Mutolaa olami

​#mutolaa

Erve Le Tellye. "Anomaliya".

Kitob yetkazilganida hali beri oʻqimasam kerak, deb oʻylagandim. Ammo bir kun ermakka 1-2 sahifa oʻqiganimdan soʻng, juda qiziqishim oshdi. Avvaliga bu kitobni detektiv yoʻnalishda deya tushunib, voqealar faqat jinoyatni kasb qilgan kishi atrofida aylanishini tasavvur qilgandim. Ammo bilsam, u ham zanjirning bir halqasi ekan, xullas, kitob men uchun ham anomaliya boʻldi)

Asar nafaqat hayotda duch kelish imkonsiz boʻlgan fantastik anomaliyalar haqida, balki atrofimizda uchrab turadigan anormal holatlar, noinsoniy illatlar haqida hamdir. Odam zoti baʼzan shunday ishlarga qoʻl uradiki, uning tubanligi oldida fantastika ip yecholmaydi(.

Asar haqida spoylersiz gapirish qiyin, chunki u toʻxtovsiz voqealar rivojidan iborat. Shu bois diqqatimni tortgan bir parcha haqida aytib beraman:
Pandoraga toʻy sovgʻasi sifatida berilgan va aslo ochmaslik kerakligi aytilgan qutida insoniy baxtsizliklar yashiringan va ular orasida umid ham sanalgan. Umid qoʻllarimizni bogʻlaydi, musibatlarimizni uzaytiradi..
Qizigʻa? Biz hayotimizning har onida umid bilan yashaymiz, har qanaqa qiyinchilikni yengishda bilagimizdagi kuch, ongimizdagi bilim emas, umid bizga yordam beradi, ..baʼzan yaqinlarimizning notoʻgʻri munosabatiga ham sabr qilamiz, yaxshi boʻlib ketishi umidida. Baʼzan nohaqliklarga ham indamaymiz, ..nimanidir umid qilib..

Xullas, umid unchalik ham yomon narsa emas, axir usiz yashay olarmidik? Umid boʻlmasa, insoniyat, umuman hayot davom etmayotgan boʻlardi. Ammo unga taʼrif berish baribir odamning ruhiy holatiga bogʻliq).

Xullas, oʻqing. Asarni, ehtimol, qayta-qayta oʻqishga hojat yoʻqdir, (D.Braun asarlari ruhini sezdim men) ammo hayotingiz haqida yana bir bor oʻylab koʻrishga undaydi.

Yaxshi kitoblar mutolaasidan charchamang, doʻstlar 💚

@mutolaa_olami

​#salomatlik

Bolaligimdan buyon qadrdonim boʻlib qolgan tomoq ogʻrigʻi yana mehmon boʻlib turibdi. Shunchalik koʻp dorilarni sinab koʻrganmanki, qaysisi qanaqa foyda berishi haqida doktorlardan aniqroq tavsiya bera olsam kerak.

Yaqinda qalampirmunchoq haqida maʼlumot oʻqib qoldim, undan 2-3 ta olib, ogʻizda chaynab yurilsa, tomoq ogʻrigʻi uchun ham, immunitet va gigiyena uchun ham juda foydali ekan.

Sogʻlom hayot kanalidan kurkuma ham qoʻshib buyurtma qildim bugun. Tez yetkazishgani uchun rahmat.

Salomatligingizga eʼtiborli boʻling, doʻstlar💚

​#Onamni_asra

Koreys adabiyotidan ilk mutolaam "Onamni asra" kitobi boʻldi. Ajoyib, taʼsirli kitob, ammo yakından xafaman. Soʻnggi qatorgacha onasining topilishini umid qilib kutgandim axir(..

Aslida tiriklikning eng katta sovgʻasi ona mehri boʻlsa kerak, bu qadar issiq va sof, tuganmas mehrni inson boshqa hech kimdan ololmaydi.Qachonlardir aytganim kabi onalik - bu biror kishiga mamnuniyat bilan qullik qilishdir. Shu "qullik"ni deb onalarimiz birgina umrini, sogʻligini, yoshligini qurbon qiladi.

Bolalik suratlarimiz yoki videotasvirlarni koʻrib qolsam, faqat bir sabab bilan oʻsha paytlarga judayam qaytgim keladi, oʻsha vaqtdagi ota-onamiz yosh, sogʻlom edilar. Har kuni dori ichmasdilar, oyoqlari ogʻrimasdi..

Bugun shu asarni oʻqib tugatar ekanman, koʻz oldimdan ikki siymo ketmay qoldi(mening otam dunyodagi eng yaxshi dadalardan biri, fidoyilikda onamdan ortda qolmaganlar). Dadam ishga ham, oilaga ham juda masʼuliyatli insonlar, yana shu masʼuliyat tufayli hech bir yotib davolanmaydilar. 3 yil oldin, "qizim, sening toʻyingdan soʻng bemalol davolanaman" derdilar, mana, qizim yaqinda 2 yoshga toʻladi hamki, haliyam tuzukroq davolanganlari yoʻq. Vaholanki, iqtisodiy tomonlama hech qanday muammo boʻlmagan. Ammo ikkovlari ham farzandlarini ortiqcha urintirmaslik uchun(shu ham sababmi endi!?) davolanishni doim ortga surib kelishadi.

