Maxmudovning Tajribasi

Naqadar ojizmiz

Ramazon oyida inson juda muloyim va yaxshi boʻlib qoladi. Bunga sabablar koʻp boʻlishi mumkin, lekin men koʻproq sababchi deb nafsimizni tiyilishi deb oʻylayman. Chunki odam toʻq paytida umuman boshqacha boʻlishi hammamizga maʼlum.

Qornimiz toʻq paytida ochlarni oʻylamaymiz, pulimiz koʻp paytida esa hamma narsani sotib olishga qodirdek oʻzimizni tutamiz. Aslida esa juda ojiz insonmiz va hozirdagi arzimas suvni ichmaganimiz uchun ham holsiz yuribmiz.

Ustozlar ilm olishda ham talabani koʻproq och boʻlishi kerakligini tavsiya qilishadi, chunki qorin toʻq paytida hech nima yoqmaydi va doimo uyqu tortadi.

Ramazon oyida ham imkon qadar koʻproq foyda olishga, zararli odatlarimizdan qutulish ayniqsa dangasalikni yangishga harakat qilaylik. Bu narsani eng avvalo vaqtni uvol qiluvchi tarmoqlardan kechish bilan boshlasak ham ayni muddao boʻladi.
Foydali oyda foydali amallar koʻproq foyda berishi aniq!

@Maxmudovning_tajribasi

Vaqtim yoʻq

❓Vaqtim yoʻq deydigan odamdan soʻrab koʻraylik:
- Ovqat yeyaptimi?
- Kam boʻlsa ham uxlayaptimi?
- Yuvinish yoki choʻmilishga imkon topyaptimi?

Agar u insonning javobi xa boʻlsa demak "vaqtim yoʻq" shunchaki bir bahona.

Odam oʻzi uchun kerak narsaga doimo vaqt topa oladi. Agar vaqt haqiqatdan kamlik qilsa boshqa narsa, masalan, uyqusini qurbon qilib kerak vazifalarni bajarishi mumkin.

Ozimizni aldashni bas qilaylik...

@Maxmudovning_tajribasi

Yosh bloglar nega uzoqqa bormaydi?

Oxirgi paytlar hamma blog oshayotganiga guvoh boʻlyapmiz. Bu albatta yaxshi, blog yuritish orqali masʼuliyatni oshirish, oʻzida bor ilmlarni ulashish va yaqin insonlari bilan oʻzaro fikr almashishlari mumkin.

Lekin shu yangi bloglar nega "uzoqqa bormayapti"? Shu narsani imkon qadar, tajribadan kelib chiqib tahlil qilamiz:

1. Yangi blogerlar blog nimaligini uncha yaxshi bilishmaydi. Blogida asosiy kontent turli manbalardan boʻlgani sababli ham insonlarga takroriy maʼlumotlarni kuzatish zerikarli tuyuladi. Blogingizda oʻzingizni shaxsiy fikr va mulohazalaringizni matn, video yoki rasmlar bilan ulashinishi auditoriyangiz uchun qiziqroqdir.

2. Yangi bloglar koʻpincha maqsadsiz ochiladi. Aniq missiyasi boʻlmagani sababli har kuni yoki kunora nima yozishni bilishmaydi, ketma-ketlik yoʻqligi sababli ham blog biroz betartib holatga kelib qoladi.

3. Ommalashtirishni bilishmaydi. Agar siz telegram tarmogʻida blog yuritishni boshlagan boʻlsangiz blogni mashhur boʻlishi uchun 2 ta yoʻlingiz bor:
- Juda ajoyib kontent ulashishingiz sababli mavjud obunachilarni oʻzi blogingizni hamma joyda ulashishi sababli obunachilar koʻpayadi.
- Yaxshi kontent + reklama. Telegramda instagram kabi рекомендация yoʻqligi sababli blogingiz oʻz oʻzidan hammaga koʻrinmaydi. Blogingizga mos kanal yoki bloglarda rekalam sotib olishingiz kerak boʻladi.

