NEURA

Me‘yor

Redditda bir 37 yoshli erkak yozgan post mashhur boʻlib ketibdi. Uning posti mazmuni qisqacha bunday:

„10 yildan ortiq umrimni karyera qilishga, oʻz biznesimni rivojlantirishga sarfladim. Mana yaqinda millionerga aylandim ($). Endi bir toʻxtab hayotimga nazar solsam, menda shu karyera, biznes va puldan boshqa narsam yoʻq ekan. Yillar davomida oilam va doʻstlarimdan hatto xobbilarimdan qizgʻangan vaqtimni shu biznesga, pul topishga sarflab endi hayotim bir xillikdan, yolgʻizlikdan iborat boʻlib qoldi“

Shu postni va ostidagi minglab kommentlardan ayrimlarini oʻqib oʻylab qoldim. Albatta puli bor baxtsiz odam puli yoʻq baxtsiz odamdan koʻra harqalay koʻproq imkoniyatlarga ega. U toʻxtab nafas rostlab hayotini qaytadan boshqacha yondashuv bilan qurishi uchun yetarli resursi bor, agar hali kech boʻlmagan boʻlsa (37 yosh ham aslida kech emas).

Biz yaʼni 20-30 yosh orasidagilar koʻpincha hayotiy maqsadlarimiz boshida karyera turadi. Zoʻr mutaxassis boʻlsam, yaxshi joyda ishlab yaxshi pul topsam deya orzu qilish va harakat qilish albatta yaxshi. Lekin oʻzimga bot-bot eslatib turishimga toʻgʻri keladigan „meyor“ degan tushuncha ham bor. Hayotimiz faqat karyeradan iborat emas.

Shaxsiy hayot, qiziqishlar, yaqin insonlar bilan yetarli vaqt oʻtkazish, inson oʻziga ham vaqt ajratishi kerak. Bu gaplarni koʻchada semichka sotadigan xola ham aytadi desangiz haqsiz, ammo shularning hammasida meyor boʻlishi kerakligini va bu meyorni doim buzib kelganim haqida oʻylasam yuqoridagi akani tushungandekman.
Hayotimiz rang-barang boʻlishiga, hamma jabhalariga arzirli vaqt ajratishga harakat qilishimiz kerak.
Bu hayot faqat ishdan / faqat ijtimoiy tarmoqlardan / faqat koʻngilxushlikdan iborat boʻlmasligi kerak. Oltin muvozanatni topa olishimiz kerak, garchi hali oʻzim topmagan boʻlsam ham shunga harakat qilishim kerak ekan.

Karyerani deb tepadagi akaga oʻxshab juda katta yoʻqotishni boshdan kechirganlardan biri sifatida, karyerani hayot mazmuniga aylantirib olmasligingizni soʻrab qolaman. Suyukli insonlarni, damlarni borida qadriga yetaylik...

Medizinische Webseiten

Nemis tilida tibbiyot oʻqish uchun oʻzim eng yaxshi deb bilgan ayrim saytlarni berib oʻtmoqchiman.

1. https://www.amboss.com/de *
Fundamental va klinik fanlarni hamda sohalarni qamrab olgan obunali pullik platforma.

Buning USMLE ga tayyorlaydigan inglizcha variantidan koʻpchilik xabardor boʻlsa kerak. 12 oylik obunasi 139€, buning ichiga nemislarning medinstitutda topshiradigan M2 va M3 imtihonlariga tayyorlanish bazasidan iborat question bank (Amboss kreuzen) ham kiradi (savollarga cheklanmagan dostup bor).

2. htttps://www.flexicon.doccheck.com/de
Bepul ochiq dostupli nemischa tibbiyot "Wikipedia"si.

Adashmasam boshida maqolalar va ulardagi illyustratsiyalarga cheklanmagan dostupga ega boʻlishiz uchun tibbiyot xodimi yoki medstudent ekanizni isbotlash kerak (1-2 kunda adminlar tasdiqlashadi, ijobiy javob olish ehtimoli 90% dan ortiq).

3. https://www.netdoktor.de
Bu ham Flexiconga oʻxshash ammo koʻproq bemorlar (oddiy aholi) ga moslab yozilgan vebsayt. Hech qanday cheklov yoʻq, roʻyxatdan oʻtish shart emas.

4. https://www.gelbe-liste.de
Nemis tilida dori preparatlari bazasi (nemischa "Vidal"). Ochiq vebsayt, kirishga cheklov yoʻq.

