётган тупроқ бу!

✍Сайёра Самандар

@Samandarqush