Umuman olib qaraganda juda koʻp kamchiliklar haqida yozishimiz mumkin. Lekin yaxshi niyat, aniq maqsad va samarali harakat sababli "qalbdan chiqqanini qalblarga yetkazish mumkin".

@Maxmudovning_tajribasi

Kitob yoqmasa oʻqib vaqtni ketkazmang!

Biror nimaga koʻp eʼtibor bersa tez zerikuvchi inson boʻlganim uchun bir nechta kitoblarni oʻqishni birdaniga boshlayman. Oʻqiyotgan kitoblarim orasida yoqmagani boʻlsa tezlik bilan voz kechaman, chunki befoyda deb hisoblagan kitobingizdan foyda olish qiyin masala.

👎 Yaqin kunlarda "voz kechgan" kitoblarim haqida aytib oʻtaman:

• Klaus Shvab: To'rtinchi sanoat inqilobi
Bu kitobni deyarli oʻqib tugatdim, ichidagi bir dona fikrgina menga yoqqandi. U ham boʻlsa zamonaviy texnikalar orqali topilgan yechim biror nimaga ega boʻlmay ham foyda berishi mumkinligi edi. Masalan, yandex taksi - ular biror davlatga kirishda oʻzini moshin va haydovchilari bilan emas, dasturiy yechimi bilan kirib keladi va istagan natijasiga erishadi.
Kitobni yoqmagan jihati esa menimcha murakkabligi va muallifni konferensiyadagi narsalarni koʻp eslagani deb oʻylayman.

• Malkolm Gladuell: Zukkolar va landavurlar
Yaqinda boshladim va oʻqimayman dedim. 1-bobidagi "yil boshida tugʻilganlar yil oxirida tug'ilganlardan kuchli va aqlli boʻladi" mazmunidagi fikrdan soʻng kitobdan koʻnglim qoldi. Ham desa kitobda bir fikrni uzoq choʻzib, turli hikoyalar asosida berishi meni zeriktirdi.

• Piter Til, Bleyk Masters: Noldan birga. Startaplar haqida qaydlar yoxud kelajakni qanday qurish mumkin
Bu kitobdan kechmadim, keyinroq oʻqisam kerak deb olib qoʻydim. Audiosini eshitib boshlaganimdan 0 dan 1 ga erishish fikri sababli Alloh ilhom berib, bir ajoyib fikr hayolimga kelgani sababli kitobni keyinroq toʻliq oʻqib chiqish niyatim bor. Hozir tugatmaganimga sabab esa startup sohasidan uzoqligim uchun tushunarsiz tuyulgani boʻlsa kerak.

• Barbara Oukli: Raqamlar uchun yaralgan idrok. Matematika va tabiiy fanlarni qanday qoyillatsa bo'ladi
Kitobni endi boshladim, hozircha yomon deyolmayman. Lekin kitobni nomidan kelib chiqib juda zoʻr natija kutmayapman. Balki koʻproq oʻqishim natijasida matematika, tabiiy fanlarda tashqari boshqa sohalarni oʻrganishda qoʻllash mumkin boʻlgan biror foydali jihat olarman degan niyatdaman. Vaqt koʻrsatadi...

📲Yuqoridagi barcha kitoblarni Asaxiy Books dasturi orqali o'qiganman. Faqat birinchisini qogʻoz versiyasini oʻqib, keyin sotib yubordim.

Kitob oʻqish kerak ekan deb duch kelgan kitobni oʻqimang. Koʻp oʻqib, kam amal qilgandan koʻra aksi boʻlishini intilaylik. Bek Olimjon aka aytganlaridek kitobni muammodan kelib chiqib tanlash menimcha ham eng yaxshi tanlov boʻladi.

@Maxmudovning_tajribasi

Talabalarga tajribali talabadan tavsiyalar!

🎓 2015-yil Toshkentdagi Irrigatsiyaga grant asosida oʻqishga kirganman va 2021-yil magistraturani ham grant asosida oʻqib tugatgandim. 6 yil talaba boʻlish baxtiga erishgan talabalardan biri sifatida oʻzimni tajriba va xulosalarimdan hozirda talaba boʻlib yurgan akademiklarga ulashmoqchi edim.