5. https://www.msdmanuals.com/de-de
Flexicon va Netdoktorning xususiyatlarini birlashtirgan tibbiy informativ sayt. Bosh sahifaga oʻtganda bemor uchun yoki tibbiy xodim uchun sayt versiyasini tanlab mos ravishda tibbiy maʼlumotlarni oʻqish mumkin.

6. https://www.viamedici.thieme.de
Amboss ga alternativ boʻlgan pullik obunali platforma. Dunyoga mashhur ilmiy nashriyot Thieme ga tegishli (saviyasi ham top degani endi😃). Amboss dan koʻra qimmatroq ekan: yillik lernen & kreuzen (oʻqish va test ishlash) paketi 180€. Oʻzim ishlatib koʻrmaganman, ammo zoʻrligiga ishonaman.

7. https://www.emrbyotox.de
Dori preparatlarining homilaga taʼsiri haqida dalillarga asoslangan batafsil platforma.

PS: bu saytlarning ayrimlariga har kuni tashrif buyursam ayrimlariga kamdan-kam kiraman xolos. Bunaqa vebsaytlar aslida juda koʻp, muhimi har kim oʻziga qulayini tanlab oʻqisa shunisi maʼqul.

*Amboss ning Freunde einladen funksiyasi orqali bepul 60 kunlik akkaunt ochib undan bepul foydalanish mumkin. Kimga 60 kunlik dostup kerak boʻlsa menga aloqaga chiqsin, 60 kunlik login /parol olib beraman. 60 kun muddat tugagandan keyin yana soʻrasa yana 60 kunga olib beraman. Qancha kerak boʻlsa shuncha vaqt.

Yordam olish uchun 2 ta shartni qanoatlantirishiz kerak:

1. Soʻragan odam nemis tilidan kamida B1 yoki B2 sertifikatini koʻrsatishi kerak.
2. Soʻragan odam tibbiyot instituti talabasi boʻlishi kerak (oʻzi oʻqiydigan institut sahifasidan akkauntini skrinshot qilib joʻnatsa yetarli). Bu bilan mani ham oʻzingizning ham vaqtimizni tejaymiz. Quruqdan quruqqa soʻraydigan odam uchun ortiqcha harakat qilinishining oldini olamiz.

❗️Disclaimer: man olib bergan 60 kunlik emailni tarqatib koʻp odamni qoʻshib yuborsangiz u emailingiz Amboss tomonidan bloklanadi va undan qayta foydalana olmaysiz. Ilmni faqat unga tayyor va loyiq inson olgan maʼqul! Buyogʻi vijdoningizga havola.

​Reddit

Til oʻrganayotgan odam uchun albatta ijtimoiy tarmoqlarning (oʻziga qaram qilish xususiyati borligi tufayli) foydasidan zarari koʻproq. Ammo Reddit ijtimoiy tarmogʻi haqida gap ketganda bu fikr yana qaytadan oʻylab koʻrishga arziydi. Reddit bu asosan rivojlangan gʻarb mamlakatlarida keng foydalaniladigan ijtimoiy tarmoq hisoblanadi. Unda turli xil jamiyatlari (communities) boʻlib, maʼlum bir mavzuga bagʻishlangan boʻladi va oʻzaro fikr almashiladi, savollar beriladi, savollarga javob olinadi. Oʻzim ham ahamiyat bersam, oxirgi yillarda biror masalada maslahat yoki savol paydo boʻlsa, koʻpincha Redditdan izlaydigan odat chiqaribman. Chunki koʻp holatlarda oʻsha savol u yerda allaqachon berilgan va ostidagi kommentlarda ancha mantiqli javoblar berilgan boʻladi.

Redditning afzalliklari shuki, unda faqat matn orqali muloqot qilinadi, ortiqcha chalgʻituvchi rasmli va videoli kontent deyarli yoʻq, quruq oldi-qochdi emas asosan mazmunli yozishmalarni koʻp uchratadi odam. Bundan tashqari u yerda hamma anonim boʻladi, oʻz Reddit profilingizni ochganingizda boshida sizdan shaxsiy maʼlumotlar deyarli soʻralmaydi (adashmasam), sizga maʼlum bir qiziqarli nickname (laqab) va har xil hayvonchalar shaklida avatar beriladi (octopus, strawberry, funrabbit...), bu esa xohlagan mavzuda erkin fikrlarni bayon qilish va yozgan odamning shaxsiyatiga emas fikriga ahamiyat berish muhitini maʼlum darajada yarata olgan.

