#men_tugatgan_kitob #challenge
Aleksandr Dyuma – If qal’asining mahbusi~Graf Monte-Kristo(I qism)
Odatda biz boshimizga tushadigan mushkulotlar, qiyinchiliklar, xatolarni yoqtirmaymiz. Ammo ular har doim ham bizning ziddimizga xizmat qilavermaydi. Ularning ba’zilari bizning ruhiy ongimizni o‘stirib, O‘zini yaxshiroq tanishimizga, "Hayotga nega keldigu nima uchun yashayapmiz?", kabi savollarimizga javob topishda mash’ala bo’lib xizmat qiladi.
Asarning asosiy qahramoni bo’lgan Edmon Dantesning ham boshiga kutilmaganda qiyinchilik tushadi. Uni o’zining aloqasi yo‘q bo‘lgan ayb bilan, "do‘st"larining xiyonati tufayli hech kim qochib qutula olmaydigan qal’aga mahbus qilishadi. Biri boylik, biri mansab, biri muhabbat uchun uni shu ko‘yga solishadi. U shularning qurboni bo‘ladi. U sevimli otasini, suyukli bo‘lajak yorini, mansabini yo‘qotdi. Yuqorida ta’kidlaganimdek qamoqdagi hayot uning uchun hayotning tugashi emas, haqiqiy hayotning boshlanishi uchun bir darcha vazifasini o‘taydi.
Do‘sti abbat Fariadan qamoqda ilm oladi. U shunday deydi: "Insonning bilimi nihoyatda chegaralangan, men sizga matematika, fizika, tarixni va o‘zim bilgan uch-to‘rt tilni o‘rgatganim bilan, baribir, men bilgandan ortiq ilm ololmaysiz, men o‘z bilganlarimni sizga uzog‘i bilan ikki yil ichidayoq o‘rgatib qo‘yaman". Mana shu ikki yil ichida o‘rganganlari Edmonning keyingi hayotida asqotadi. (Menga eng yoqqan qismlar shu bo‘ldi)
Ular birgalashib qochish rejasini tuzishadi, baxtga qarshi Abbat Faria olamdan ko‘z yumadi. Ammo uning o‘limi Edmon uchun qochish eshigi bo‘lib xizmat qildi. U ozodlikka chiqqandan so‘ng do‘sti meros qoldirgan ulkan xazinaga ega bo‘ldi. Qamoqda toblanib chiqqan qahramonimiz unga yaxshilik qilganlarni taqdirlab, uni shu ko‘ylarga tushishiga sababchi bo‘lganlardan qasos olishni maqsad qiladi. Uning o‘z o‘lchovlari bor, u kishilarni jamiyatdagi qonun-qoidalar asosida emas, o‘zining qonunlari asosida so‘roq qiladi. U goh Graf Monte-Kristo, goh abbat Buzoni,goh lord Uilmor qiyofasiga kiradi. Maqsadiga yetishish uchun hech narsadan tap tortmaydi. Uning o‘tmishi qolganlar uchun sirligicha qolaveradi. Hozircha esa uning aynan nimani maqsad qilgani menga qorong‘u. Ikkinchi qismda aytib beraman.
Iqtiboslar.
"Inson boshiga musibat tushsa, Xudoga iltijo qilishi kerak, lekin u hech kimdan, hech qayerdan najot topolmagachgina Xudoga murojaat qiladi".
" Xavf, vahima kishini gapga juda chechan qilib qo‘yadi."
" Biz ko‘pincha, baxtimiz qushi yonidan uni ko‘rmay, unga nazar tashlamay o‘tib ketaveramiz, nazar tashlasak-da, tanimay o‘tamiz."
"– Xudoning oliy, odil sudi kechikyapti biroz, shuning uchun uning marhamatidan chetda qolayotgandek sezamiz o‘zimizni. Biroq vaqti soati kelib Tangrim bizni ham yorlaqaydi, mana uning dalili."
@mutafakkira