• "Ishga kimdir olib kirib qoʻyadi" deb bemalol boʻlmang, hozir zamon juda tez oʻzgaryapti, sizga ish beraman degan odam siz oʻqishni bitirgunizcha oʻzi ishsiz qolishi mumkin.

• Baho uchun oʻqimang! Ishga kirishda yoki hayotda oʻz oʻrniningizni topishingizda diplomingizni rangi qizil yoki tillarang ekanligini ahamiyati yoʻq.

• Faqat oʻqish bilan cheklanib qolmang. Oʻqishdan tashqari oʻqiyotgan sohangizga oid ishda tekinga boʻlsa ham ishlang, tajriba olasiz. Yoki IT va shunga oʻxshash sohada qoʻshimcha biror hunarni egallang, zarar qilmaydi.

• Biror xorijiy tilni oʻrganing. Uyingizdan farqli ravishda oʻqish joyingiz shahar markazida boʻladi. Shaharlarda esa oʻquv markazlari yetarlicha. Hech boʻlmaganda ingliz tilini oʻrganib qoʻyavering, qachondir albatta foydasi tegadi.

• Talaba boʻldim deb koʻnglingizga kelgan narsalarni qilib, turli rasvo ishlarga aralashib qolmang. Qilayotgan ishingizni yaxshi yoki yomonligini osonlik bilan aniqlashni imkoni bor: "Qilayotgan ishim haqida ota-onamga bemalol, maqtanib aytib berolamanmi?" deb oʻzizga savol bering.

• Hech boʻlmasa talabalik paytida kompyuterni oʻrganib qoʻying. Bu yogʻiga endi hamma narsa kompyuter orqali boʻladi. Katta tashkilotlarda ishlovchilar ham hozirda Excel'ni bilishmasligi uyat deb oʻylayman. Oʻzim ham oʻqishga kirgandan keyin kompyuterni oʻrganishni boshlagandim, hali ham oʻrganyapman ).

• 4 yil ichida qandaydir ijobiy oʻzgarishga erishing. Oʻqishga ketgan paytingiz ota-onangiz hammaga "Oʻgʻlim yoki qizim oʻqishga kirdi. 4-5 yildan keyin zoʻr boʻlib qaytadi" deb maqtanishadi. Siz esa oʻqishdan qoʻlizda karton qogʻozi bilan, miya esa eski holatda kelishdan uyaling. Hech boʻlmasa oilangiz uchun ijobiy oʻzgarishga harakat qiling!

• Sizni chalgʻituvchi har qanday narsa va insonlardan keching! Instagram katta ehtimol bilan faqat bekorchilik uchun kerak (agar tirikchilik shundan boʻlsa tushunsa boʻladi), bekorchi doʻstlar ham kerak emas, ular sizni oldinga emas orqaga ketishingizga "ko'maklashadi".

• Talabalik paytida xato qilish, oʻrganish mumkin. Ertaga ishga kirganda xato qilishingiz "o'z xohishingiz bilan ariza" yozishingiz bilan tugashi mumkin. Shunday ekan talabalik davridan maksimal foydalaning.

• Kunduzgi, kechki yoki sirtqi oʻqishingizdan qatʼiy nazar yuqoridagi tavsiyalarga amal qiling!

Bunday tavsiyalarni minglab yozishim mumkin, lekin dono insonga 2 ta gap ham yetarli boʻladi. Avvalo bir oʻtirib oʻzingiz bilan gaplashib oling: Nega dunyoga keldingiz? Nima missiyangiz bor? Oʻqishga kirib, kelajakda qaysi kasb egasi boʻlmoqchisiz? Yana qanday qoʻshimcha kasblar (aytaylik IT'dan) ni egallasangiz boʻladi? va h.k

🚪 Agar mendan qandaydir maslahat kerak boʻlsa eshigim doimo ochiq: @wmteam95

@Maxmudovning_tajribasi

Idish emas, uning ichidagi muhim

Universitetni bitirib, ishda muvaffaqiyatlarga erishgan bir guruh bitiruvchilar qari professorlarining uyiga mehmonga kelishdi. Bir ozdan so‘ng suhbat mavzusi og‘ir mehnat va hayotdagi muammolarga burildi. Professor oshxonaga kirib qahva tayyorladi va mehmonlar oldiga olib chiqdi. Qahva turli finjonlarga quyilgandi — finjonlar chinni, shisha, plastik, metall, billurdan tayyorlangan, bejirimi ham oddiysi ham, arzoni ham, qimmati ham bor edi.