Nega boshida til oʻrganish bilan gapni boshladim, chunki Redditda juda ham koʻp ona tilida soʻzlovchi ingliz, nemis va hk (native speaker/ Muttersprachler) odamlar bor, ular kundalik hayotda qanday gaplar ishlatsa, Redditda ham shunaqa gaplar, slanglar, tabiiy til muhitida yozishadi. Bu chet tilini oʻrganayotgan odamga oʻsha mavzudagi bilim va tajribadan tashqari oʻsha tilning tabiiy qoʻllanilishini ochib beradi. Hayotning hamma jabhasida yaxshi bilim va tajribalarni Redditdan olsa boʻladi. Faqat odam axborotni filtrlashni bilishi juda muhim.

Germaniyada shifokorlik haqida Wikipedia darajasida yozilgan bitta juda keng qamrovli Reddit postning linkini quyida boʻlishaman. Post ingliz tilida.

https://reddit.com/r/medicalschoolEU/w/meta/germany?utm_medium=android_app&utm_source=share

Oʻzbek vs Nemis nuroniylar 2 ta xayoliy vaziyat misolida

🇺🇿Eshmat bobo va Sharopat bibi (Eshmat boboni darvozasini tashqarisidagi skameykadagi suhbat):

- Eshmat, eshitdizmi, Gʻishmatni qizi ajralib kelibdi?
- Ey, yomon boʻlibdida, ey bir balosi boʻlmasa ajralmasa kerak, gap qaytargan, erini qaynona/qaynota/qaynbirbalolarini xizmatini qilmagandirda.
-Bilmasam, kecha falonchini toʻyida eshitdim. Ey bu falonchi zoʻr toʻy berdi, lekin artisni yaxshisini aytmabdida.
-Ha, oʻzizda nima gaplar, yaxshimisiz, nevaralar yaxshimi? Ha bu katta nevarayiz farzandlik boʻldimi?
- Yoʻq hali, xudo bir kun berar deb turibmizku, nasib qilar
- Haa, uylanganiga binoyi vaqt boʻldi shekilli, shunga soʻradimda...(shu payt koʻchada bir qiz naushnikda 20 metr naridan oʻtib ketadi, balki podkast eshitayotgandir, balki til oʻrganayotgandir...)
- Haa, chalpakcha, hozirgi yoshlani qarang, na salomni biladi, yana qulogʻiga birnima, balo bormi qiz bachaga, bulani yoshida biza koʻchaga chiqmasdik, blablabla qilardik...
-Ey, zamon oʻzgardi, Sharopat bibi, mana shu Shermatni qizini har kuni koʻchada koʻraman, maktabgamiye, oʻqishgamiye qatnaydi, xudo biladi oʻqishga ketoptimi boshqa joygami, tovba xudo saqlasin.


Ps. Bunga oʻxshash suhbatlar va hokazolarni juda koʻp eshitganman. Nafaqat qariyalardan, oʻrta yoshdagi odamlardan ham. 90% oʻzbek keksalariga xos boʻlgan suhbat. Balki adashayotgandirman. Ammo mavzu shu darajada ahmoqona.

🇩🇪Wolfgang bobo va Marion bibi: (poyezdda sayohatga chiqqanlaridagi suhbat):
- Marion, ma gazetalarni olgin, oʻqib ketmoqchi boʻlganingni tanlaginda, qolganini menga ber, sumkaga solib qoʻyaman.
- Poyezdda oʻqib ketishga yaxshi kitob tanlabsan. Buni oʻqiganman. Zoʻr asar. (Shu payt qoʻlida qizchasini koʻtargan bir erkak narigi vagonga oʻtish paytida qoqilib yiqilishiga sal qoladi)
- Xayriyat, yiqilmadi bechora, tasavvur qil Wolfgang, yiqilsa nima boʻlardi, qizchasi bor axir qoʻlida!
- Ha shoʻrlik zinani koʻrmay qoldi shekilli.
-Poyezd bugun sal kechikib yuryapti shekilli. Orada 15 minut zoye ketadigan boʻldida. E xay, bilasanku har doim shu ahvol, qoʻy buni, ochkimni olay, nechinchi betga kelgandim...

Ps. Xuddi shunaqa ikkita nuroniy bilan bugun poyezdda ketdim. Suhbatlari va undagi mazmun shunga juda yaqin edi😊.

✅ Oʻzimga qilgan xulosam: bizni maʼnaviyat va "buyuk ajdodlarimizdan qolgan" mentalitetimiz, urf-odatlar emas, ILM, maʼrifat qutqaradi. Yaxshi dam olinglar.