Aziz onajonlar, dadajonlar, oʻzingizni birinchi oʻringa qoʻying endi. Axir siz bizga faqat borligingiz bilan tayanch boʻla olasiz, bizning choʻkib, sinib qolishimizni xohlamasangiz, oʻzingizni ehtiyot qiling, qoʻying fidokorlikni, kap-katta odamlarmiz axir. Buyogʻiga faqat joningizni avaylang. Ishingizga ham, oilangizga ham faqat sogʻlom holingizda yordam qila olasiz, axir shu yordam uchun kun-u tun chiranmayapsizmi!? Oʻzingizni ehtiyot qilishingiz, sogʻligingizga eʼtiborli boʻlishingiz eng katta yordam biz uchun!

​Syuzanna Tamaro. Yuraging chorlagan yerga bor.

Inson boʻlish ham mukofot, ham jazo. Hayot kishiga turli sinovlar beradi, yelkasiga turli darajada masʼuliyat yuklaydi va bularni ado etishga majbur.

Shunday vaziyatlar boʻladiki, borliqda oʻzingni butkul begona his qilasan, qayerlargadir bosh olib ketging, ichingdagi sitamlar bilan yolgʻiz qolging keladi. Ammo aynan kim yoki nimagadir masʼullik, burchlar bunga yoʻl qoʻymaydi.

Baʼzan esa eng yaqin insonlariga ham begonalik his qiladi kishi, yoshligida ota-onasi, yaqinlari unga goʻyoki dushman, tanish-oʻrtoqlari esa haqiqiy hamdam boʻlib tuyulsa, yosh oʻtgach, oʻzi mehr berib oʻstirgan farzandlari tomonidan shu munosabat badalini oladi.

Oʻsmirligimda ota-onam meni boqib olishgan boʻlsa kerak, deb oʻylardim. Oynaga qarab, soatlab bunga asoslar qidirardim, negaki, qiz bolaligim uchun meni akalarimdan koʻproq tergashardi-da. Keyin esa bu taxminlarim chippakka chiqdi: onam bilan xollarimiz oʻrni bir xil edi:)

Sal oldin 13 yoshli jiyanim onasidan shikoyat qilib keldi, uni hamma: oʻqituvchilari ham, kelinoyim(onasi) ham yomon koʻrishini, unga doim ataydan yomon munosabat qilishlarini aytdi, beixtiyor kuldim), hozir kimdir kimnidir yomon koʻrishga ham vaqti bormikan?

Hozir esa meni kelajak tashvishga soladi, ayni paytda menga koʻzlarini toʻldirib boqadigan, butun borligʻim boʻlgan qizim ham shunday holga keladimi..? Aslida hozirgi oʻsmirlar ahvolini koʻrib, yanada xavotirga tushaman: Daryo ham shunga oʻxshaganlar bilan oʻrtoq boʻladimi, shu muhit kutib turibdimi deya.

Xullas, hayot juda murakkab. Ulgʻaygan sari fikrlar oʻzgarib, qarashlar shakllanib boraveradi va bu yaqin avlodlar oʻrtasida ham ziddiyatlar paydo qilaveradi. Mazkur asar ham buvi va nabira munosabatlarining avvaliga samimiy, soʻngra hazin ruhidan hikoya qiladi.
Asarda aytilganidek, biror kishiga baho berish, u haqida hukm chiqarishdan oldin uning "kavushi"ni 1 oy kiyib yurish kerak, yaʼni birovning vaziyatini toʻliq anglamasdan turib hukm qilib boʻlmaydi ham aslida, hozir koʻrganimda tepa sochim tikka boʻladigan talabalar, oʻsmirlarni ham qaysidir jihatdan tushunish kerakdir. Balki, oʻzimiz ham qachonlardir shunday boʻlgandirmiz, xullas, Xarper Li aytganidek, aslida hamma odam yaxshi, qachonki ularni tushuna boshlaganingda (ayni paytdagi kayfiyatim bilan bu fikrga yon bosmayman, mayli, siz qoʻshilib turing:))

Har bir oʻsmir, har bir yosh, har ota-ona/bobo-buvi oʻqishi kerak boʻlgan kitob. Avlodlar oʻrtasida davriy oʻzgarishlar tufayli kelib chiqadigan muqarrar ziddiyatlar va ularning rivojini kuzatish, natijada shaxsiy yechim topish uchun ham albatta, oʻqish kerak.

Yaxshi kitoblar mutolaasidan charchamang, doʻstlar)

@mutolaa_olami