Mehmonlar finjonlarni qo‘llariga olishganidan so‘ng professor dedi: E’tibor bergan bo‘lsangiz, hammangiz qimmatbaho va chiroyli finjonlarni tanladingiz. Oddiy va arzon finjonlardagi qahvani hech kim olmadi. Sizlarning muammolaringiz sababi faqat eng yaxshi narsaga ega bo‘lish istagidir. Shuni bilingki, finjon qahvani shirin qilmaydi. U ba’zan qimmat bo‘lishi, lekin ichidagi esa hech narsaga arzimaydigan narsa bo‘lishi mumkin. Aslida sizlarning maqsadingiz finjon emas, qahva edi. Ammo sizlar eng yaxshi finjonlarni tanladingiz. So‘ngra kimga qanaqa finjon tegganligiga e’tibor qaratdingiz.

Endi esa gapimga quloq soling: hayot bu qahva, ish, pul, mansab jamiyat esa finjonlar. Ular hayotimizni davom ettirish uchun shunchaki vositalar xolos. Biz qanday finjonga ega bo‘lishimiz hayotimizni belgilab bermaydi va uning sifatini o‘zgartirmaydi. Ba’zida finjonga tikilib qahvaning ta’midan lazzat olishni unutamiz. „Qahva"ngizdan zavq oling!

O'zimda ham ba'zan keraksiz narsalarga juda ko'p e'tibor berishim sababli kerakli narsalarni qilolmayman, bunday chalg'ishimga sabab balki keraksiz ishlarning "chiroyli idishlar"da ekanligi yoki kerakli ishni aniq bilmasligimdir. Hayotimizdan zavq olishimiz uchun avvalo bu hayotda nimaga yashayotganimizni aniqlab olishimiz va kelajakdagi maqsadlarimizni belgilagan holatda davomli qadam tashlashim kerak bo'ladi. Agar maqsadimiz aniq bo'lsa bizni hech qanday "bejamdor buyumlar" chalg'ta olmaydi.

@Maxmudovning_tajribasi

Nomzodlardan nimalarni soʻrar edingiz?

Bir kuni hayolimga "men biror kompaniyani HR yoki rahbari bo'lsam va meni kompaniyamga ishga kirmoqchi bo'lganlar bilan suhbat qilish paytida ularning qanday xodim ekanligini qanday aniqlasam bo'lar ekan?" deb o'ylab qoldim. Ishga kirmoqchi bo'lganlarni 2 guruhga bo'ladigan bo'lsak: oldin ishlagan (tajribasi borlar) va o'qishni endi bitirganlar (hali hech qayerda ishlamagan). Ularni ichidan ishlaganlarni qilgan ishlari va tajribasi asosida oson filtrlash mumkin deb o'yladim va ishga kirishga talabalar kelsa qanday savol-javob qilishim kerak deb o'yladim.

O'zim ham 6 yil OTM'da o'qiganim uchun o'zim va kursdoshlarim ichida vaqtidan unumli foydalangan, o'z ustida ishlagan va umuman aytganda borayotgan ishiga tez kirishib, o'rganib ketish ehtimoli bo'lgan insonlarni bir qancha omillar orqali ajratib olish mumkin deb o'yladim.

Agar men kompaniya ochsam yoki qaysidir kompaniyaga talabalarni ishga olishda suhbat qilishim kerak bo'lsa quyidagi savollarni berib, ular haqida imkon qadar to'g'ri va to'liqroq xulosa chiqarishga harakat qilardim:

1. Suhbatga kelgan talabani diplomini chekkaga qo'yib (qizil, tilla rangda bo'lsa ham), o'qishda nimalarni o'rganganlarini qisqacha aytib berishini so'rar edim. Shu orqali haqiqatdan o'qish payti sohasini o'qigani haqida tushuncha hosil qilardim.

