Aziz va moʻtabar ayollar!
Muhtarama onaxonlar, qadrli opa-singillar! Avvalo, Sizlarni, qorovulbozorlik barcha onaxonlarimiz, opa-singillarimiz, dilbar qizlarimizni go‘zallik va nafosat bayrami
8 mart—Xalqaro Xotin-qizlar kuni munosabati bilan tumanimiz faollari, keng jamoatchilik va o‘zim nomimdan samimiy muborakbod etaman!
Barchangizga chuqur hurmat-ehtiromimni va eng ezgu tilaklarimni bildiraman.
Avvalo, oilangiz va yaqinlaringiz baxtiga, qolaversa, ayol qadrini e’zozlab yashaydigan el-yurtimiz baxtiga sog‘-omon bo‘lishingizni, doimo mana shunday go‘zal bahoriy kayfiyatda yurishingizni tilayman.
Xalqimiz azal-azaldan Ona siymosini, Ayol zotini Yaratganning ulug‘ ne’mati, tengsiz moʻjizasi, deb biladi, uni hamisha ardoqlab-asrab yashaydi.
Payg‘ambarlarni ham ona dunyoga keltirgan, ayollar sharafiga Tojmahallar qurilgan, shoirlarga eng shoh satrlar ilhomini bergan, xukmdorlarga ulkan shaharlarni obod etish g‘ayratini baxsh etgan ayol zotini ulug‘laydigan kunlarimiz bor bo‘lsin!
Bu ko‘hna tarix To‘maris, Nodira-begim, Uvaysiy, Zulfiya, Saida Zunnunovadek buyuk ajdodlarimizning millatimiz sha’ni, or-nomusini saqlash yo‘lidagi jasoratlariga guvohdir. Ulug‘ momolarimizga xos bo‘lgan noyob fazilatlar zamonamiz ayollari siymosida ham davom etayotganidan behad faxrlanamiz.
Muhtaram Yurtboshimiz ta’birlari bilan aytganda Sizlar biz uchun avvalo muqaddas ona, aziz Vatan,
oila timsoli, bitmas-tuganmas mehr, ezgulik va kuch-g‘ayrat manbaidirsiz.
Ayni paytda biz insoniyat taraqqiyotiga unutilmas va beqiyos hissa qo‘shgan buyuk ajdodlarimizni dunyoga keltirib, mehr bilan tarbiyalagan, ularni ulug‘vor ishlarga ruhlantirib, kamarbasta bo‘lgan fozila ayollarimiz bilan albatta faxrlanamiz.
Bugun tumanimizda ayollar barcha sohalarda erkaklar bilan tengma-teng mehnat qilib, o‘zlarining tashabbus va tashkilotchiliklari bilan ko‘pchilikka o‘rnak. Ushbu ulug‘ bayram arafasida tumanimizdagi bir qator faol xotin-qizlar nomini faxr bilan qayd etishni istardim.
Oilalarda sog‘lom turmush tarzini shakllantirish va ijtimoiy ma’naviy muhit barqarorligini ta’minlash hamda milliy qadriyatlarimizni targ‘ib qilishda faol ishtirok etib, o‘sib kelayotgan yosh avlodga namuna bo‘lib kelayotgan "Oqila ayollar" harakati a’zolari O‘g‘iloy Ismatova, Zulxumor Raxmatova, Hamrobegim Sharopova, Matluba Oripova, Sayyora Bekmurodova, Sharofat Yuldasheva kabi nuroniy onaxonlarimiz, "Shuhrat" medali sohibi Erashgul Ismoilova, "Xalq ta’limi a’lochisi" unvoni sohiblari Zebiniso Sayfullayeva, Malohat Quvvatova kabi tumanimizda e’tirof etilishi lozim bo‘lgan fidoyi ayollarimiz va qizlarimiz juda ko‘pchilikni tashkil etadi.
Shu o‘rinda, davlat hayotida faollik va tashabbuskorlik ko‘rsatgan, o‘zining samarali mehnati bilan ibratli faoliyat olib borganligi uchun kuni kecha Tosheva Saodat Sa’diyevna “Moʻtabar ayol” ko‘krak nishoni, Bobonazarova Mehriniso Sultonovna “Adolat” ko‘krak nishoni bilan taqdirlanganligini ham alohida e’tirof etish joiz deb o‘ylayman.
Fursatdan foydalanib, ona Vatanimiz ravnaqi yo‘lida fidokorona mehnat qilayotgan sizlar kabi ming-minglab jonkuyar ayollar, faol qizlarimizga o‘z nomimdan, butun xalqimiz nomidan chuqur minnatdorlik izhor etaman.
Muhtarama opa-singillar! Barchangizni yana bir bor bugungi bahor va nafosat, go‘zallik va latofat bayrami bilan samimiy tabriklayman.
Sizlarga dunyodagi eng bebaho boylik – oilaviy baxt-saodat, tinchlik-xotirjamlik, farzandlar va nabiralar kamolini ko‘rib yurish quvonchi hamisha yor bo‘lishini tilayman.
Iqbolingiz baland, umringiz uzoq, hayotingiz farovon bo‘lsin!
Qalbingiz doimo bahordek yashnab tursin!
Hamisha sog‘-omon bo‘linglar!
Doimo xalqimiz, Vatanimizning yuksak mehri va ardog‘ida bo‘lish hammangizga nasib etsin!
Qorovulbozor.uz |
Facebook |
Instagram |
YouTube