Neʼmatjon Rajabov
24.02.2024
München

Talabalar haqida 2

Avvalroq yozganimdek ishxonamga talabalar ishga kelib turishadi. Hozirgacha 8-10 tacha talaba bilan birga ishladik, suhbatlashdik. Ularning oʻzini tutishini, muomalasi va ishga nisbatan masʼuliyatini kuzatdim. Har doim shu xulosaga keldimki, bu talabalar afsuski bizning talabalardan koʻra ancha yetuk shaxsdek koʻrinadilar. Ular hatto bekor oʻtirgan vaqti ham telefon titkilashmaydi, ijtimoiy tarmoqlar va boshqa trend mavzularni umuman bilishmasa ham kerak. Qiziqib biror savol bersam, bilganicha teran, jiddiy argumentlar bilan javob berishadi. Umuman oʻqishdan, darslarning qiyinligi va hokazolardan nolishmaydi, garchi tibbiyot universiteti bu yerda oʻzimizdagidan koʻra ancha talabchan boʻlsa ham.

Oʻtgan hafta Myunxen texnika universitetining kutubxonasiga dars qilgani bordim. Oʻz-oʻzidan bizning Buxoro tibbiyot instituti kutubxonasi bilan solishtirishga tushib ketdim (hamma chetga chiqqan odamda bor solishtirish fenomeni😁). Bizning "kutubxona" institutning bir tiyinga qimmat tadbirlariyu majlislarini oʻtkazish joyi, diydor koʻrishish, oʻzaro gap sotish, qiz/yigit ovlash va tekin WiFi manbayidek tasavvur qoldirgan manda. Harqalay oʻzimizda ham chindan oʻqish uchun keladigan talabalar koʻp, lekin institutimiz kutubxonasida rosti dars qilib boʻlmasdi. Koʻp hollarda talabalarda eng elementar sukut saqlash, birovga xalal bermaslik madaniyati yoʻq edi. 5-6 ta kutubxonachining tomogʻi qirilardi iltimos jim boʻlinglar, birovga oʻqishiga xalaqit bermanglar deb.

TUM kutubxonasi esa manda haqiqiy ziyo maskaniday taassurot qoldirdi. Kutubxonaga kirishim bilan qandaydir sergaklik jiddiylik muhitini his qildim. Kutubxona liq toʻla, lekin varaqqa yozayotgan ruchka tovushi eshitilarli darajada jimlik. Eng qizigʻi mandan hech kim kimsan, nega kiryapsan, formulyaring qani, deb soʻragani yoʻq. Chunki kutubxonada nazoratchining oʻzi yoʻq😁. Nega talabalar bilan gapni boshlab, kutubxonaga oʻtib ketdim? Chunki bu yerda talabalar chindan oʻqishadi! Tinmay oʻqishadi, kelib 10 minut dars qilib keyin dugona/joʻra bilan gap sotishmaydi!

Bularni nimaga yozyapman, chunki manga tuyulishi boʻyicha biz har doim gapirib oʻrganib qolgan institutimiz qoloqligi muammosidan tashqari, talabalarimizning ham bilim olishda orqada ekanliklari manga ogʻir botadi. Koʻpchilik tibbiyot talabalari keraksiz narsalarga oʻralashib qolishgan. Haqiqiy ilmdan uzoqlashganmiz afsuski koʻpimiz. Oʻzim ham shunaqalardan biri edim afsuski.

Xullas post oxirida nima demoqchiman: mani kuzatadigan postlarimga qiziqadigan talabalarning aksariyati rivojlangan mamlakatlarda shifokorlikka intilayotgan, harakat qilayotganlar deb hisoblaydigan boʻlsak, sizlarga doʻstona maslahatim — oʻqinglar qadrdonlar. Eng avvalo ingliz yoki nemis tilini, hech boʻlmasa rus tilini oʻrganib olinglar va chindan oʻqinglar. Sizni chet davlatda tayyor ish va maosh zoriqib kutib turgani yoʻq. Siz shunga oʻzingizni munosib darajaga olib chiqishga intilmas ekansiz, sizga bu yoʻl juda qiyin boʻladi. Xuddi hozir manga qiyin boʻlayotganidek.

