Yurtimizda chet tillarini oʻrganishga alohida e'tibor qaratilmoqda. Ba'zi faollar chet tiliga qaratilgan e'tiborni oʻz ona tilimizga ham qaratishni ta'kidlashmoqda. Umuman olganda, jamiyatning turli qatlamlarida chet tili va oʻzbek tilining rivoji boʻyicha kelishmovchiliklar yuzaga kelmoqda.
Hech kimga sir emaski, mamlakatimizda chet tillarining nufuzi tobora ortib bormoqda.Qolaversa, jamiyatimizdagi turli odamlar oʻrtasida ona tilimiz va chet tillarning taraqqiyoti xususida keskin ziddiyatlar paydo boʻlmoqda. Ayrim yetakchilarning fikricha, yoshlarning xorijiy tillarga boʻlgan qiziqishi oʻz ona tilimiziga qaratilishi lozim. Xoʻsh, aslida, qay bir yondashuv yoshlar uchun manfaatli?
Hozirgi globallashuv davrida chet tillarini oʻrganishga boʻlgan talab kundan kunga kengayib bormoqda. Chet tillarini oʻrganishning ijobiy jihatlari talaygina.Eng avvalo, yoshlarning chet tillarini oʻrganishi davlatning ijtimoiy-iqtisodiy hamda moliyaviy taraqqiyotiga salmoqli hissa qoʻshadi. Ya'ni ularning chet tillarini bilish qobiliyatlari jahonning rivojlangan davlatlaridagi tadbirkor fuqarolar bilan hamkorlik aloqalarini yoʻlga qoʻyishiga yordam beradi. Ikkinchidan, Prezidentimiz Shavkat Mirziyoyevning tashabbusi va talablariga binoan chet tillarini bilgan shaxslarga til sertifikatlari joriy qilinmoqda va ularga keng imkoniyatlar yaratib berilayotgani ishonarli hol.Masalan, Oʻzbekistonda tashkil qilingan Cefr imtihonida aksariyat yoshlar oʻz bilim va koʻnikmalarini namoyon qilib, yuqori natijalarning sohibi, sohibasi boʻlishmoqda.Qolaversa, chet tillarini oʻrganish xorijiy mamlakatlarga sayohat qilib, oʻsha hududning madaniyati, urf-odat va an'analaridan voqif boʻlishga, xususan, ta'lim tizimidagi kashfiyotlarini bilish imkonini beradi. Shuningdek, Xiva xonligi davrida yashab ijod qilgan shoir Avaz Oʻtar koʻplab tillarni bilishning foydasi haqida shunday degan : "Har tilni biluv emdi bani odama jondur. Til vositayi robitayi olamiyondur".
" Har toʻkisda bir ayb" deganlaridek, chet tillarini oʻrganishning salbiy jihatlari ham yoʻq emas.Avvalambor, ayni paytda koʻplab insonlar kundalik suhbatlarida, hattoki jamoat joylarda ham har bir gapiga chet tillaridagi soʻzlarni qoʻshib gapiradi. "Ну", "yes", "да" kabilar shular jumlasidandir. Bu vaziyat oʻz ona tilimizni yoʻqotishimizga hamda uning oʻlik tillar safidan joy olishiga olib kelishi mumkin.Ikkinchidan, chet tillarini oʻrganish koʻp vaqt talab qiladi. Chunki inson biror bir tilni mukammal bilishi uchun muntazam oʻqishi, oʻz ustida ishlashi darkor. Ushbu jarayonlarga erishishda inson butun kunini ma'lum bir chet tilini oʻrganishga bagʻishlashi shart. Uchinchidan, chet tillarini biladigan shaxslar boshqa davlatlarga borganda oʻzining mahalliy madaniyati va xorij madaniyatlari oʻrtasidagi keskin tafovutlarni his qiladi. Qolaversa, bu davlat taomlari va urf-odatlariga moslashishi qiyin kechadi. Misol uchun, mashhur bloger, IELTS dan 8.0 sohibasi Nigina Muzaffarova qariyb 4 yildan buyon Amerikaning nufuzli xalqaro universitetlaridan biri boʻlgan Stenfordda tahsil olib kelmoqda. U ancha yildan buyon ushbu mamlakatda istiqomat qilib kelayotgan boʻlsa-da, lekin hali-hanuz yashayotgan joyidagi ovqatlardan qoniqmayatganini ta'kidlaydi va ba'zi ovqatlanish markazlari ustidan e'tiroz bildirmoqda.
"Qars ikki qoʻldan chiqadi" deganlaridek, ona tilini oʻrganishning kamchilik taraflarini yoritishni o'rinli deb topdim.Birinchidan, ona tilida soʻzlar shu qadar koʻpki, uning mazmunini topib, anglab yetish uchun umrimizning yarmini baxshida etishimiz darkor. Bundan tashqari, ona tilimizda xilma-xil grammatik qoidalar, qadimgi soʻzlar mavjud. Ular yoshlarni mahalliy tilni oʻrganish davomida bir qancha qiyinchiliklarga roʻbaroʻ boʻlishiga majbur qiladi.
Boshqa tomondan olib qaralganda, ona tilini chuqurroq oʻrganishning bir qator ustun tomonlari bor. Birinchi navbatda, ona tilini oʻrganish insonlarning soʻz boyligi oshishiga, ya'ni notiq boʻlishiga koʻmaklashadi. Bu esa katta-katta minbarlarda, telekoʻrsatuvlarda, koʻrik-tanlovlarda barchaga birday asqatadi.
