🔺Joriy yilning 10-avgust kuni Innovatsion rivojlanish agentligida Respublika ixtisoslashtirilgan akusherlik va ginekologiya ilmiy-amaliy tibbiyot markazi hamda “Pharmgroup Equipment Devices” korxonasining rahbariyati bilan uchrashuv bo‘lib o‘tdi.

Uchrashuv davomida tijoratlashtirish, ilm-fan va ishlab chiqarish integratsiyasini ta'minlash maqsadida O‘zbekiston Respublikasi hududida bachadon bo‘yni saratonini erta bosqichda aniqlash hamda suyuqlikka asoslangan sitologiyani o‘tkazish uchun diagnostik test-tizimlarini yaratish va ishlab chiqarish loyihasini amalga oshirish masalalari muhokama qilindi.

Kasallikning erta tashxisi - profilaktika va dori terapiyasi samaradorligini oshirishning effektiv yondashuvi hisoblanadi. Aniq va o’z vaqtida qo'yilgan tashxis vaziyatni aniq baholash hamda tegishli sog'liqni saqlash choralari tizimini tanlash imkonini beradi. Shulardan kelib chiqqan holda xavfli va ijtimoiy ahamiyatga ega bo'lgan kasallik - bachadon bo'yni saratonini tashxislash uchun zarur bo`lgan hamyonbop diagnostika test-tizimlarini ishlab chiqish dolzarb ahamiyatga ega.