Neʼmatjon Rajabov
18.02.2024
München

#repost

Man ichimda oʻylab yurgan fikrlar va man sezayotgan hislarni ochiqroq, professionalroq va batafsilroq yoritib tashlash boʻyicha opaga teng keladigani yoʻq❤️

https://t.me/sarvinoz_omonova/1178

​Transport tizimi. 2-qism: Avtobuslar.

Endi transport haqida gap ketganda, man yashab turgan Münchenni aytmay qoʻyaqolay. Yuqorida sanab oʻtgan transport turlarim bor-ku, shularning hammasi borligiga qoʻshimcha ravishda, bu yerda avtobuslar ham harakatlanadi. Va bu avtobuslar bekatda toʻxtaganda yon tomonlama bekat tomonga egilib, yoʻlovchi chiqishi uchun qulay vaziyatga oʻtadi🤯. Balki man qishloqilik qilib bu narsani birinchi marta koʻrib boʻrttirayotgandirman, ammo rosti qoyil qolmasdan iloj yoʻq. Avtobuslar bekatga 1 minut ham kechikmay keladi. Va eng qiziq joyi bu yerda jahlni chiqaradigan konduktor yoʻq😮. Hammasi elektronlashtirilgan, har bitta avtobusda bankomatga oʻxshagan chipta sotib olish qurilmasi ishlab turadi.

Xuddi manga oʻxshab Buxorodagi tiqilinch, haydovchisi va konduktori asabiy avtobuslarni koʻrgan doʻstlarimga yana bir (yigʻlatadigan🙊) yangilik: bu 49€ lik chipta avtobus uchun ham amal qiladi. Tasavvur qil, uka. 6-mikrorayondan Karvonga, yappa-yangi institut tomonga yuradigan avtobusga chiqding. Odam kam, top-toza ozoda avtobus, probka deb oʻtirmasdan yoʻldagi maxsus avtobus yoʻlagida sani 1 minut kechikmay oborib qoʻydi. Va bilasanmi keyin nima qilding? Shundoqqina avtobusdan chiqib ketvording. 49€ lik chiptang sogʻ boʻlsin😃

Tutu tutut, tutu tutut, ana budilnik ham chalvordi, turaqol, bu tush edi, vaqtli turib kissangda 50 ming soʻmlikdan boshqa mayda qolmagani esdan chiqqan holda probkada imillaydigan tiqilinch avtobusga shoshilishing kerak. (Uzr soʻrayman, oʻzimni talabaligim esimga tushib ketdi😆)

Post boshida München haqida gap ketganda yana bir narsani aytishim kerakki, man shaxsan uyimdan ishxonamga kamida 10 xil alternativ yoʻl bilan bora olaman. Chunki bu shaharda tepadagi hamma poyezdlardan tashqari metro, tramvay va avtobuslar ham soatdek bexato yuradi. Xullas gapirsa gap koʻp. Qadrdon ukalar, talaba mediklar. Sizlar mana shunaqa sharoitda yashab shuncha narsaga chidab yana oʻqishga izlanishga intilayotganlar hisoblanasiz. Oʻzingizga ishonchni yoʻqotmang va gazini bosing. Shunda bunaqa komfortlar sizga oddiy kundalik qulaylik boʻlib qoladi. Xuddi hozir mendagi kabi😊.

UPD: har bir avtobus oʻrindigʻida haydovchiga "bekatda toʻxta" chaqirigʻini beradigan tugmalar boʻladi. Eng qizigʻi bu tugmalarning nogironlar uchun va kolyaskali ona-bola uchun maxsus turi ham bor. Avtobus haydovchisi bekatda tushib qolmoqchi boʻlgan yoʻlovchining qanday egilish darajasiga muhtojligini shu tugmalar asosida biladi. Fantastika, toʻgʻrimi?

PS. Suratda kamina bir avtobus bekati oldida. Bekatdagi tabloda keyingi qaysi avtobuslar necha minutda kelishi yozib qoʻyilgan.

Neʼmatjon Rajabov
04.01.2024
München

Transport tizimi. 1-qism: Poyezdlar.

Germaniyaning manga yoqqan jihatlaridan biri ham aynan shu transport tizimi. Eng avvalo shuni aytish kerakki, jamoat transporti 7 kun 24 soat ishlaydi😍. 24 soat, Karl, yarim tunda ham xohlagan joyga arzongina transportda bora olasan🤯.

Bu yerda ayniqsa poyezdlar tarmogʻi juda rivojlanib ketgan ekan. Buni shundan bilsak boʻladiki, poyezdlarning turlari koʻp.