2. OTM'dan tashqari qayerlarda va nimalarni o'qiganini so'rar edim. Udemy, YouTube'da o'zini sohasi yoki boshqa qiziqqan sohasi bo'yicha biror kursni mustaqil o'qiganmi? Kurslarga qatnashganmi? Umuman bekor vaqtini qanday o'tkazganiga qiziqar edim. Bu jihat men uchun qiziq, chunki ish payti ham bo'sh vaqt bo'lganda yangi ishchi instagram ko'rib o'tirganidan ko'ra ish yoki kelajakda o'ziga kerak bo'ladigan biror nima bilan shug'ullanishi ancha foydaliroq.

Hozircha hayolimga kelgan savollar shular, balki kompaniya ochgunimcha yana savollarim paydo bo'lar )

Siz kelgan nomzodlardan nimalarni so'ragan bo'lar edingiz?

@Maxmudovning_tajribasi

Istalgan narsani bepul oʻrganish yoʻli

Kecha kechqurun mana bu videoni koʻrish davomida mustaqil va bepulga istalgan narsani oʻrganish mumkin teoriyasi hayolimga kelib qoldi. Aslida biror nimani oʻrganish uchun bizga oʻquv materiallari, aniq oʻquv rejasi va nazorat qiluvchi ustoz kerak boʻladi.

📄 Hozirda yuqorida sanaganlarimni tekinga topish yoʻllarini koʻrib chiqamiz:

1️⃣Oʻquv qoʻllanmalari. Bu oʻrinda YouTube'dagi bepul videodarslar birinchilardan boʻlib hayolga keladi. Boshqa saytlardagi matn yoki video maʼlumotlar ham bizga yetarlicha bilim berishi mumkin. Oʻzbek tilida kerakli maʼlumotni topish qiyinroq, lekin rus/ingliz tilini bilsangiz siz uchun barcha "eshiklar ochiq" boʻladi.

2️⃣Aniq oʻquv rejasini biz oʻrganmoqchi boʻlgan sohaga oid eʼlon qilingan kurslardagi mavzular ketma-ketligidan topishimiz mumkin. Masalan, kompyuterni mustaqil va bepul oʻrganaman deganlar bizni kursimizni oʻquv dasturidan oʻziga kerakli yoʻnalishni oson topishlari mumkin. Agar ingliz tilini bilsangiz Udemy'dagi mashhur kurslarning oʻquv dasturidan oʻzingizga kerakli sohani oʻzlashtirish uchun oʻquv rejasini "o'g'irlashingiz" mumkin.

3️⃣Mustaqil oʻrganish davomida bizni oʻsishimiz va toʻgʻri ketayotganimizni nazorat qilish uchun turli quiz saytlar va chatgpt'ni keltirishim mumkin (chatgpt'dan yaxshiroqlari ham bor, lekin ular oʻzbek tilini zoʻr bilishmaydi). Quiz (turli test va boshqotirma) saytlardan oʻqigan nazariy bilimlarinizni amaliyotda qoʻllashni oʻrgansak, ChatGPT'dan oʻrganganlarimizni qanchalik kerakligi, oʻqishimiz samaradorligi boʻyicha tavsiyalar olsak boʻladi (huddi ustoz bilan maslahat qilgandek).

Shu yoʻl bilan oʻzimiz istagan narsani bepulga oʻrganishimiz mumkin. Lekin unutmaylik, oʻzimizda istak va harakat boʻlmasa istalgan yaxshi kursni ham foydasi tegmaydi. Bizda maksimal darajada imkoniyatlar mavjud, faqat ulardan imkon qadar maksimal darajada foydalanishimiz kerak.

@Maxmudovning_tajribasi

O'xshamagani balki o'xshaganidir...

2020-yilda Allohning marhamati bilan kompyuter bo'yicha ta'lim berish sohasiga kirib qoldik. Shu kunga qadar imkon qadar ta'lim berishga harakat qilib kelayapmiz. O'tgan yili UstozAI loyihasi haqida eshitib, kompyuter savodxonligi kursini yozib berishim mumkinligi haqida gaplashgan edim. Ushbu loyihaga qatnashishimdan asosiy maqsad kattaroq loyihada ishtirok etish edi.