Masalan:

✓ shaharlararo yuqori tezlikdagi poyezdlar (IC, ICE=Intercity Express Zug),
✓ regional tezkor poyezdlar (Regional-Express Zug),
✓ regional poyezdlar (Regiobahn)
✓ maʼlum bir shahar va uning atrofida harakatlanuvchi shahar tezkor poyezdi Stadtschnellbahn (S-Bahn)
✓ tramvay (Tram/Straßenbahn)
✓ metro ya'ni Untergrundbahn (U-Bahn)

Albatta metro va tramvay faqat katta shaharlarda, ikkalasidan bittasi biroz kichikroq shaharlarda yuradi. Qolgan turdagi poyezdlarning hammasi Germaniyaning juda koʻp hududlarini zich qamrab olgan relslarda yuradi. Eʼtibor bergan boʻlsangiz, deyarli hammasining nomida "tez" soʻzini ishlatdim😁. Chunki ular anchagina tez (kamida soatiga 120-130 km), aksariyat hollarda 1 minut ham rejadan adashmay yuradi.

Internetda tez-tez poyezdlar kechikishini meme (rasm asosida hajviy tanqid) qilishadi. Bunda Germaniya temiryoʻl xizmati (Deutsche Bahn) nishonga olinadi😁. Chunki chindan baʼzida poyezd kechikib ketadi yoki oʻsha yoʻnalishda yurmay qoʻyadi. Koʻpincha ob-havo sabab yoki mashinist xodimlar yetishmasligi yoki ularning ish tashlash qilishi hisobiga. Ammo hurmatli Oʻzbekistonlik doʻstlarim, tasavvur qiling. Aytaylik misol uchun siz Gʻijduvon tumanining Gajdumak qishlogʻida turasiz. Sizning qishloqqa qoʻshni har bir qishloqda poyezd bekati bor va ularning hammasi Gʻijduvonga, Qiziltepaga, Navoiyga Vobkentga va Buxoroga... ketadigan temiryoʻllar bilan toʻr kabi bogʻlanib ketgan. Siz Gajdumakdan Buxorogacha soatiga kamida 120 km yuradigan poyezdda borib kelarmidingiz? Albatta-da. Endi uyqudan uygʻonib yuz-qoʻllarni yuvamiz va bu tushni taxminan 50 yilga esdan chiqaramiz🙊😁. Xuddi mana shu misoldagi vaziyatni man hozir Germaniyada koʻryapman.

Bu tizimning yana bir yoqimli jihati shuki, agar siz oyiga 49€ turadigan chipta (Deutschlandticket) xarid qilsangiz, mana shularning koʻpchiligidan (IC va ICE Zug lar istisno) bir oy davomida cheksiz marta tekinga foydalana olasiz. Shaxsan oʻzim bir safar 700 km uzoqlikdagi boshqa bir shaharga mutlaqo tekinga bordim :). Yanada qiziq tomonini keyingi postda, abtobuslar haqida yozganda aytib beraman😉.

Neʼmatjon Rajabov
04.01.2024
München

Talabalar haqida

Men ishlayotgan Praxisda tibbiyot universiteti talabalari ham ishlaydi. Ular Minijob (oʻzimizning tilda 0.25 stavka😁) qilishadi. Oyiga 2 yoki 3 kun peshingacha kelib xuddi manga oʻxshab MFA boʻlib ishlab ketishadi. 1 oy davomida taxminan 7-8 tacha talaba bilan birga ishlab ancha suhbatlashdim. Bizning Praxis Münchenda joylashgani sababli bizga shu shaharda joylashgan Germaniyaning anchagina nufuzli universitetlari (Technische Universität München, Ludwig Maximilian Universität München) tibbiyot fakulteti talabalari kelishadi.

Bu yerda hozir dunyoning rivojlangan davlati (Germaniya) talabalari bilan 3-dunyo mamlakati (Oʻzbekiston) talabalarini solishtirib kimnidir yuqori, kimnidir past oʻrinda koʻrmoqchimasman. Lekin shunchaki oʻzimdagi taassurotni sizlar bilan boʻlishgim keldi. Oʻzim kutganimdek chindan ham bu talabalarning saviyasi ancha yuqori ekan. Ular ingliz tilida bemalol gaplashishadi. Ishga jiddiy va masʼuliyat bilan qarashadi. Oʻzaro muloqotda oʻzini kamtar va samimiy tutadi, kibr yoki odamovilik sezmaydi odam bu talabalar bilan gaplashganda. Oʻzini tutishidan anchagina yetuklik sezasan kishi. Oʻzimning 2-3-kurs vaqtimni solishtirsam bularga nisbatan ancha gʻoʻr, noʻnoqroq va karaxtroq boʻlgan ekanman degan fikr miyaga keladi😁. Albatta ular yaxshi sharoitda oʻsib ulgʻaygan, bogʻchadanoq yaxshiroq taʼlim olgan, koʻplab oʻzbek talabalaridan koʻra yaxshiroq qoʻllab quvvatlov olishgan. Xullas yaxshi taʼlim olgan talabalar qanday boʻladi deganda shularni misol qilib koʻrsata olaman.