UstozAI'ga bir nechta kastinglarga borib, bir marotaba namuna uchun videodars ham yozdirib keldim. Lekin loyihaga to'g'ri kelmaganim sababli shekilli kursni yozmadik. Lekin bu narsa mening foydamga bo'ldi. Qatnashmaganimdan keyin @ks_kursi'ni tayyorlab, uni e'lon qildim va anchagina o'quvchilarimizni ijobiy fikrlarini eshityapman.

Hayotingizda nimadir o'xshamasa tushkunlikka tushmang, balki o'sha o'xshamagan narsa kelajakda ko'p narsalarni o'xshatishingizga turtki bo'lar. Bizga nima yaxshiligini faqatgina Yaratgan biladi.

@Maxmudovning_tajribasi

Qadriyatga aylangan odat
#xulosa

Har safar ustoz va uning shogirdlari endigina ibodat qilmoqchi bo'lib turganida ibodatxonaga mushuk kirib kelar va ularga halaqit berardi. Shunda ustoz shogirdlariga ibodat vaqtida mushukni bog'lab qo'yishni buyurdi. Ustoz o'lganidan keyin ham shogirdlar odatga ko'ra mushukni bog'lab qo'yib ibodat qilishda davom etishdi. Mushuk o'lganidan so'ng shogirdlar ustozning buyrug'iga amal qilish uchun boshqa mushuk boqib olishdi va ibodat qilayotganlarida uni bog'lab qo'yadigan bo'lishdi. Oradan asrlar o'tdi. Ustozning davomchilari katta olimlarga aylanib kitoblar yozishdi. Ular kitoblarida ibodat vaqtida mushukni bog'lab qo'yish juda muhim ahamiyatga ega ekanligini taʼkidlashgandi. (©️Adashmasam qaysidir android dasturidan saqlab qo'ygan edim)

Hayotimizda ham maqsad va mazmunini aniqlamay turib ishonadigan haqiqatlarimiz va bajaradigan amallarimiz anchagina topiladi (bularga turli irimlar, stereotip va boshqalar). Biror nimani qilishdan oldin nima maqsadda shuni qilayotganimizni aniqlashtirsak o'zimizga ham yonimizdagilarga ham foyda bo'ladi. Bo'lmasa bekorga "mushukni qiynaganimiz" qoladi.

@Maxmudovning_tajribasi

Raqobat sababli olgan foydam

📔 Hozirda sifatli tanlangan kitob va yaxshi marketing sababli Asaxiy tarjima qilayotgan kitoblar ancha ommalashmoqda. Ular ichida yaxshi kitoblar anchagina. Shunday jihati bor-ki, agar siz Asaxiy Books'dan kitob olsangiz oʻsha kitob ularning telefondagi dasturida ham oʻqish yoki eshitishingiz uchun ochiq boʻladi. Qogʻoz versiyasini xarid qilmagan kitobingizni esa elektron versiyasini alohida sotib olish kerak. Har bitta kitoblar narxi esa 9-25 ming soʻmlar oraligʻida.

✅ Endi mana shu kitoblarni bittalab sotib olmay, birdaniga hammasiga ega boʻlish yoʻllarini tahlil qilsak:

• Asaxiy Books uchun Asaxiy plus (39 ming so'm/oy) olsangiz hamma kitoblar ochiq boʻladi va qoʻshimcha bir qancha imkoniyatlar berishadi.

• Mutolaa loyihasida Premium sotib olsangiz (33 ming soʻm/oy) bir qancha Asaxiy'ning kitoblarini o'qish bilan bir qatorda bir qancha qo'shimcha mayda imkoniyatlar ham taqdim etadi.

• Яндекс Книги'dan foydalanish uchun Яндекс Плюс sotib olishingiz kerak (10 ming so'm/oy). Bu xaridingiz natijasida Yandex Music, Yandex Taxi (chegirmalar) va boshqa qulayliklarga erishasiz. Яндекс Книги'da esa Asaxiy'nikidan boshqa rus kitoblarini ham o'qishingiz mumkin bo'ladi.

I 💛 raqobat!

@Maxmudovning_tajribasi

Raqobatdan iste'molchilar foyda ko'radi!

Biror sohada raqobatdan faqat iste'molchilar foyda ko'radi. Keling buni oddiy misol bilan tushuntirib ko'raman. Kino, onlayn TV ko'rishga mo'ljallangan platformalar ko'payishi natijasida foydalanuvchilar sifatli, arzonroq narxlarda turli kontentlar ko'rish imkoniyatiga ega bo'ladi. O'zimdan misol qilsam kechadan oldingi kuni OQ dasturi orqali Elmurod akani "Yengilmen" konsertini ko'rdim (hali YouTube'ga chiqmagan edi). Bunda men platformalar raqobati orqali tekinga yaxshi kontentga ega bo'ldim.

Bunday foydalarni turli mobil aloqa kompaniyalari ochilishi natijasida ular o'rtasidagi "abonent talashishi" sababli e'lon qilayotgan aksiya va chegirmalari; yangi ochilgan bank yoki ularning qandaydir dasturlari chiqishi sababli pul o'tkazmalarini komissiyasiz qilishlari va boshqa sohalarda ko'rishimiz mumkin.

O'qigan insonlarni ko'payishi ham ish beruvchilarga turli "filtrlar" qo'llashiga imkon beryapti. Oldinlari bir yilda 100 kishi o'qishni tamomlab, diplomi bilan ishga kirishga suhbatga borgan bo'lsa, hozirda har yilda minglab talabalar diplom bilan ishga kirish istagida borishmoqda. Shu o'rinda ish beruvchi ham o'ziga kerakli insonlarni tanlash imkoniyati kengaymoqda.

Umuman olib qaraganda raqaobat bor joyda soha rivojlanadi va bozor sifatli mahsulot yoki xizmatlarga ega bo'ladi. Siz biror sohada bo'lsangiz raqobatdan qo'rqmang, sof raqobat sizni kuchayishingizga sababchi bo'ladi.

@Maxmudovning_tajribasi

Onlayn savdoda shoshilmang!

Kecha qayerdandir Samsung Galaxy Fit 3 fitnes soatiga qiziqib qoldim va eng arzon narxda texnomart'dan topdim. Har doim ham texnomart'da bunday arzon narxda narsa topish qiyin deb arzon narxda tezda olish hayolimga keldi, lekin oldin bir taqib ko'rishim kerak degan fikrim sababli buyurtma qilmadim.

Kecha kechqurun Chorsu'dagi do'konlariga borib soatni ko'rsam qo'limga juda kichkina turar ekan va shu sababli menga to'g'ri kelmasligiga amin bo'ldim. Va onlayn savdoda shoshilmaslik kerakligi, kiyim yoki birorta aksesuar haqida gap ketadigan bo'lsa oldin boshqa joydan bo'lsa ham sizga qanday turishi haqida xulosaga kelish kerak degan fikrimni tasdiqladim.

Temu orqali bir qancha mayda narsalar buyurtma qilgan (20-dekabrda) edim, kelsa Xitoydan olgan ilk xaridim haqida ham fikrlarimni yozib qoldiraman.

Oldin aytganimdek biror nimani xarid qilishda yaxshilab izlanib ko'ring, bunda narx, mosligi va sifatlarini taqqoslash imkoniyatingiz mavjudligini unutmang. Kiyim yoki boshqa noyobroq narsani Xitoydan emas, o'zimizda kiyib ko'rib olishni tavsiya qilaman. Chunki men bilishimcha biz bilan Xitoydagi o'lchamlar o'rtasida qandaydir farq bor, aytaylik, bizdagi 44 o'lchamli oyoq kiyim menga to'g'ri kelsa, Xitoyliklarda 44 o'lchamli oyoq kiyim umuman boshqacha bo'lishi mumkin. Yetti o'lchab, bir kesaylik!

@Maxmudovning_tajribasi