Bu aslida shunchaki oʻzimdagi taassurotni boʻlishish boʻlsa ham, bir narsani oʻzimizning talabalarga aytib oʻtishim kerak. Modomiki chet davlatda mutaxassis boʻlishni niyat qilgan ekansiz, bu yerda ingliz tilini bilganingiz yoki oʻzimizni institutlar mezoni asosida aʼlo oʻqiganingiz bilangina maqtana olmaysiz. Jiddiy raqobatga tayyor boʻlishni oʻzingizga maqsad qoʻysangiz, zarar qilmaydi😊. Ammo oʻzingizga ishonchni yoʻqotmang. Odam qilgan ishni odam qiladi. Shunday samarasiz oliy taʼlimda oʻqib ham oʻz ustida ishlab tillarni oʻrganayotgan talabalarga esa barakalla deyman. Siz toʻgʻri yoʻldasiz, boʻshashmang✊ Sizni ayovsiz raqiblar kutmoqda 😈.

PS. Motivatsion training ochib pul qilsam boʻlarkan ha😆

Neʼmatjon Rajabov
03.01.2024
München

​Ishim haqida

Man Myunxendagi xususiy oilaviy/terapevt shifokorlar punktida (Praxis für Allgemeinmedizin und Innere Medizin) tibbiy yordamchi xodim (Medizinischer Fachangestellter=medical assistant) boʻlib ishlayman. Oʻzbekistonda bu kasbning aniq alternativi yoʻq. Oʻrta tibbiyot xodimi desak boʻladi. Yana mana bu yerda bu kasb haqida yaxshi yoritishibdi.

Bizning Praxis da MFA lar ishi 3 ta guruhga taqsimlab berilgan.

1. Labor (laboratoriya va muolaja ishlari)
2. Anmeldung (bemorlarni qabul qilish, roʻyxatga olish, shifokor qabuliga navbat belgilash va boshqa Praxis menejmenti ishlari)
3. Springer (shu ikkala boʻlimda ehtiyojga koʻra almashib oʻtib turib ishlaydigan xodim)

Man Labor boʻlimida ishlayman. Man qiladigan ishlar:
✓ Bemordan laborator tahlillar uchun qon olish
✓ Vaksina qilish
✓ Qon bosimini oʻlchash
✓ EKG qilish
✓ 24 soatlik qon bosimi apparatini bemorga qoʻyish/olish
✓ 24 soatlik EKG apparatini bemorga qoʻyish/olish
✓ Vitamin preparatlarini inyeksiya qilish
✓ Antibiotik va temir preparatlarini infuziya qilish
✓ Spirometriya tekshiruvini oʻtkazish
✓ Peshobdan tayoqchali test olish (Urinteststreifen)
✓ Va shu ishlarning hammasini bemorlarning online kasallik tarixiga qayd etish

Bu ambulator tibbiy punkt boʻlgani uchun bemorlar faqat shifokor bilan maslahatlashib mayda muolajalar olib ketadi. Shuning uchun bu yerda hamshiralar emas MFAlar ishlaydi. Ishning asosiy va muhim qismi bu har bir qilingan tibbiy xizmatni qonuniy tartibda bemorlar maʼlumotlar bazasiga qayd etish hisoblanadi.

Hamkasblardan soʻrasam, bizning Praxis sharoitlari va texnologiyalari nisbatan eski deyishadi. Ammo harqalay Oʻzbekistonda man koʻrgan kichik tibbiy punktlar bilan solishtirsa bu yerda ishlash juda xavfsiz, qulay va samarali. Ishlatiladigan bir martalik tibbiy vositalar ishni ancha osonlashtiradi.

Oʻzimga yoqdimi ishim?
Ha va yoʻq😁. Ha deyishimga sabab, hamkasblar nihoyatda xushmuomala, yordamga tayyor va juda ham kamtar insonlar. 1-kuni bir shifokor opani oʻzini tutishidan MFA deb oʻylabman 😁 (Oʻzbekistonda tabaqalangan munosabatni koʻrib oʻrganganim taʼsiri shekilli 🤦🏻‍♂).
Yoʻq deyishimga sabab esa bu mani maʼlum nuqtagacha oʻsib keyin qotib qolishimga olib keluvchi ish hisoblanadi. Bu ishda uzoq qolib boʻlmaydi va qolmoqchi ham emasman.

Xullas shunaqa gaplar. Ishim jismonan qiyin emas ammo boshqa tilda fikrlash, gaplashish va bemor bilan doimiy jilmayib xushmuomala munosabatda boʻlish odamdan har qanday vaziyatda oʻzini bitta qiyofaga solib ishlashga majbur qiladi va kun oxirida odam aqliy charchab qoladi. Shu tomonini aytmasak, hozircha hammasi joyida. Keyingi postlarda koʻrishguncha.

PS1. Rasmda ishga kelib ketishimni roʻyxatga oladigan shaxsiy chip.

PS2. Nemischa qismini yozmaydigan boʻldim. Ham postlar uzun boʻlib ketadi, ham koʻp vaqt olar ekan, ham Google mandan yaxshiroq tarjima qilyapti🥲. Oʻzim uchun tarjima qilib oʻrganib qoʻya qolaman, sizlarni bezovta qilmay😄.

Neʼmatjon Rajabov
26.12.2023
Mönchengladbach

​🇺🇿 Kichkina yangilik

Asosan yaqin tanishlar va do'stlardan iborat bu kichkina kanal auditoriyasiga bir yangilikni ulashmoqchiman. Bu kanalni endi vaqtim va imkoniyatim boricha shaxsiy kundalik kabi yuritishga qaror qilyapman, ammo shaxsiy kundalikdan farqli va ayni paytda cheklangan tomoni bu yerda miyamdan o'tgan hamma shaxsiy fikrlarni ham yoza olmayman. Yozadiganlarim zerikarli yoki kimdir qo'shilmaydigan fikrlardan iborat bo'lishi mumkin, lekin fikrlarim vaqti kelib biror qiymatga ega bo'lar degan umiddaman.

Ochig'i hali format qanaqa bo'ladi o'zimda ham aniq bir tasavvur yo'q. Postlar asosan matn shaklida, ba'zan (ehtimol) rasm/video/audio shaklida bo'lishi mumkin. Nemis tilimga foyda berishi uchun postlar bir vaqtning o'zida o'zbek va nemis tillarida yoziladi. Xullas kanalda qolish-qolmaslik o'z ixtiyoringizda. Hammaga sog'lik tilayman.

PS. Selfie Myunxenga kelganimning 3-kunida (3-dekabr) Isar daryosi ustidagi Wittelsbacherbrücke koʻprigida olingan.

Ne'matjon Rajabov
Myunxen 22.12.2023
@nematjonrajabov


🇩🇪 Eine kleine Neuigkeit

Ich möchte zu den Abonnenten dieses Kanals, der hauptsächlich aus meinen Freunden und Bekannten besteht, eine Nachricht teilen. Ich habe vor, diesen Kanal als mein Tagebuch verwenden, wenn ich dafür Zeit und Möglichkeit habe. Allerdings ist dieser Kanal unterschiedlich und gleichzeitig begrenzt als ein persönliches Tagebuch, da hier man nicht alle Ideen teilen kann, die durch den Kopf gehen. Die Gedanken die ich hier schreiben werde können euch langweilig sein oder nicht alle könnten mir zustimmen. Aber ich hoffe, alles was ich hier schreibe irgendwann wertvoll sein kann.

Um ehrlich zu sein, ich habe immer noch keine Vorstellung, wie das Format dieses Kanals aussehen wird. Die Beiträge können in manchen Fällen aus Text bestehen oder manchmal (vielleicht) aus Bildern/Videos/Audios. Ich schreibe die Beiträge auf Usbekisch aber auch auf Deutsch, sodass sie nützlich sein können, um mein Deutsch zu verbessern. Es liegt also an euch, ob ihr auf dem Kanal bleiben möchtet oder nicht. Ich wünsche euch allen Gesundheit.

PS1. Tut mir leid für die Fehler😊
PS2. Das Selfie ist am 3. Dezember (3-Tag meiner Reise nach Deutschland) auf Wittelsbacherbrücke über die Isar in München gemacht.

Nematjon Rajabov
München 22.12.2023
@nematjonrajabov